AKP ភ្នំពេញ ថ្ងៃទី១៣ ខែវិច្ឆិកា ឆ្នាំ២០២៥--លោកជំទាវ ឡងឌី សាន់ណារ៉ា រដ្ឋលេខាធិការក្រសួងវប្បធម៌និងវិចិត្រសិល្ប:បានជំរុញជំរុញប្រតិបត្តិករសិល្បៈវប្បធម៌ រួមគ្នាប្រយុទ្ធប្រឆាំងគ្រឿងញៀន និងបង្កើនសកម្មភាពផ្សព្វផ្សាយ App NoDrug ឱ្យបានទូលំទូលាយ ដើម្បីឱ្យប្រជាពលរដ្ឋចូលរួមក្នុងការប្រយុទ្ធប្រឆាំងគ្រឿងញៀននៅក្នុងមូលដ្ឋាន។ ការលើកឡើងរបស់លោកជំទាវរដ្ឋលេខាធិការបែបនេះ ក្នុងឱកាសអញ្ជើញចូលរួមបើកសិក្ខាសាលាក្រោមប្រធានបទ " យើងជាប្រតិបត្តិករសិល្បៈវប្បធម៌ រួមគ្នាទប់ស្កាត់ និងកាត់ផ្តាច់ឬសគល់នៃបញ្ហាគ្រឿងញៀន " ក្រោមអធិបតីភាពដោយមានការចូលរួមពីប្រធានមន្ទីរវប្បធម៌ និងវិចិត្រសិល្ប:ទាំង២៥ មន្រ្តីរាជការ សាស្ត្រាចារ្យ សិស្ស សរុបជិត២០០នាក់ នៅនាថ្ងៃទី១២ ខែវិច្ឆិកា ឆ្នាំ២០២៥ នៅទីស្ដីការក្រសួងវប្បធម៌ និងវិចិត្រសិល្បៈ។ 

ការរៀបចំសិក្ខាសាលានេះឡើង ក្នុងគោលបំណងជំរុញឱ្យការចូលរួមចែករំលែកចំណេះដឹងពីអ្នកជំនាញមកពីអាជ្ញាធរជាតិប្រយុទ្ធប្រឆាំងគ្រឿងញៀន និងមន្រ្តីជាន់ខ្ពស់ក្រសួងវប្បធម៌និងវិចិត្រសិល្បៈ។ គ្រឿងញៀនបង្កគ្រោះថ្នាក់ធំដល់ប្រជាពលរដ្ឋ ពិសេសយុវវ័យ ហេតុនេះការកាត់ផ្តាច់ឫស្សគល់បញ្ហាគ្រឿងញៀនគឺជាការចាំបាច់ដែលត្រូវ ហើយទាមទារការចូលរួមពីគ្រប់ភាគីពាក់ព័ន្ធរួមទាំងប្រជាពលរដ្ឋនៅមូលដ្ឋាន។ ទន្ទឹមនេះ ប្រជាពលរដ្ឋនៅមូលដ្ឋានអាចចូលរួមកាត់ផ្តាច់ឫស្សគល់បញ្ហាគ្រឿងញៀនបានដោយការរាយការណ៍អំពីបទល្មើសគ្រឿងញៀនជាក់ស្តែង(២៤ម៉ោង) តាមរយៈ App Nodrug របស់អាជ្ញាធរជាតិប្រយុទ្ធប្រឆាំងគ្រឿងញៀន ដែលមានការរក្សាការសម្ងាត់ខ្ពស់ មានភាពងាយស្រួល និងរហ័ស។

ក្នុងឱកាសនោះ ឯកឧត្ដម ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈ នៃអាជ្ញាធរជាតិប្រយុទ្ធប្រឆាំងគ្រឿងញៀន បានពាំនាំនូវការអរគុណ និងកោតសរសើរពីឯកឧត្តមសន្តិបណ្ឌិត នេត សាវឿន ឧបនាយករដ្ឋមន្រ្តី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ជូនចំពោះថ្នាក់ដឹកនាំក្រសួងវប្បធម៌និងវិចិត្រសិល្បៈ ដែលបានចូលរួមយ៉ាងសកម្មក្នុងការងារប្រយុទ្ធប្រឆាំងគ្រឿងញៀនក្នុងវិស័យវប្បធម៌និងវិចិត្រសិល្បៈ។ 

លោកជំទាវ ឡង់ឌី សាន់ណារ៉ា រដ្ឋលេខាធិការ ក្រសួងវប្បធម៌ និងវិចិត្រសិល្បៈបានថ្លែងអំណរគុណ និងវាយតម្លៃខ្ពស់និងជំរុញដល់គ្រប់សមាសភាពប្រតិបត្តិករវិស័យវិចិត្រ និងសិល្បៈទាំងអស់បន្តចូលរួមប្រយុទ្ធប្រឆាំងគ្រឿងញៀន និងបង្កើនសកម្មភាពផ្សព្វផ្សាយ App NoDrug សម្រាប់ផ្ដល់ជាមធ្យោបាយដល់ប្រជាពលរដ្ឋចូលរួមការងារប្រយុទ្ធប្រឆាំងគ្រឿងញៀននៅតាមមូលដ្ឋាន។ 

ជាមួយគ្នានេះ លោកឧត្តមសេនីយ៍ត្រី យិន យឿត ជាវាគ្មិនក្នុងសិក្ខាសាលានេះ ក៏បានចែករំលែកចំណេះដឹងទូទៅពីបញ្ហាគ្រឿងញៀន  អត្ថប្រយោជន៍ និងការទាញយកប្រើប្រាស់ App NoDrug ព្រមទាំងមាត្រាច្បាប់ស្ដីពីការត្រួតពិនិត្យគ្រឿងញៀន៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន