ឯកឧត្តម ខូវ ឆាយ៖ ប្រដាល់គុនខ្មែរជើងឯកពិភពលោកជាការលើកស្ទួយ គុនខ្មែរ មរតកវប្បធម៌-អត្តសញ្ញាណជាតិខ្មែរលើឆាកអន្តរជាតិ
AKP ភ្នំពេញ ថ្ងៃទី១៧ ខែវិច្ឆិកា ឆ្នាំ២០២៥--ការប្រកួតកីឡាប្រដាល់គុនខ្មែរ ជើងឯកពិភពលោក ដែលគ្រោងនឹងធ្វើឡើងពីថ្ងៃទី១៧-២០ ខែធ្នូ ឆ្នាំ២០២៥ នៅខេត្តព្រះសីហនុ គឺជាការលើកស្ទួយគុនខ្មែរ មរតកវប្បធម៌ និងអត្តសញ្ញាជាតិខ្មែរលើឆាកអន្តរជាតិ រួមទាំងគោលដៅសំខាន់ៗមួយចំនួនទៀត។

នេះជាការគូសបញ្ជាក់របស់ឯកឧត្តម ខូវ ឆាយ អគ្គលេខាធិការស្តីទី សហព័ន្ធកីឡាគុនខ្មែរពិភពលោក ក្នុងឱកាសសន្និសីទសារព័ត៌មាន កាលពីថ្ងៃទី១៦ ខែវិច្ឆិកា ឆ្នាំ២០២៥ នៅអគារពហុពាណិជ្ជកម្ម ជីប ម៉ុង រាជធានីភ្នំពេញ ដោយមានការចូលរួមពីឯកឧត្តមបណ្ឌិត មាម រ៉ា ប្រធានសហព័ន្ឋគុនខ្មែរអន្តរជាតិ និងលោកអគ្គនាយកបន្តវេន អ៊ុង វីរៈ ដំណាងអ្នកឧកញ៉ាលាង ម៉េង ប្រធានអគ្គនាយកក្រុមហ៊ុន ខ្មែរប៊ែវើរីជីស។

ឯកឧត្តម ខូវ ឆាយ ជម្រាបជូនថា ព្រឹត្តិការណ៍គុនខ្មែរជើងឯកពិភពលោកឆ្នាំ២០២៥នេះ ជាព្រឹត្តិការណ៍ប្រវត្តិសាស្ត្រដ៏អស្ចារ្យថ្មីមួយទៀត សម្រាប់សហព័ន្ធ គុនខ្មែរអន្តរជាតិ ក្នុងការរៀបចំព្រឹត្តិការណ៍ពិភពលោកដ៏មានសក្តានុពល និងវិសាលភាពដ៏ធំធេងមួយដែលកើតមានឡើងក្នុងយុគសម័យតេជោធិបតីសន្តិភាពនាពេលនេះ។ ព្រឹត្តិ ការណ៍នេះបានរៀបចំឡើងក្រោមកិច្ចគាំទ្ររបស់រាជរដ្ឋាភិបាល ដែលមានសម្តេចធិបតី ហ៊ុន ម៉ាណែត ជាប្រមុខ ក្រសួងអប់រំយុវជន និងកីឡា គណៈកម្មាធិការជាតិអូឡាំពិក និងការឧបត្ថម្ភគាំទ្រការរៀបចំព្រឹត្តិការណ៍ទាំងស្រុងរបស់អ្នកឧបត្ថម្ភ ផ្តាច់មុខរបស់យើងគឺ ក្រុមហ៊ុន ខ្មែរ ប៊ែវើរីជីស។ ការឧបត្ថម្ភគាំទ្ររបស់ក្រុមហ៊ុនខ្មែរ ខ្មែរប៊ែវើរីជីស បានដើរតួនាទីយ៉ាងសំខាន់មិនត្រឹមតែក្នុងការជំរុញលើកស្ទួយកីឡាប្រដាល់គុនខ្មែរប៉ុណ្ណោះទេ ប៉ុន្តែក៏ក្នុងការលើកតម្កើនមរតកវប្បធម៌ និងអត្តសញ្ញាណជាតិខ្មែរលើឆាកអន្តរជាតិផងដែរ។

គោលបំណងសំខាន់ៗនៃការរៀបចំព្រឹត្តិការណ៍ប្រដាល់គុនខ្មែរ ជើងឯកពិភពលោកនេះ រួមមាន៖ ១.ដើម្បីលើកស្ទួយគុនខ្មែរលើឆាកអន្តរជាតិ ពង្រឹងការអភិវឌ្ឍសមត្ថភាពរបស់អត្តពលិក និងវិជ្ជាជីវៈរបស់មន្ត្រីបច្ចេកទេស ដើម្បីជំរុញការដាក់ប្រទេសកម្ពុជាជាគោលដៅនៃទីតាំងរៀបចំព្រឹត្តិការណ៍កីឡាសំខាន់ៗនៅអាស៊ី ដើម្បីបង្កើនមិត្តភាព សាមគ្គីភាព និងការទូតកីឡាក្នុងចំណោមប្រទេសដែលចូលរួម។ ប្រតិភូ និងប្រទេសដែលចូលរួមមាន២៨ប្រទេស ដែលបានបញ្ជាក់ពីការចូលរួមរបស់ខ្លួន និងអាចនឹងកើនឡើងច្រើនជាង៣០ប្រទេសមកពីទ្វីបអាស៊ី អឺរ៉ុប អាមេរិក អូសេអានី និងអាហ្វ្រិក។

ចំពោះកម្មវិធីប្រកួតគ្រោងនឹងរៀបចំកម្មវិធីបើកនៅថ្ងៃទី១៧ ខែធ្នូ ឆ្នាំ២០២៥ អមដោយការសម្តែងសិល្បៈរបាំ ចម្រៀង និងការសម្តែងក្បាច់គុនបុរាណខ្មែរផងដែរ ការប្រកួតលក្ខណៈស្ម័គ្រចិត្ត ពេញវ័យវគ្គជម្រុះ និងការប្រកួតអាជីពកម្រិតខ្ពស់ដណ្ដើមខ្សែក្រវាត់ជើងឯកគុនខ្មែរពិភពលោក២គូរៀងរាល់ថ្ងៃ (សរុប៨គូ) ដោយកីឡាករជួរមុខកម្រិតខ្ពស់របស់កម្ពុជា៨នាក់ប្រកួតជាមួយកីឡាករអាជីពកម្រិតខ្ពស់ៗមកពីបណ្តាប្រទេសនានា។
បន្ថែមពីលើនេះ ឯកឧត្តម ខូវ ឆាយ សង្កត់ធ្ងន់ថា ចំពោះសារៈសំខាន់សម្រាប់កម្ពុជា គឺព្រឹត្តិការណ៍គុនខ្មែរជើងឯកពិភពលោកនេះបានរួមចំណែកយ៉ាងសំខាន់ក្នុងការលើកតម្កើងកិត្តិយស កិត្តិសព្ទរបស់កម្ពុជាលើឆាកអន្តរជាតិ។ ជាទឹកដីកំណើតរបស់គុនខ្មែរ ជាគោលដៅទេសចរណ៍ដ៏សម្បូរបែប និងឈានមុខគេ ជាម្ចាស់ផ្ទះដែលមានសមត្ថភាពក្នុងការផ្តល់នូវបដិសណ្ឋារកិច្ច និងការរៀបចំព្រឹត្តិការណ៍កីឡាស្តង់ដារអន្តរជាតិ។ បង្ហាញពីការទទួលស្គាល់យ៉ាងទូលំទូលាយជាសកលនៃកីឡាប្រដាល់គុនខ្មែរ តាមរយៈការចូលរួមពីបណ្តាប្រទេសសមាជិកជាច្រើនពុំធ្លាប់មានពីមុនមក៕
ដោយ ហេង ណាលីន





