AKP ភ្នំពេញ ថ្ងៃទី៥ ខែវិច្ឆិកា ឆ្នាំ២០២៥ --សម្ដេចអគ្គមហាសេនាបតីតេជោហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានបង្ហាញពីការសប្បាយរីករាយយ៉ាងគគ្រឹកគគ្រេងរបស់ប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ក្នុងថ្ងៃទី១ នៅខេត្តសៀមរាប។

នៅលើបណ្ដាញទំនាក់ទំនងសង្គម នាព្រឹកថ្ងៃទី៥ ខែវិច្ឆិកា ឆ្នាំ២០២៥ សម្ដេចតេជោបានសរសេរថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅខេត្តសៀមរាប បាននាំមកនូវភាពសប្បាយរីករាយ និងបរិយាកាសអធិកអធម ដល់ប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ។ សម្ដេចតេជោបានបន្តថា នៅពេលថ្ងៃ នៅតាមដងស្ទឹងសៀមរាប មានប្រជាពលរដ្ឋកម្ពុជា ជាច្រើនកុះករ បានមកជួបជុំគ្នា ដើម្បីទស្សនាការប្រណាំងទូកង ដ៏ជក់ចិត្ត របស់ក្រុមចំណុះទូកដែល តំណាងឱ្យសាមគ្គីភាព និងកម្លាំង។ នៅពេល រាត្រី ដងស្ទឹង ត្រូវបានបំភ្លឺដោយពន្លឺ ប្រទីបចម្រុះពណ៌ ដែលអណ្តែត តាមផ្ទៃទឹក ខណៈ ប្រជាពលរដ្ឋ ធ្វើពិធីសំពះព្រះខែ និង រីករាយ នឹង ការអកអំបុកតាមប្រពៃណី។ 

ជាមួយគ្នានេះ សម្ដេចតេជោបានបញ្ជាក់ថា ភាពរីករាយនេះ មិនត្រឹមតែ ជាការកម្សាន្តប៉ុណ្ណោះទេ តែជាការបង្ហាញយ៉ាងច្បាស់អំពីការ ថែរក្សាប្រពៃណី វប្បធម៌ ដ៏សម្បូរបែបរបស់ខ្មែរ ក្នុងលក្ខណៈ ជាមហាគ្រួសារខ្មែរ តែមួយ ក្រោមម្លប់សន្តិភាព៕

ដោយ៖ ជឹម ណារី