AKP ភ្នំពេញ ថ្ងៃទី០៩ ខែវិច្ឆិកា ឆ្នាំ២០២៥-- នាឱកាសដឹកនាំគណៈប្រតិភូក្រសួងទេសចរណ៍ និងក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា (CTB) ចូលរួមពិព័រណ៍ទេសចរណ៍ពិភពលោក (World Travel Market) នៅទីក្រុងឡុងដ៏ ចក្រភពអង់គ្លេស ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានជួបសំណេះសំណាលសាកសួរសុខទុក្ខ និងពិភាក្សាការងារជាមួយលោកជំទាវ ទួត បញ្ញា ឯកអគ្គរាជទូតវិសាមញ្ញ និងពេញសមត្ថភាពរបស់ព្រះរាជាណាចក្រកម្ពុជាប្រចាំចក្រភពអង់គ្លេស ព្រមទាំងសហការី នៅស្ថានឯកអគ្គរាជទូតកម្ពុជា នាទីក្រុងឡុងដ៏ ដោយបានជំរុញមន្ត្រីទូតលើការងារផ្សព្វផ្សាយពីសក្តានុពលទេសចរណ៍ កម្ពុជា និងកាលានុវត្តវិនិយោគដល់ប្រជាជនអង់គ្លេស និងបណ្តាប្រទេសដែលស្ថិតនៅក្រោមការចាត់ ចែងរបស់ស្ថានទូតទាំងអស់ ជាពិសេសការផ្តល់បដិសណ្ឋារកិច្ចរាក់ទាក់ និងកក់ក្តៅប្រកបដោយស្នាមញញឹមរបស់ប្រជាជនកម្ពុជា។

ក្នុងឱកាសនោះ ឯកឧត្តមរដ្ឋមន្ត្រីបានពាំនាំនូវការផ្តាំផ្ញើ និងសាកសួរសុខទុក្ខពីសំណាក់សម្តេចអគ្គមហាសេនាបតី ហ៊ុន សែន ប្រធានព្រឹទ្ធសភា  និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាដល់លោកជំទាវឯកអគ្គរាជទូត និងសហការីទាំងអស់ ហើយទន្ទឹមនឹងការស្នើមន្ត្រី ទូតជួយផ្សព្វផ្សាយពីសក្តានុពលទេសចរណ៍កម្ពុជា និងកាលានុវត្តវិនិយោគដល់ប្រជាជនអង់គ្លេស និងបណ្តាប្រទេសដែលស្ថិតនៅក្រោមការចាត់ចែងរបស់ស្ថានទូតទាំងអស់ ជាពិសេសការផ្តល់បដិសណ្ឋារកិច្ចរាក់ទាក់ និងកក់ក្តៅប្រកបដោយស្នាមញញឹមរបស់ប្រជាជនកម្ពុជាចំពោះភ្ញៀវទេសចរហើយនោះ ឯកឧត្តម ហួត ហាក់ ក៏បានស្នើស្ថានទូតចូលរួមសហការទប់ស្តាត់រាល់ព័ត៌មានក្លែងក្លាយពីកម្ពុជាដែលធ្វើឱ្យប៉ះពាល់ដល់វិស័យទេសចរណ៍កម្ពុជាផងដែរ៕ 

ដោយ៖ ចាន់ សុភឿន (ប្រភព៖ ក្រសួងទេសចរណ៍)