AKP បន្ទាយមានជ័យ ថ្ងៃទី១៣ ខែវិច្ឆិកា ឆ្នាំ២០២៥--ក្រុមអ្នកសង្កេតការណ៍អាស៊ាន (AOT) បានចុះទៅពិនិត្យដោយផ្ទាល់នៅព្រឹកថ្ងៃព្រហស្បតិ៍ ទី១៣ ខែវិច្ឆិកា ឆ្នាំ២០២៥ ពីស្ថានភាពរបស់ជនស៊ីវិលកម្ពុជាចំនួន៣នាក់ ដែលបានរងរបួសដោយសារការបាញ់ប្រហាររបស់កងយោធាថៃ កាលពីរសៀលថ្ងៃទី១២ ខែវិច្ឆិកា ឆ្នាំ២០២៥។ ហេតុការណ៍បាញ់ប្រហារនេះបានកើតឡើងនៅឯភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ជាប់ព្រំដែនកម្ពុជា-ថៃ។ បច្ចុប្បន្ន ជនរងរបួសទាំងបីនាក់កំពុងសម្រាកព្យាបាលរបួសរបស់ពួកគេនៅមន្ទីរពេទ្យខេត្តមិត្តភាពកម្ពុជា-ជប៉ុន ដែលស្ថិតនៅក្នុងស្រុកមង្គលបូរី ខេត្តបន្ទាយមានជ័យ។

ក្នុងដំណើរទស្សនកិច្ចនេះ ក្រុមអ្នកសង្កេតការណ៍អាស៊ាន (AOT) បានអនុវត្តនូវសកម្មភាពសំខាន់ៗ៖ សួរសុខទុក្ខ ក្រុមការងារបានជួបដោយផ្ទាល់ជាមួយជនរងរបួស និងក្រុមគ្រួសាររបស់ពួកគេ ដើម្បីស្វែងយល់ពីស្ថានភាពសុខភាព និងផ្ដល់កម្លាំងចិត្ត។ ប្រមូលព័ត៌មាន AOT បានប្រមូលទិន្នន័យ និងព័ត៌មានលម្អិតអំពីកាលៈទេសៈនៃហេតុការណ៍បាញ់ប្រហារ ក៏ដូចជាកម្រិតនៃការរងរបួសរបស់ជនស៊ីវិលទាំងបីនាក់។ បេសកកម្មរបស់ក្រុមអ្នកសង្កេតការណ៍អាស៊ាននៅពេលនេះ គឺដើម្បីប្រមូលភស្តុតាង និងព័ត៌មានគ្រប់ជ្រុងជ្រោយ ដើម្បីអាចរៀបចំ របាយការណ៍ផ្លូវការ មួយផ្ញើជូនទៅថ្នាក់ដឹកនាំអាស៊ាន ក៏ដូចជាភាគីពាក់ព័ន្ធទាំងអស់។

របាយការណ៍នេះមានគោលបំណងដើម្បីវាយតម្លៃអំពីភាពធ្ងន់ធ្ងរនៃឧបទ្ទវហេតុដែលបានកើតឡើង។ ស្នើសុំឱ្យមានការអន្តរាគមន៍ ឬការចរចាដើម្បីទប់ស្កាត់នូវអំពើហិង្សានៅតាមព្រំដែន ដែលបណ្ដាលឱ្យប៉ះពាល់ដល់អាយុជីវិត និងសុវត្ថិភាពរបស់ជនស៊ីវិលកម្ពុជា។

ការចុះពិនិត្យរបស់ AOT គឺជាសញ្ញាមួយបង្ហាញពីការយកចិត្តទុកដាក់របស់សហគមន៍អាស៊ានចំពោះបញ្ហាសន្តិសុខ និងមនុស្សធម៌នៅតាមតំបន់ព្រំដែនរវាងប្រទេសជាសមាជិក៕

ដោយ ឈុន សារ៉ាត