AKP ភ្នំពេញ ថ្ងៃទី១០ ខែវិច្ឆិកា ឆ្នាំ២០២៥-- ដើម្បីពិនិត្យ វាយតម្លៃ និងស្វែងរកដំណោះស្រាយក្នុងការពង្រឹងការអនុវត្តនូវចំណុចសំខាន់ៗទាំង៧នៃគោលនយោបាយ ភូមិ ឃុំ សង្កាត់មានសុវត្ថិភាពឱ្យកាន់តែមានប្រសិទ្ធភាពខ្ពស់ ជាពិសេសផ្តោតលើការទប់ស្កាត់បទល្មើសគ្រប់ប្រភេទ ការថែរក្សាសណ្តាប់ធ្នាប់សាធារណៈ និងការផ្តល់សេវាសាធារណៈជូនប្រជាពលរដ្ឋបានទាន់ពេលវេលា ព្រឹកថ្ងៃទី១០ ខែវិច្ឆិកា ឆ្នាំ២០២៥ លោក ពៅ ពិសិដ្ឋ អភិបាលរងនៃគណៈអភិបាលខេត្តពោធិ៍សាត់ និងជាប្រធានលេខាធិការដ្ឋានខេត្ត បានដឹកនាំកិច្ចប្រជុំស្តីពីការពង្រឹង និងជំរុញការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព ដោយមានការចូលរួមពីគ្រប់ផ្នែកដែលពាក់ព័ន្ធ។

ថ្លែងក្នុងកិច្ចប្រជុំនេះលោកអភិបាលរងខេត្តបានគូសបញ្ជាក់អំពីតួនាទីស្នូលរបស់អាជ្ញាធរមូលដ្ឋាន និងកម្លាំងនគរបាល ក្នុងការចូលរួមកសាងសន្តិសុខ និងសុវត្ថិភាពជូនប្រជាពលរដ្ឋឱ្យបានស៊ីជម្រៅ ដោយផ្តោតលើកិច្ចសហការ និងការអនុវត្តការងារជាប្រព័ន្ធ។

ក្នុងកិច្ចប្រជុំនេះដែរ តំណាងស្នងការដ្ឋាននគរបាលខេត្តពោធិ៍សាត់ក៏បានបង្ហាញពីការប្តេជ្ញាចិត្តរបស់ខ្លួន ក្នុងការបន្តអនុវត្តភារកិច្ចឱ្យបានល្អប្រសើរ ដើម្បីរួមចំណែកដល់ការសម្រេចបាននូវសុវត្ថិភាព និងភាពសុខសាន្តរបស់ប្រជាពលរដ្ឋនៅក្នុងមូលដ្ឋានក្រុងពោធិ៍សាត់ និងនៅទូទាំងខេត្ត៕

ដោយ៖ ចាន់ សុភឿន (ប្រភព៖ រដ្ឋបាលខេត្តពោធិ៍សាត់)