AKP ភ្នំពេញ ថ្ងៃទី៥ ខែវិច្ឆិកា ឆ្នាំ២០២៥ --ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ជាពិធីបុណ្យជាតិប្រពៃណីធំមួយ ហើយសម្រាប់នាឆ្នាំនេះដែរបានប្រារព្វធ្វើឡើងចាប់ពីថ្ងៃទី៤-៥-៦ ខែវិច្ឆិកា ឆ្នាំ២០២៥។

ក្នុងពិធីបុណ្យប្រពៃណីខ្មែរមួយនេះដែរគេក៏តែងតែសង្កេតឃើញនៅតាមបណ្តារាជធានី ខេត្តនីមួយៗបានរៀបចំកម្មវិធីបួងសួងសុំសេចក្ដីសុខ សេចក្ដីចម្រើន និងរៀបចំការប្រណាំងទូក បណ្ដែតប្រទីប និងសំពះព្រះខែ អកអំបុកយ៉ាងអធិកអធម ដើម្បីបង្ហាញពីវប្បធម៌ និងអរិយធម៌របស់ខ្មែរដល់ភ្ញៀវទេសចរជាតិ និងអន្ដរជាតិ ក៏ដូចជាបង្ហាញពីស្មារតីសាមគ្គីភាពរបស់ប្រជាពលរដ្ឋខ្មែរទាំងមូល។ ប៉ុន្ដែ ក្នុងឆ្នាំនេះ រាជរដ្ឋាភិបាលកម្ពុជាបានចេញសារាចរផ្អាកការរៀបចំប្រារព្ធព្រះរាជពិធីបុណ្យអុំទូកនៅដងទន្លេសាបមុខព្រះបមររាជវាំង ក្នុងរាជធានីភ្នំពេញ ដែលមានរយៈពេល៣ថ្ងៃ ចាប់ពីថ្ងៃទី៤ ដល់ថ្ងៃទី៦ ខែវិច្ឆិកា ឆ្នាំ២០២៥ ប៉ុន្តែអាជ្ញាធរតាមបណ្ដាខេត្ត អាចបន្តរៀបចំពិធីបុណ្យអុំទូកនៅតាមបណ្ដាខេត្ត របស់ខ្លួនបានទៅតាមលទ្ធភាព។

បុណ្យអុំទូក គឺជាព្រះរាជពិធីរបស់ព្រះមហាក្សត្រ ដែលមានកំណត់នៅក្នុងពិធីបុណ្យទ្វាទស្សមាស និងជាបុណ្យប្រពៃណីជាតិ ដែលទូទៅប្រារព្ធរៀងរាល់ឆ្នាំចំនួន៣ថ្ងៃ គឺថ្ងៃ១៤កើត ១៥កើត និង១រោចខែកត្តិក ដែល១៥កើតជាថ្ងៃពេញបូណ៌មី។ កម្មវិធីសំខាន់ៗ មានដូចជាប្រណាំងទូក បណ្តែតប្រទីប និងអកសំបុក សំពះព្រះខែ។

បើតាមលោក Maurice Glaize ជាអ្នកស្រាវជ្រាវជនជាតិបារាំងបានបញ្ជាក់ថា ព្រះរាជពិធីបុណ្យអុំទូក ប្រារព្ធឡើង ដើម្បីរម្លឹកដល់ចម្បាំងទ័ពជើងទឹកខ្មែរដែលបានរំដោះទឹកដីពីចាមមកវិញ ក្នុងរជ្ជកាលព្រះបាទជ័យវរ្ម័នទី៧ ដូចមានបង្ហាញចម្លាក់នៅលើជញ្ជាំងប្រាសាទបាយ័ន និងប្រាសាទបន្ទាយឆ្មារជាដើម។

ពាក់ព័ន្ធនឹងព្រះរាជពិធីបុណ្យអុំទូកនេះដែរ លោក មួង គីម រស់នៅស្រុកបរសេដ្ឋ ខេត្តកំពង់ស្ពឺ ដែលកំពុងលក់សណ្តែកដីក្នុងវត្តមួយកន្លែងក្នុងឱកាសពិធីបុណ្យអុំទូកនេះដែរបានប្រាប់ថា ពិធីបុណ្យអុំទូក បណ្តែតប្រទីប អកអំបុក និងសំពះព្រះខែ គឺជាពិធីយ៉ាងសំខាន់មួយរបស់ពលរដ្ឋខ្មែរ ហើយនាឆ្នាំនេះបើទោះបីប្រទេសមានជម្លោះព្រំដែនជាមួយប្រទេសថៃ ហើយរាជរដ្ឋាភិបាលកម្ពុជាមិនបានប្រារព្ធពិធីនេះនៅរាជធានីភ្នំពេញក្តី តែក្នុងនាមជាពលរដ្ឋខ្មែរមួយរូប លោកក៏សប្បាយរីករាយនឹងចូលរួមពិធីនេះដែរ។

បុរសវ័យជាង៦០ឆ្នាំរូបនេះបានប្រាប់បន្ថែមថា៖ «បើមានពិធីបុណ្យអុំទូក ហើយមានរៀបចំក្នុងរាជធានីភ្នំពេញ ខ្ញុំ និងកូនៗ ឆ្នាំខ្លះក៏បានទៅដើរលេងពិធីបុណ្យនេះដែរ។ បើពុំមានការរៀបចំពិធីបុណ្យអុំទូកនៅរាជធានីភ្នំពេញនោះទេ ខ្ញុំនិងគ្រួសារនៅលក់ដូរតាមភូមិ ស្រុក និងមានការរៀបចំសែនអំបុក ចេក ផ្កា ដើម្បីទទួលសិរីសួស្តីក្នុងថ្ងៃនេះដែរ។ និយាយទៅខ្ញុំមិនចោលថ្ងៃនេះឡើយ។»

មិនខុសពីការលើកឡើងរបស់បុរសវ័យចំណាស់ខាងលើនេះដែរ អ្នកស្រី វង់ ថា អ្នកលក់ដំឡូង និងសណ្តែកដីតាមពិធីបុណ្យនានា រស់នៅខេត្តតាកែវបានប្រាប់ឱ្យដឹងថា ក្នុងនាមជាជនជាតិខ្មែរ គឺអ្នកស្រីសប្បាយរីករាយជាមួយនឹងពិធីបុណ្យប្រពៃណីខ្មែរមួយនេះណាស់ពីព្រោះថាមិនត្រឹមតែបង្ហាញពីប្រពៃណីដ៏ល្អផូរផង់របស់ចាស់បុរាណទេ តែប្រពៃណី វប្បធម៌មួយនេះបានជួយឱ្យមានការជួបជុំបងប្អូន និងការដើរលេងកម្សាន្ត ជាពិសេសការរៀបចំប្រណាំងទូក និងពិធីផ្សេងៗទាក់ទងនឹងបុណ្យអុំទូកនេះ ដើម្បីផ្ដល់ការកម្សាន្តសប្បាយរីករាយរបស់បងប្អូនខ្មែរយើង។

ក្នុងវ័យ៤២ឆ្នាំ ជាកសិករផង និងជាអ្នកដើរលក់របស់ហូបចុកតាមពិធីបុណ្យនានានោះអ្នកស្រី វង់ ថា បាននិយាយដោយលើកឡើងថា៖ «ពិធីបុណ្យអុំទូកជាពិធីបុណ្យដ៏ធំរបស់ខ្មែរ ដែលបងប្អូនប្រជាពលរដ្ឋតែងចូលរួមគោរពប្រតិបត្តិដ៏យូរលង់មកហើយ ដែលខ្ញុំ និងកូនចៅពេលដល់ពិធីនេះក៏តែងដើរកម្សាន្ត និងជួបជុំគ្នាសប្បាយតាមគ្រួសារដូចពលរដ្ឋខ្មែរដទៃទៀតដែរ»។
កញ្ញា លី សៀលជូ យុវតីមួយរូបរស់នៅរាជធានីភ្នំពេញបានបង្ហាញក្តីរីយរាយក្នុងឱកាសពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដោយពិធីបុណ្យនេះបានទទួលការគាំទ្រពីសំណាក់ប្រជាពលរដ្ឋគ្រប់ទិសទី ហើយតែងនាំគ្នាប្រារព្ធជារៀងរាល់ឆ្នាំ ដោយមានការប្រណាំងទូកអុំ និងទូកចែវបុរស-នារី ជាដើម។ យុវតីរូបនេះ បានគូសបញ្ជាក់ថា ការរៀបចំពិធីបុណ្យអុំទូកនេះបានឆ្លុះបញ្ចាំងពីជំនឿសាសនាយ៉ាងមុតមាំរបស់ខ្មែរយើង។

លោក សៀក សាបុន ប្រធានសហគមន៍តំបន់ការពារធនធានធម្មជាតិពាមក្រសោបស្ថិតក្នុងភូមិ ពាមក្រសោប ឃុំពាមក្រសោប ស្រុកមណ្ឌលសីមា ខេត្តកោះកុងបានប្រាប់ឱ្យដឹងថា នៅថ្ងៃទី៤ ខែវិច្ឆិកា ឆ្នាំ២០២៥ ដែលជាថ្ងៃទី១នៃពិធីបុណ្យអុំទូកគឺមានអ្នកទេសចរចូលមកកម្សាន្តសហគមន៍របស់លោកជាង ១ ២០០ នាក់ ហើយសង្ឃឹមថា នៅក្នុងពិធីបុណ្យអុំទូកនេះ យ៉ាងហោចណាស់មានអ្នកទេសចរជាង១ម៉ឺននាក់ ចូលកម្សាន្តសហគមន៍របស់លោក។ លោកប្រធានសហគមន៍តំបន់ការពារធនធានធម្មជាតិពាមក្រសោបរូបនេះបានគូសបញ្ជាក់ផងដែរថា ពិធីបុណ្យអុំទូកពិតជាមោទនភាពជាតិខ្មែរណាស់ពីព្រោះថា មិនត្រឹមសហគមន៍លោកទេចូលរួមអបអរសាទរសូម្បីតែពលរដ្ឋនៅក្នុងប្រទេស និងក្រៅប្រទេសក៏បានចូលរួមដូចគ្នាផងដែរ ពីព្រោះវាជាប្រពៃណីដ៏ល្អផូរផង់របស់ជាតិខ្មែរយើង។ លោកបានអះអាងថា៖ «ពិធីនេះ មានតម្លៃមិនអាចកាត់ថ្លៃបានឡើយដែលបង្ហាញពីប្រពៃណី និងវប្បធម៌បុរាណរបស់កូនខ្មែរយើងគ្រប់រូប»។

នៅលើបណ្ដាញទំនាក់ទំនងសង្គម នាព្រឹកថ្ងៃទី៥ ខែវិច្ឆិកា ឆ្នាំ២០២៥ សម្ដេចអគ្គមហាសេនាបតីតេជោហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានបង្ហាញពីការសប្បាយរីករាយយ៉ាងគគ្រឹកគគ្រេងរបស់ប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ក្នុងថ្ងៃទី១ នៅខេត្តសៀមរាប។ សម្ដេចតេជោបានលើកឡើងថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅខេត្តសៀមរាប បាននាំមកនូវភាពសប្បាយរីករាយ និងបរិយាកាសអធិកអធម ដល់ប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ។

សម្ដេចតេជោបានបន្តថា នៅពេលថ្ងៃ នៅតាមដងស្ទឹងសៀមរាប មានប្រជាពលរដ្ឋកម្ពុជា ជាច្រើនកុះករ បានមកជួបជុំគ្នា ដើម្បីទស្សនាការប្រណាំងទូកង ដ៏ជក់ចិត្ត របស់ក្រុមចំណុះទូកដែល តំណាងឱ្យសាមគ្គីភាព និងកម្លាំង។ នៅពេល រាត្រី ដងស្ទឹង ត្រូវបានបំភ្លឺដោយពន្លឺ ប្រទីបចម្រុះពណ៌ ដែលអណ្តែតតាមផ្ទៃទឹក ខណៈ ប្រជាពលរដ្ឋ ធ្វើពិធីសំពះព្រះខែ និង រីករាយ នឹង ការអកអំបុកតាមប្រពៃណី។

ជាមួយគ្នានេះ សម្ដេចតេជោប្រធានព្រឹទ្ធសភាក៏បានបញ្ជាក់ឱ្យដឹងទៀតថា៖ «ភាពរីករាយនេះ មិនត្រឹមតែ ជាការកម្សាន្តប៉ុណ្ណោះទេ តែជាការបង្ហាញយ៉ាងច្បាស់អំពីការ ថែរក្សាប្រពៃណី វប្បធម៌ ដ៏សម្បូរបែបរបស់ខ្មែរ ក្នុងលក្ខណៈ ជាមហាគ្រួសារខ្មែរតែមួយ ក្រោមម្លប់សន្តិភាព»៕

ដោយ៖ មករា រូបថត៖ ឃុត សៅ