AKP ភ្នំពេញ ថ្ងៃទី១៤ ខែវិច្ឆិកា ឆ្នាំ២០២៥ -- លោក ហ្សាង កៅគីង (Zhang Guoqing) ឧបនាយករដ្ឋមន្ត្រីចិន និងព្រះអង្គម្ចាស់ ហ្វីលីពទី៦ (Felipe VI) នៃប្រទេសអេស្ប៉ាញ បានចូលរួមក្នុងកិច្ចប្រជុំលើកទី៣ នៃក្រុមប្រឹក្សាប្រឹក្សាយោបល់ពាណិជ្ជកម្មចិន-អេស្ប៉ាញ នៅទីក្រុងប៉េកាំង កាលពីថ្ងៃព្រហស្បតិ៍។

លោក ហ្សាង ដែលជាសមាជិកនៃការិយាល័យនយោបាយនៃគណៈកម្មាធិការកណ្តាលបក្សកុម្មុយនិស្តចិន បានកត់សម្គាល់ថា ឆ្នាំនេះគឺជាខួបលើកទី២០ នៃភាពជាដៃគូយុទ្ធសាស្ត្រដ៏ទូលំទូលាយរវាងប្រទេសចិន និងអេស្ប៉ាញ។

លោកបានមានប្រសាសន៍ថា ក្រោមការណែនាំជាយុទ្ធសាស្ត្ររបស់ប្រមុខរដ្ឋទាំងពីរ ប្រទេសចិន និងអេស្ប៉ាញ គួរតែពង្រីកការយល់ដឹងរបស់ពួកគេសម្រាប់កិច្ចសហប្រតិបត្តិការឈ្នះ-ឈ្នះ ការពារបរិយាកាសអាជីវកម្មដ៏ត្រឹមត្រូវ និងបើកចំហ ទាញយកសក្តានុពលសម្រាប់កិច្ចសហប្រតិបត្តិការលើការច្នៃប្រឌិតវិទ្យាសាស្ត្រ-បច្ចេកវិទ្យា និងជំរុញកិច្ចសហប្រតិបត្តិការសេដ្ឋកិច្ច និងពាណិជ្ជកម្មទ្វេភាគីឱ្យឈានដល់កម្រិតកំពូល។

ព្រះអង្គម្ចាស់ ហ្វីលីពទី៦ បានមានប្រសាសន៍ថា ប្រទេសអេស្ប៉ាញមានឆន្ទៈក្នុងការរក្សាការផ្លាស់ប្តូរយ៉ាងជិតស្និទ្ធ និងបន្តពង្រឹងកិច្ចសហប្រតិបត្តិការជាក់ស្តែងជាមួយប្រទេសចិនក្នុងវិស័យផ្សេងៗ ដោយព្រះអង្គបានបន្ថែមថា ប្រទេសនេះស្វាគមន៍សហគ្រាសចិនកាន់តែច្រើនមកវិនិយោគ និងចាប់ផ្តើមអាជីវកម្មនៅក្នុងប្រទេសអេស្ប៉ាញ ដើម្បីធ្វើការឆ្ពោះទៅរកលទ្ធផលកាន់តែច្រើននៃកិច្ចសហប្រតិបត្តិការទ្វេភាគី។

កិច្ចប្រជុំនេះ ត្រូវបានរៀបចំរួមគ្នាដោយប្រទេសចិន និងអេស្ប៉ាញ មានការចូលរួមពីតំណាងសហគ្រាស សមាគម និងសភាពាណិជ្ជកម្មចិន និងអេស្ប៉ាញជាង ៣០នាក់ក្នុងចំណោមអង្គភាពផ្សេងទៀត៕

ដោយ៖ មូល មិនា (ប្រភព៖ ភីបផលដេលី)