AKP ភ្នំពេញ ថ្ងៃទី១៣ ខែវិច្ឆិកា ឆ្នាំ២០២៥ -- កាលពីពេលថ្មីៗនេះ ក្រសួងអប់រំរបស់ប្រទេសចិនបានដាក់ចេញនូវវិធានការមួយចំនួន ដែលមានគោលបំណងពង្រឹងសុខភាពផ្លូវចិត្តសម្រាប់សិស្សានុសិស្សនៅតាមបឋមសិក្សា និងមធ្យមសិក្សា។ គោលនយោបាយនេះមានបំណងបន្ធូរបន្ថយសម្ពាធសិក្សា កាត់បន្ថយពេលវេលាមើលអេក្រង់ និងលើកកម្ពស់បរិយាកាសគាំទ្រទាំងនៅសាលារៀន និងនៅផ្ទះ។

វិធានការដ៏ទូលំទូលាយនេះគ្របដណ្តប់លើវិស័យចំនួន១០ ដោយផ្តោតទៅលើបញ្ហាសំខាន់ៗដែលប៉ះពាល់ដល់សុខុមាលភាពផ្លូវចិត្តរបស់យុវជន ដោយសង្កត់ធ្ងន់ទៅលើការកាត់បន្ថយបន្ទុកសិក្សាហួសហេតុ និងការថប់បារម្ភទាក់ទងនឹងការប្រឡង។

សាលារៀនត្រូវបានណែនាំឱ្យគ្រប់គ្រងយ៉ាងតឹងរ៉ឹងនូវបរិមាណកិច្ចការផ្ទះដែលសរសេរ ជៀសវាងការដាក់ទណ្ឌកម្ម ឬកិច្ចការដដែលៗ និងពិចារណាណែនាំវិធានការ «ថ្ងៃគ្មានកិច្ចការផ្ទះ» ប្រចាំសប្តាហ៍។

ការសិក្សាដ៏ទូលំទូលាយរយៈពេលបួនឆ្នាំសម្រាប់ក្មេងជំទង់ចំនួន៤២០.០០០នាក់ ដែលធ្វើឡើងដោយមជ្ឈមណ្ឌលស្រាវជ្រាវចិត្តវិទ្យាវិជ្ជមានរបស់សាកលវិទ្យាល័យ Tsinghua បានបង្ហាញថា ១៤,៨% នៃក្មេងជំទង់ដែលបានស្ទង់មតិ បានបង្ហាញពីហានិភ័យនៃជំងឺធ្លាក់ទឹកចិត្តក្នុងកម្រិតផ្សេងៗគ្នា។ នេះបើយោងតាមលោក ប៉េង កៃពីង (Peng Kaiping) សាស្ត្រាចារ្យនៅនាយកដ្ឋានចិត្តវិទ្យា និងវិទ្យាសាស្ត្រយល់ដឹងរបស់សាកលវិទ្យាល័យ។

លោក​បាននិយាយ​ថា «ក្មេងជំទង់​មួយ​ចំនួន​បាន​បង្ហាញ​ពី​កង្វះ​ការ​លើកទឹកចិត្ត​ក្នុង​ការ​រៀនសូត្រ ការ​មិន​ចាប់អារម្មណ៍​លើ​ពិភព​ពិតអសមត្ថភាពក្នុងការ​ទំនាក់ទំនង​សង្គម និង​​អារម្មណ៍​គ្មាន​ន័យ​ក្នុង​ជីវិត»។

លោក វ៉ាង ស៊ូមីង (Wang Xuming) អតីត​អ្នកនាំពាក្យ​ក្រសួង​អប់រំបាន​តស៊ូ​មតិឱ្យ​មាន​ការ​យល់​ដឹង​កាន់តែ​ស៊ីជម្រៅ​អំពី​គោលបំណង​នៃ​ការ​អប់រំ ដោយ​ផ្លាស់ប្តូរ​ពី​ការ​អប់រំ​ដែល​ផ្តោត​លើ​ការ​ប្រឡង​ជា​គោលការណ៍។លោក​ក៏​បាន​សង្កត់ធ្ងន់ទៅ​លើ​សារៈសំខាន់​នៃ​អ្នកអប់រំ​ដែល​ប្រកាន់​គោលជំហរ​ ដោយ​ផ្តល់​នូវ​ការ​រាប់អាន​ពិតប្រាកដ ការ​ស្តាប់​ដោយ​យកចិត្តទុកដាក់និង​ការសន្ទនា​ដោយស្មើភាព​គ្នា។

ដើម្បីធានាបាននូវរបៀបរស់នៅដែលមានសុខភាពល្អគោលនយោបាយនេះតម្រូវឱ្យសិស្សានុសិស្សទាំងអស់មានសកម្មភាពរាងកាយយ៉ាងហោចណាស់ពីរម៉ោងជារៀងរាល់ថ្ងៃ។ សាលារៀនត្រូវបានជំរុញឱ្យផ្តល់ជូនថ្នាក់អប់រំកាយដែលមានការទាក់ទាញជាងមុន និងការប្រកួតកីឡាជាប្រចាំ។

ការគេងគ្រប់គ្រាន់ក៏ត្រូវបានផ្តល់ជាអាទិភាពផងដែរ ដោយសាលារៀនត្រូវបានណែនាំឱ្យកែសម្រួលកាលវិភាគដើម្បីធានាសម្រាប់ការសម្រាកចាំបាច់ រួមទាំងពេលវេលាគេងលក់ស្រួលតាមដែលអាចធ្វើទៅបាន។

វិធានការថ្មីៗនេះនឹងអនុវត្តការហាមឃាត់ប្រើប្រាស់ទូរស័ព្ទដៃក្នុងថ្នាក់រៀន និងលើកកម្ពស់ពេលវេលាគ្មានអេក្រង់ ដើម្បីកាត់បន្ថយការពឹងផ្អែកលើឌីជីថល។ វេទិកាអនឡាញត្រូវបានជំរុញឱ្យកែលម្អក្បួនដោះស្រាយរបស់ពួកគេ ដោយបញ្ឈប់ការជំរុញខ្លឹមសារដែលប៉ះពាល់ដល់សុខភាពផ្លូវចិត្តរបស់សិស្សានុសិស្ស៕

ដោយ៖ យា ចិន្តាខន្តី (ប្រភព៖ ឆាយណាដេលី)