AKP កំពង់ធំ ថ្ងៃទី០៩ ខែវិច្ឆិកា ឆ្នាំ២០២៥-- លោក ជិន ស៊ីថា នាយខណ្ឌរដ្ឋបាលជលផលកំពង់ធំ និងលោក ចាយ គង់ម៉េង នាយរងខណ្ឌរដ្ឋបាលជលផលកំពង់ធំ កាលពីថ្ងៃទី០៨ ខែវិច្ឆិកា ឆ្នាំ២០២៥ បានដឹកកម្លាំងចេញប្រតិបត្តិការទប់ស្កាត់ បង្ក្រាបបទល្មើសជលផលដោយបានបែងចែកជាពីរក្រុម៖ ក្រុមទី១. លោកជិន ស៊ីថា នាយខណ្ឌដឹកនាំកម្លាំងប្រត្តិការចាប់ពីចំណុច ពាមប្រគៀប អូរចកត្មាតចាំ រហូតដល់ ល្បប់។

ក្រុមទី២. លោក ចាយ គង់ម៉េង ដឹកនាំកម្លាំងប្រតិបត្តិការ ចាប់ពីចំណុច ពាមប្រគៀប រហូតដល់ព្រែកតូច ក្នុងភូមិសាស្ត្រឃុំម្សាក្រងស្រុកស្ទោងខេត្តកំពង់ធំ សហការជាមួយកម្លាំងទីបញ្ជាការស្រាលស្រុកស្ទោងកម្លាំងទីបញ្ជាការស្រាលពាមបាង កម្លាំងទីបញ្ជាការស្រាលផាត់សណ្តាយនិងកម្លាំងសឹករងខេត្ត (យោធភូមិភាគទី៤) កម្លាំងសង្កាត់រដ្ឋបាលជលផលស្ទោង សង្កាត់ពាមបាងសង្កាត់កំពង់ស្វាយលើក សង្កាត់កំពង់ស្វាយក្រោមមន្រី្តខណ្ឌ មន្រ្តីកិច្ចសន្យាសហគមន៍នេសាទបឹងប្រសាន សហគមន៍នេសាទអភិវឌ្ឍស្ពានគ្រងនិងសហគមន៍នេសាទសាមគ្គីកំពង់គោជាលទ្ធផលអនុវត្តបាន១ករណីដោយបានធ្វើការរុះរើ និងបំផ្លាញចោលឧបករណ៍នេសាទខុសច្បាប់នៅហ្នឹងកន្លែងរួមមាន៖របាំងសាច់អួនក្រឡាញឹក ចំនួន២៥ប្រវែង៥០០០ម៉ែត្រ ឡុកចំនួន៥០គ្រឿង លូសាច់អួន ១០០មាត់បង្គាលចំនួន ១០០០ដើម និងបានចាក់លែងត្រីស្រស់ចម្រុះចំនួន៥០គីឡូក្រាមចូលទន្លេវិញ។

នៅថ្ងៃជាមួយគ្នានេះដែរលោក កែវ សុឃឿន មន្រ្តីសង្កាត់រដ្ឋបាលជលផលបារាយណ៍ (ប្រចាំស្រុកតាំងគោក) បានចូលរួមជាមួយទីបញ្ជាការស្រាលកោះរះ ចុះបង្ក្រាបបទល្មើសជលផលនៅចំណុចវត្តចាស់ ទួលពភ្លា កងពល ខ្នាតូច អូគោល និងកន្ទួត ស្ថិតនៅក្នុងភូមិសាស្រ្តឃុំស្រឡៅ ឃុំជ្រលង និងឃុំសូយោង ស្រុកតាំងគោក ខេត្តកំពង់ធំជាលទ្ធផលអនុវត្តបាន០១ករណ៍ដោយបានរុះរើបំផ្លាញចោលឧបករណ៍នេសាទខុសច្បាប់នៅហ្នឹងកន្លែងរួមមាន៖ របាំងស្បៃមុងចំនួន៤៦របាំង ប្រវែង៩១០ម៉ែត្រ ឡុកចំនួន៤៦គ្រឿង លប/លូចំនួន៤៦មាត់បង្គោលចំនួន៤២០ដើម និងចាក់លែងត្រីស្រស់ទម្ងន់១០គីឡូក្រាមចូលទន្លេវិញ៕

ដោយ ស៊ុម វណ្ណា