AKP ភ្នំពេញ ថ្ងៃទី១៣ ខែវិច្ឆិកា ឆ្នាំ២០២៥ -- ប្រទេសកូរ៉េខាងត្បូងបានបន្ថែមការងារជាង ១៩០.០០០កន្លែងនៅក្នុងខែតុលា ដែលបន្តនិន្នាការកើនឡើងនៃការងារនៅក្នុងឆ្នាំនេះ ប៉ុន្តែការបាត់បង់ការងារនៅតែបន្តនៅក្នុងវិស័យផលិតកម្ម និងសំណង់ ក៏ដូចជាក្នុងចំណោមយុវវ័យ។ នេះបើយោងតាមទិន្នន័យរបស់រដ្ឋាភិបាលដែលត្រូវបានបង្ហាញកាលពីថ្ងៃពុធ។

ចំនួនអ្នកដែលមានការងារធ្វើមានចំនួន ២៩,០៤លាននាក់កាលពីខែមុនដែលកើនឡើង ១៩៣.០០០នាក់ពីមួយឆ្នាំមុន។ នេះបើយោងតាមទិន្នន័យដែលចងក្រងដោយក្រសួងទិន្នន័យ និងស្ថិតិ។

ការកើនឡើងនេះបង្ហាញពីនិន្នាការកើនឡើងជាបន្តបន្ទាប់នៃការងារបន្ទាប់ពីការធ្លាក់ចុះមួយរយៈពេលខ្លីកាលពីខែធ្នូឆ្នាំមុន នៅពេលដែលប្រទេសនេះបានកត់ត្រាការបាត់បង់ការងារសុទ្ធចំនួន ៥២.០០០កន្លែង។

ទីផ្សារការងារបានបង្ហាញពីការងើបឡើងវិញជាលំដាប់នៅក្នុងឆ្នាំនេះដោយបានបន្ថែមការងារចំនួន ២៤៥.០០០កន្លែងនៅក្នុងខែឧសភា មុនពេលថយចុះមកនៅត្រឹម ១៨៣.០០០កន្លែងនៅក្នុងខែមិថុនា ហើយបន្ទាប់មកកើនឡើងដល់ ៣១២.០០០កន្លែងនៅក្នុងខែកញ្ញា។

ទោះបីជាមានកំណើនជារួមក៏ដោយ ក៏ទិន្នន័យការងារនៅក្នុងវិស័យផលិតកម្ម និងសំណង់នៅតែមានភាពយឺតយ៉ាវ។

វិស័យផលិតកម្ម ដែលជារឿយៗត្រូវបានចាត់ទុកថាជាឆ្អឹងខ្នងនៃសេដ្ឋកិច្ចកូរ៉េខាងត្បូង បានបាត់បង់ការងារចំនួន ៥១.០០០កន្លែងពីមួយឆ្នាំមុនក្នុងខែតុលា ដែលបន្តការធ្លាក់ចុះរបស់ខ្លួនដល់ខែទី១៦ ជាប់ៗគ្នា។

ឧស្សាហកម្មសំណង់ក៏បានបន្តតស៊ូផងដែរ ដោយបាត់បង់ការងារចំនួន១២៣.០០០កន្លែង ហើយបន្តធ្លាក់ចុះរបស់ខ្លួនសម្រាប់ខែទី១៨ ជាប់ៗគ្នា។

កំណើនការងារជារួមកាលពីខែមុន ភាគច្រើនត្រូវបានជំរុញដោយការជួលក្នុងចំណោមមនុស្សចាស់។

ក្រសួង​បាន​និយាយ​ថា ការងារ​សម្រាប់​មនុស្ស​ដែល​មាន​អាយុ​ចន្លោះ​ពី១៥ឆ្នាំ ទៅ ២៩ឆ្នាំ​បាន​ធ្លាក់​ចុះ ១៦៣.០០០កន្លែងក្នុង​ខែ​មុន។

អត្រា​ការងារ​សម្រាប់​ក្រុម​អាយុ​នេះ​បាន​ធ្លាក់​ចុះ ១% ​មក​នៅ​ត្រឹម៤៤,៦% ដែល​បន្ត​ធ្លាក់​ចុះ​ដល់ ១៨ខែ​ជាប់​គ្នា៕

ដោយ៖ យា ចិន្តាខន្តី (ប្រភព៖ កូរ៉េថាមស៍)