AKP ភ្នំពេញ ថ្ងៃទី១១ ខែវិច្ឆិកា ឆ្នាំ២០២៥ -- លោក ម៉ាមូដ អាលី យូសូហ្វ (Mahmoud Ali Youssouf) ប្រធានគណៈកម្មការសហភាពអាហ្វ្រិក បានសម្តែងការព្រួយបារម្ភយ៉ាងខ្លាំងកាលពីថ្ងៃអាទិត្យចំពោះស្ថានភាពសន្តិសុខដែលកំពុងធ្លាក់ចុះយ៉ាងខ្លាំងនៅក្នុងប្រទេសម៉ាលី បន្ទាប់ពីមានរបាយការណ៍ថា ក្រុមភេរវករបានដាក់ការបិទផ្លូវយ៉ាងធ្ងន់ធ្ងររំខានដល់ការចូលទៅកាន់ការផ្គត់ផ្គង់សំខាន់ៗ និងធ្វើឱ្យស្ថានភាពមនុស្សធម៌កាន់តែអាក្រក់ទៅៗសម្រាប់ជនស៊ីវិល។

នៅក្នុងសេចក្តីថ្លែងការណ៍មួយ លោក យូសូហ្វ បានថ្កោលទោសចំពោះការវាយប្រហារដ៏សាហាវ ដែលបានសម្លាប់ជនស៊ីវិលស្លូតត្រង់ និងបង្កើនអស្ថិរភាពនៅទូទាំងតំបន់ដែលរងផលប៉ះពាល់។

ដោយបញ្ជាក់សារជាថ្មីអំពីសាមគ្គីភាពរបស់លោកជាមួយរដ្ឋាភិបាលនិងប្រជាជនម៉ាលី លោក យូសូហ្វ បានបញ្ជាក់ជាថ្មីអំពីការប្តេជ្ញាចិត្តដ៏រឹងមាំរបស់សហភាពអាហ្វ្រិកក្នុងការគាំទ្រសន្តិភាព សន្តិសុខ និងការអភិវឌ្ឍនៅទូទាំងតំបន់សាហ៊ែល។

លោកក៏បានថ្កោលទោសយ៉ាងខ្លាំងចំពោះការចាប់ជំរិតកាលពីពេលថ្មីៗនេះ រួមទាំងការចាប់ជំរិតជនជាតិអេហ្ស៊ីបចំនួន ០៣នាក់ និងបានអំពាវនាវឱ្យមានការដោះលែងពួកគេជាបន្ទាន់ និងដោយគ្មានលក្ខខណ្ឌ។

លោកបាននិយាយថា ទង្វើបែបនេះ គឺជាការរំលោភបំពានយ៉ាងធ្ងន់ធ្ងរលើសិទ្ធិមនុស្ស និងច្បាប់មនុស្សធម៌អន្តរជាតិ។

លោក យូសូហ្វ បានអំពាវនាវឱ្យមានការឆ្លើយតបអន្តរជាតិដ៏រឹងមាំសម្របសម្រួល និងស៊ីសង្វាក់គ្នា ចំពោះការប្រឆាំងភេរវកម្ម និងភាពជ្រុលនិយមហិង្សានៅក្នុងតំបន់សាហ៊ែល។

លោកក៏បានអំពាវនាវឱ្យមានកិច្ចសហប្រតិបត្តិការកាន់តែប្រសើរឡើងការចែករំលែកព័ត៌មានស៊ើបការណ៍សម្ងាត់ និងការគាំទ្រជាបន្តបន្ទាប់ដល់រដ្ឋដែលរងផលប៉ះពាល់នៅក្នុងតំបន់។

លោកបានបញ្ជាក់សារជាថ្មីនូវការត្រៀមខ្លួនរួចជាស្រេចរបស់សហភាពអាហ្វ្រិកក្នុងការគាំទ្រប្រទេសម៉ាលី ក៏ដូចជាប្រទេសដទៃទៀតក្នុងតំបន់សាហ៊ែល ក្នុងការស្វែងរកសន្តិភាព និងស្ថិរភាពរបស់ពួកគេ។

អំពើហិង្សាដែលកំពុងកើនឡើងដោយពួកសកម្មប្រយុទ្ធដែលមានទំនាក់ទំនងជាមួយក្រុម ISIS (Daesh) នៅក្នុងប្រទេសម៉ាលី បានបង្ខំឱ្យរដ្ឋាភិបាលបិទសាលារៀន និងសាកលវិទ្យាល័យ ចំពេលដែលកំពុងមានវិបត្តិអំណាច មនុស្សធម៌ និងសន្តិសុខ។

ដោយសារតែវិបត្តិនេះ សហរដ្ឋអាមេរិក ចក្រភពអង់គ្លេស និងបារាំងបានជំរុញឱ្យពលរដ្ឋរបស់ពួកគេចាកចេញពីប្រទេសម៉ាលី និងបានព្រមានកុំឱ្យធ្វើដំណើរទៅកាន់ប្រទេសក្នុងតំបន់អាហ្វ្រិកខាងលិចមួយនេះ៕

ដោយ៖ យា ចិន្តាខន្តី (ប្រភព៖ AA-AKP)