AKP ភ្នំពេញ ថ្ងៃទី១០ ខែវិច្ឆិកា ឆ្នាំ២០២៥

លោក ឈាង ឆដាភ័ក្ត្រ ប្រធាននាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈបានគូសបញ្ជាក់ថា មហោស្រពយីកេទូទាំងប្រទេសជាព្រឹត្តិការណ៍ដ៏សំខាន់មួយដែលរួមចំណែកក្នុងការអភិរក្សនិងលើកស្ទួយល្ខោនយីកេដែលជាមរតកអរូបីមួយរបស់ប្រទេសកម្ពុជាយើង ហើយមិនតែប៉ុណ្ណោះក៏ជាការផ្តល់ឧកាសដល់សិល្បករ សិល្បការិនីទាំងក្នុង និងក្រៅប្រព័ន្ធបានបញ្ចេញនូវសមត្ថភាព និងទេពកោសល្យរបស់ខ្លួននៅលើឆាកជាតិ។

ថ្លែងប្រាប់ទីភ្នាក់ងារសារព័ត៌មានកម្ពុជា AKP ឱ្យដឹងនៅថ្ងៃទី៧ ខែវិច្ឋិកា ឆ្នាំ២០២៥នេះ  លោក ឈាង ឆដាភ័ក្ត្រ បានបញ្ជាក់ថា នាយកដ្ឋានសិល្បៈទស្សនីយភាព នៃក្រសួងវប្បធ៌មនិងវិចិត្រសិល្បៈនឹងរៀបចំកម្មវិធី មហោស្រពល្ខោនយីកេទូទាំងប្រទេសលើកទី២ សម្រាប់ឆ្នាំ២០២៥ រយៈពេលបួនថ្ងៃ ចាប់ពីថ្ងៃទី២០ ដល់ថ្ងៃទី២៣ ក្នុងខែវិច្ឆិកា ឆ្នាំ២០២៥ នៅសាលសន្និសីទចតុមុខ។ លោកបានបន្ដថា មហោស្រពល្ខោនយីកេទូទាំងប្រទេសប្រចាំឆ្នាំ២០២៥នេះ នឹងមានសកម្មភាពមួយចំនួនដូចជា ថ្ងៃទី១ គឺជាព្រឹត្តិការណ៍នៃការបើកមហោស្រពដែលនឹងមានការសម្ដែងរឿងអ្នកតាឃ្លាំងមឿង ដោយក្រុមសិល្បៈនៃនាយកដ្ឋានសិល្បៈទស្សនីយភាព។ សម្រាប់ថ្ងៃទី ២ និងទី៣ នៃកម្មវិធីគឺជាការប្រកួតប្រជែងរបស់ក្រុមល្ខោនទាំងប្រាំក្រុមដែលមកពីបណ្តាលខេត្តនានាក្នុងប្រទេសកម្ពុជា។ លោកបានលើកឡើងថា សម្រាប់ថ្ងៃចុងក្រោយគឺជាកម្មវិធីបិទមហោស្រពល្ខោនយីកេ នឹងមានការសម្តែងទស្សនីយភាពរឿង កំហុសអ្នកណា ដោយក្រុមនិស្សិតនៃសាកលវិទ្យាល័យភូមិន្ទវិចិត្រសិល្បៈ។ ក្រៅពីទស្សនីយភាពនានា កម្មេវិធីមហោស្រពនេះក៏មានការតាំងពិព័រណ៍ផលិតផល និងវប្បធ៌មផងដែរ។

លោក ឈាង ឆដាភ័ក្ត្រ បានបញ្ជាក់ទៀតថា៖ «នាយកដ្ឋានសិល្បៈទស្សនីយភាព នៃក្រសួងវប្បធ៌មនិងវិចិត្រសិល្បៈបានសម្រិតសម្រាំងយ៉ាងយកចិត្តទុកដាក់ក្នុងការរៀបចំកម្មវិធីថ្នាក់ជាតិនេះ ពោលគឺចំណាយពេលប្រមាណជាប្រាំបីខែក្នុងការចាត់ចែង លើគ្រប់ផ្នែក ដូចជា ការជូនដំណឹងដល់ក្រុមល្ខោននៅតាមបណ្តាលរាជធានី ខេត្ត ការហាត់សមល្ខោនសម្រាប់កម្មវិធីបើក-បិទ ការរៀបចំឆាក និងឧបករណ៍បំពងសំឡេងព្រមជាមួយកិច្ចការមួយចំនួនទៀត»។ លោកបានបន្ថែមថា ក្រោយពីកម្មវិធីមហោស្រពល្ខោនយីកេនេះ នាយកដ្ឋានសិល្បៈទស្សនីយភាពរំពឹងថា កម្មវិធីមហោស្រពខាងមុខៗទៀតនឹងអាចរំលេចនូវទម្រង់សិល្បៈមួយចំនួនទៀតដូចជា ល្ខោនអាប៉េ ល្ខោននិយាយ និងទម្រង់សិល្បៈដែលមិនសូវមានសកម្មភាពដទៃទៀតដើម្បីឱ្យមហាជនបានទស្សនា ស្គាល់ និងស្រឡាញ់ការពារ វប្បធ៌មដ៏ស្រស់ស្អាតរបស់ខ្មែរ។

លោក ឈាង ឆដាភ័ក្ត្រ ក៏បានបង្ហាញនូវក្តីសង្ឃឹមថា មហោស្រពល្ខោនយីកេទូទាំងប្រទេសឆ្នាំ២០២៥នេះ នឹងទទួលបានការគាំទ្រច្រើនកុះករពីសំណាក់មហាជន ត្បិតថាព្រឹត្តការណ៍នេះនឹងពាំនាំនូវទស្សនីយភាពវប្បធម៌ ប្រពៃណី និងទំនៀមទម្លាប់ដែលមានលក្ខណៈប្លែកៗគ្នាបម្រើអារម្មណ៍អ្នកទស្សនា។ ទន្ទឹមនេះ សម្រាប់ទស្សនិកជនដែលមានបំណងចង់ចូលរួមនូវកម្មវិធីមហោស្រពល្ខោនយីកេទូទាំងប្រទេសប្រចាំឆ្នាំ២០២៥ នេះអាចធ្វើការតាមដាននូវព័ត៌លម្អិតនៅលើគេហទំព័រហ្វេសប៊ុកផេក នាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ។

គួរបញ្ជាក់ផងដែរថា មហោស្រពល្ខោនយីកេទូទាំងប្រទេសប្រចាំឆ្នាំ២០២៥ គឺជាកម្មវិធីលើកទី២ហើយ ដោយកម្មវិធីលើកទី១គឺធ្វើឡើងនៅក្នុងឆ្នាំ ២០២០ នៅខេត្តតាកែវ៕

ដោយ៖ ឡាច សុជាតា