AKP ភ្នំពេញ ថ្ងៃទី១៤ ខែវិច្ឆិកា ឆ្នាំ២០២៥-- កម្ពុជាបន្តធ្វើពិពិធកម្មសេដ្ឋកិច្ច និងសមាហរណកម្មសេដ្ឋកិច្ចក្នុងតំបន់ និងសកលលោក ដោយប្រកាន់ខ្ជាប់នូវគោលការណ៍ប្រព័ន្ធពាណិជ្ជកម្មពហុភាគីឈរលើវិធានច្បាប់ និងទីផ្សារបើកចំហ ដែលបានផ្តល់នូវភាពប្រាកដប្រជា ភាពអាចព្យាករណ៍បាន និងធានាបាននូវភាពស្មើគ្នា ដោយមិនមានការរើសអើងរវាងវិនិយោគិនបរទេស និងក្នុងស្រុក។ នេះជាការលើកឡើងរបស់លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម នៅក្នុងពិធីអបអរសាទរខួប២២ឆ្នាំនៃការបង្កើតក្រុមហ៊ុនយូនីលឹវើ (ខេមបូឌា) លីមីធីត នៅថ្ងៃទី១៤ ខែវិច្ឆិកា ឆ្នាំ២០២៥។ 

ក្នុងឱកាសនោះ លោកជំទាវរដ្ឋមន្ត្រីបានជម្រាបជូនអំពីកិច្ចខិតខំប្រឹងប្រែងរបស់ក្រសួងពាណិជ្ជកម្ម ក្នុងនាមសេនាធិការរាជរដ្ឋាភិបាល ក្នុងការធ្វើឱ្យកាន់តែប្រសើរទ្បើងបន្ថែមទៀត នូវបរិយាកាសធុរកិច្ច និងវិនិយោគ ជាពិសេស ការបន្តធ្វើកិច្ចសម្រួលពាណិជ្ជកម្មនិងធុរកិច្ច ការលើកកម្ពស់ភាពជាដៃគូ និងកិច្ចសន្ទនា និងការពង្រឹងការប្រកួតប្រជែងនិងបរិយាកាសធុរកិច្ចស្មើភាព។

ជាមួយគ្នានេះដែរ លោកជំទាវបានវាយតម្លៃខ្ពស់ចំពោះការរីកចម្រើននៃដំណើរការអាជីវកម្មរបស់ក្រុមហ៊ុនយូនីលឹវើ (ខេមបូឌា) លីមីធីត នៅកម្ពុជាអស់រយៈពេល២២ឆ្នាំ ដែលមិនត្រឹមតែបានជួយជំរុញចរន្តទីផ្សារក្នុងស្រុកយ៉ាងមមាញឹកក្នុងការផ្គត់ផ្គង់គ្រឿងឧបភោគ-បរិភាគ ចំណីអាហារ និងផលិតផលប្រើប្រាស់ប្រចាំថ្ងៃដែលមានគុណភាពខ្ពស់ ភាពសន្សំសំចៃ និងជម្រើសសម្បូរបែប ដែលឆ្លើយតបទៅនឹងតម្រូវការបស់ប្រជាពលរដ្ឋកម្ពុជាប៉ុណ្ណោះទេ ក្រុមហ៊ុនក៏បានចូលរួមបង្កើតការងារដោយផ្ទាល់ និងប្រយោលជាង ៤ ពាន់កន្លែងដល់ប្រជាជនកម្ពុជា។ 

លោកជំទាវក៏បានសង្កត់ធ្ងន់លើភាពចាំបាច់ក្នុងការលើកកម្ពស់អំណាចអ្នកប្រើប្រាស់ ដែលក្នុងនោះ ក្រសួងពាណិជ្ជកម្មបាន និងកំពុងខិតខំផ្សព្វផ្សាយឱ្យកាន់តែទូលំទូលាយបន្ថែមទៀត អំពីការយល់ដឹងក្នុងការប្រើប្រាស់ផលិតផលប្រកបដោយភាពវៃឆ្លាត ជាពិសេសរបៀបប្រើប្រាស់ ការទុកដាក់រក្សាទុក និងការយល់ដឹងអំពីប្រភពដើមនិងគុណភាពទំនិញជាដើម។ 

បន្ថែមពីនេះ លោកជំទាវរដ្ឋមន្ត្រីបានវាយតម្លៃខ្ពស់ចំពោះការរីកចម្រើននៃទំនាក់ទំនងដ៏ល្អប្រសើររវាងកម្ពុជា និងចក្រភពអង់គ្លេស ជាពិសេសកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ ដែលនាំមកនូវអត្ថប្រយោជន៍យ៉ាងច្រើនដល់ភាគីទាំងពីរ និងដើរតួនាទីដ៏សំខាន់ក្នុងការគាំទ្រដល់គោលដៅអភិវឌ្ឍន៍របស់កម្ពុជា។ 

គួរបញ្ជាក់ដែរថា នៅដើមឆ្នាំ២០២៦ ខាងមុខនេះ កម្ពុជា និងអង់គ្លេស នឹងរៀបចំវេទិកាពាណិជ្ជកម្ម និងវិនិយោគរួមរវាងកម្ពុជា និងអង់គ្លេស (JTIF) ដែលអនុញ្ញាតឲ្យភាគីទាំងពីរបន្តពិនិត្យលទ្ធភាពពង្រីកកិច្ចសហប្រតិបត្តិការលើវិស័យជាច្រើនដូចជា វិស័យហិរញ្ញប្បទានវិនិយោគសម្រាប់គម្រោងហេដ្ឋារចនាសម្ព័ន្ធ ពាណិជ្ជកម្មកសិផល និងកិច្ចសម្រួលការនាំចេញនានា៕

ដោយ៖ ស្រីពេជ្រ