AKP ភ្នំពេញ ថ្ងៃទី១៤ ខែវិច្ឆិកា ឆ្នាំ២០២៥ -- លេខាធិការដ្ឋាននៃអង្គការសហប្រតិបត្តិការសៀងហៃ (SCO) បាននិយាយថា តំណាងនៃរដ្ឋជាសមាជិកនៃអង្គការ SCO បានព្រមព្រៀងគ្នាទៅលើផែនការសកម្មភាពសម្រាប់ឆ្នាំ២០២៦-២០៣០ ដើម្បីអនុវត្តកម្មវិធីសហប្រតិបត្តិការពាណិជ្ជកម្ម និងសេដ្ឋកិច្ចពហុភាគី។

          សេចក្តីថ្លែងការណ៍មួយបាននិយាយថា «នៅថ្ងៃទី១០-១២ ខែវិច្ឆិកា ឆ្នាំ២០២៥ ក្រោមអធិបតីភាពរបស់ភាគីរុស្ស៊ី កិច្ចប្រជុំក្រុមអ្នកជំនាញត្រូវបានធ្វើឡើងក្នុងទម្រង់ជាសន្និសីទវីដេអូ ដើម្បីការឯកភាពគ្នាទៅលើសេចក្តីព្រាងផែនការសកម្មភាពសម្រាប់ឆ្នាំ២០២៦-២០៣០ សម្រាប់ការអនុវត្តកម្មវិធីសហប្រតិបត្តិការពាណិជ្ជកម្ម និងសេដ្ឋកិច្ចពហុភាគីរបស់រដ្ឋជាសមាជិកនៃអង្គការ SCO»។

          សេចក្តីថ្លែងការណ៍នោះបានបន្ថែមថា ក្នុងអំឡុងពេលនៃព្រឹត្តិការណ៍នោះ តំណាងបានឯកភាពគ្នាទៅលើអត្ថបទនៃផែនការ ដែលត្រូវបានរួមបញ្ចូលនៅក្នុងបញ្ជីឯកសារដែលបានស្នើឡើងសម្រាប់ចុះហត្ថលេខា បន្ទាប់ពីកិច្ចប្រជុំក្រុមប្រឹក្សាប្រមុខរដ្ឋាភិបាលនៃរដ្ឋជាសមាជិកអង្គការ SCO នៅថ្ងៃទី១៨ ខែវិច្ឆិកា ឆ្នាំ២០២៥ ខាងមុខ។

          កាលពីខែកក្កដា ក្រសួងការបរទេសរុស្ស៊ីបានប្រកាសថា កិច្ចប្រជុំក្រុមប្រឹក្សាប្រមុខរដ្ឋាភិបាលនៃរដ្ឋជាសមាជិកអង្គការ SCO នឹងត្រូវធ្វើឡើងក្រោមអធិបតីភាពរបស់រុស្ស៊ីនៅថ្ងៃទី១៧-១៨ ខែវិច្ឆិកា ឆ្នាំ២០២៥ នៅទីក្រុងម៉ូស្គូ៕

ដោយ៖ យា ចិន្តាខន្តី (ប្រភព៖ ស្ពុតនីក)