AKP ភ្នំពេញ ថ្ងៃទី១២ ខែវិច្ឆិកា ឆ្នាំ២០២៥ -- អនុប្រធានរដ្ឋសភាស្លូវេនីលោកស្រី ម៉ៃរ៉ា ហត (Meira Hot) បានអំពាវនាវឱ្យមានកិច្ចសហប្រតិបត្តិការកាន់តែជិតស្និទ្ធរវាងប្រព័ន្ធផ្សព្វផ្សាយស្លូវេនី និងចិន ដើម្បីបង្កើនការយល់ដឹងគ្នាទៅវិញទៅមក និងលើកកម្ពស់ការរាយការណ៍។

ក្នុងអំឡុងពេលកិច្ចប្រជុំមួយនៅទីក្រុងព័រតូរូហ្ស ជាមួយលោកស្រីហាវ សៅហ្គាង (Huo Xiaoguang) អនុប្រធានទីភ្នាក់ងារសារព័ត៌មានXinhua លោកស្រី ហត បាននិយាយថា ប្រព័ន្ធផ្សព្វផ្សាយបានបម្រើជាស្ពានដ៏សំខាន់រវាងប្រជាជាតិនានា ដោយជួយចែករំលែកព័ត៌មានពិត និងមានតុល្យភាព និងកសាងទំនុកចិត្តគ្នាទៅវិញទៅមក។

ចំណែកលោកស្រី ហាវ បាននិយាយថា ទីភ្នាក់ងារសារព័ត៌មានXinhua បានត្រៀមខ្លួនរួចជាស្រេចដើម្បីពង្រឹងការផ្លាស់ប្តូរជាមួយដៃគូស្លូវេនី និងធ្វើការរួមគ្នាដើម្បីរក្សាភាពយុត្តិធម៌ គោលបំណង និងភាពត្រឹមត្រូវក្នុងការរាយការណ៍។

ក្នុងចំណោមការកើនឡើងនៃវេទិកាសង្គម និងឌីជីថល វិជ្ជាជីវៈសារព័ត៌មាននៅតែមានសារៈសំខាន់សម្រាប់ទំនុកចិត្តរបស់សាធារណជនលោកស្រី ហត បានមានប្រសាសន៍ថា «តាមរយៈកិច្ចសហការកាន់តែរឹងមាំរវាងប្រព័ន្ធផ្សព្វផ្សាយរបស់យើង យើងអាចសរសេររៀបរាប់រឿងរ៉ាវរបស់យើងបានកាន់តែត្រឹមត្រូវ លើកកម្ពស់ការសន្ទនា និងរួមចំណែកដល់មិត្តភាពរវាងប្រជាជនរបស់យើង»។

លោកស្រី ហត បានសង្កត់ធ្ងន់ថា គំនិតផ្តួចផ្តើមនេះបាននាំមកនូវអត្ថប្រយោជន៍ជាក់ស្តែងដល់ប្រទេសដែលចូលរួម ដោយការកែលម្អហេដ្ឋារចនាសម្ព័ន្ធ និងការតភ្ជាប់ ហើយប្រទេសស្លូវេនីគួរតែប្រើប្រាស់វេទិកានេះឱ្យកាន់តែប្រសើរឡើង ដើម្បីជំរុញកិច្ចសហប្រតិបត្តិការ និងការផ្លាស់ប្តូរ។

លោកស្រីបាននិយាយថា ទីផ្សារចិនបានផ្តល់នូវឱកាសដ៏ធំទូលាយសម្រាប់ផលិតផលរបស់ប្រទេសស្លូវេនី ហើយវិស័យពាណិជ្ជកម្ម និងទំនាក់ទំនងនឹងអាចពង្រឹងបន្ថែមទៀតនូវមិត្តភាព និងកិច្ចសហប្រតិបត្តិការស្លូវេនី-ចិន៕

ដោយ៖ មូល មិនា (ប្រភព៖ ស៊ីនហួ)