AKP បន្ទាយមានជ័យ ថ្ងៃទី១៣ ខែវិច្ឆិកា ឆ្នាំ២០២៥--នៅវេលាម៉ោង ១១:០០ យប់ ថ្ងៃទី១២ ខែវិច្ឆិកា ឆ្នាំ២០២៥ រដ្ឋបាលខេត្តបន្ទាយមានជ័យ បានបង្ហាញនូវការយកចិត្តទុកដាក់ខ្ពស់បំផុត ដោយបាននាំយកអំណោយមនុស្សធម៌ជាបន្ទាន់ទៅចែកជូនដល់ជនភៀសសឹកដែលបានរត់ភៀសខ្លួនមកពីភូមិព្រៃចាន់ ស្ថិតក្នុងឃុំអូរបីជាន់ ស្រុកអូរជ្រៅ។ ការចុះសួរសុខទុក្ខ និងផ្តល់ជំនួយនេះ ធ្វើឡើងក្រោមការដឹកនាំ និងការយកចិត្តទុកដាក់ផ្ទាល់ពីឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ដើម្បីសម្រាលទុក្ខលំបាករបស់ប្រជាពលរដ្ឋដែលរងគ្រោះដោយអំពើហិង្សា។ទន្ទឹមនឹងនេះ ដំណឹងដ៏គួរឱ្យរីករាយមួយគឺប្រជាពលរដ្ឋខ្មែរស្លូតត្រង់ចំនួន០៣រូប ដែលបានរងរបួសដោយសារការបាញ់ប្រហារដ៏សាហាវព្រៃផ្សៃរបស់កម្លាំងទាហានថៃនៅភូមិព្រៃចាន់ កាលពីរសៀលថ្ងៃទី១២ ខែវិច្ឆិកា ឆ្នាំ២០២៥ ត្រូវបានក្រុមគ្រូពេទ្យជំនាញនៅ មន្ទីរពេទ្យខេត្តមិត្តភាពកម្ពុជា-ជប៉ុន មង្គលបូរី ធ្វើការវះកាត់ជួយសង្គ្រោះរួចផុតពីគ្រោះថ្នាក់ដល់អាយុជីវិតដោយជោគជ័យទាំងអស់គ្នា។ រដ្ឋបាលខេត្តបន្ទាយមានជ័យបានចេញសេចក្តីប្រកាសព័ត៌មានមួយ ដើម្បីជម្រាបជូនដល់សាធារណៈជនជាតិ និងអន្តរជាតិ អំពីឧបទ្ទវហេតុដ៏សាហាវឃោរឃៅដែលបង្កឡើងដោយក្រុមទាហានថៃ។

អ្នកនាំពាក្យរដ្ឋបាលខេត្តបន្ទាយមានជ័យ បានជម្រាបជូនថា នៅវេលាម៉ោង ១៥:៥០នាទី នាថ្ងៃទី១២ ខែវិច្ឆិកា ឆ្នាំ២០២៥ កម្លាំងទាហានថៃបានប្រើប្រាស់កាំភ្លើងបាញ់ប្រហារមកលើប្រជាពលរដ្ឋកម្ពុជាដែលកំពុងស្នាក់នៅក្នុងជម្រកកៅស៊ូតង់ ស្ថិតក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដោយបានបណ្តាលឱ្យប្រជាពលរដ្ឋខ្មែរ ស្លាប់ចំនួន០១នាក់ និងប្រជាពលរដ្ឋខ្មែរ រងរបួសចំនួន០៣នាក់។

អ្នកនាំពាក្យបានប្រកាសថ្កោលទោសយ៉ាងដាច់អហង្ការ ចំពោះទង្វើអមនុស្សធម៌ដ៏សាហាវឃោរឃៅនេះ ដែលរំលោភបំពានលើ “សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា និងថៃ” ដែលបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ នៅទីក្រុងគូឡាឡាំពួ។ ផ្ទុយ ពីការឯកភាពគ្នាក្នុងការរក្សាស្ថានភាពដើម (Status Quo) រហូតដល់ការងារខណ្ឌសីមាព្រំដែនគោកត្រូវបានបញ្ចប់ និងរង់ចាំដំណោះស្រាយរបស់គណៈកម្មការចម្រុះព្រំដែន (JBC)។

សូមជម្រាបជូនថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក៏បានចេញសារថ្កោលទោសយ៉ាងដាច់អហង្ការចំពោះការប្រើប្រាស់អំពើហិង្សារបស់ភាគីថៃមកលើពលរដ្ឋស៊ីវិលស្លូតត្រង់កម្ពុជានៅភូមិព្រៃចាន់។ សម្តេចធិបតីបានសង្កត់ធ្ងន់ថា ទង្វើនេះខុសច្បាប់មនុស្សធម៌អន្តរជាតិ និង ច្បាប់អន្តរជាតិ ហើយផ្ទុយទៅនឹងស្មារតីមនុស្សធម៌ ក៏ដូចជាការឯកភាពគ្នាកន្លងមកក្នុងការដោះស្រាយបញ្ហាព្រំដែនដោយសន្តិវិធី។ សម្តេចបានណែនាំឱ្យអាជ្ញាធរដែនដី និងគ្រប់កងកម្លាំងសមត្ថកិច្ចទាំងអស់ចាត់វិធានការជាបន្ទាន់ ក្នុងការការពារប្រជាពលរដ្ឋ ជាពិសេសត្រូវគិតគូរលើសុវត្ថិភាព និងអាយុជីវិតរបស់ពួកគាត់ឱ្យបានជាដាច់ខាត។ សម្តេចក៏បានអំពាវនាវឱ្យភាគីថៃបញ្ឈប់ជាបន្ទាន់ នូវការប្រើប្រាស់កម្លាំងមកលើប្រជាពលរដ្ឋស៊ីវិលស្លូតត្រង់កម្ពុជា និងសូមឱ្យមានការបើកការស៊ើបអង្កេតដោយឯករាជ្យ លើករណីនេះ ដោយមានការចូលរួមពីភាគីបរទេសដែលមានជំនាញ ដើម្បីស្វែងរកការពិត ទទួលខុសត្រូវ និងផ្តល់យុត្តិធម៌។ សម្តេចបានបញ្ជាក់ពីជំហររបស់កម្ពុជាថា នៅរក្សាជំហរក្នុងការដោះស្រាយបញ្ហាដោយសន្តិវិធី ស្របតាមស្មារតីនៃសេចក្តីថ្លែងការណ៍រួមទីក្រុងគូឡាឡាំពួ ដើម្បីឈានទៅដល់ការបញ្ចប់ជម្លោះ និងកសាងសន្តិភាពរវាងប្រទេសទាំងពីរ។

ក្នុងឱកាសចុះជួយពលរដ្ឋរងគ្រោះ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានលើកឡើងថា "ក្នុងនាមរដ្ឋបាលខេត្តបន្ទាយមានជ័យ ខ្ញុំសូមថ្កោលទោសយ៉ាងដាច់អហង្ការ ចំពោះទង្វើដ៏សាហាវឃោរឃៅនេះ ដែលបានធ្វើឱ្យបងប្អូនប្រជាពលរដ្ឋខ្មែរស្លូតត្រង់របស់យើងបាត់បង់ជីវិត និងរងរបួស។ យើងខ្ញុំសូមសម្តែងនូវការសោកស្តាយយ៉ាងក្រៀមក្រំ និងសូមចូលរួមរំលែកទុក្ខជាមួយក្រុមគ្រួសារសព។ ថ្ងៃនេះ ខ្ញុំចុះមកទាំងយប់ ដើម្បីបង្ហាញការយកចិត្តទុកដាក់ខ្ពស់ពីអាជ្ញាធរខេត្ត និងរាជរដ្ឋាភិបាល ចំពោះបងប្អូនជនភៀសសឹកទាំងអស់។ យើងខ្ញុំនឹងបន្តចាត់វិធានការការពារប្រជាពលរដ្ឋរបស់យើងឱ្យបានជាដាច់ខាត ដូចការណែនាំរបស់ សម្តេចបវរធិបតី ហ៊ុន ម៉ាណែត និងរក្សាគោលជំហរក្នុងការដោះស្រាយបញ្ហាដោយសន្តិវិធីស្របតាមកិច្ចព្រមព្រៀងអន្តរជាតិ៕"

ដោយ ឈុន សារ៉ាត