AKP ភ្នំពេញ ថ្ងៃទី០៥ ខែវិច្ឆិកា ឆ្នាំ២០២៥-- ចាប់ពីថ្ងៃទី០៤ ដល់ថ្ងៃទី០៦ ខែវិច្ឆិកា ឆ្នាំ២០២៥ សាខាកាកបាទក្រហមកម្ពុជាខេត្តសៀមរាបកំពុងធ្វើយុទ្ធនាការសុវត្ថិភាពចរាចរណ៍ បរិស្ថាន ប្រកបដោយបរិយាបន្ន នៅក្នុងតំបន់រៀបចំកម្មវិធីផ្សារទឹក ដែលមានគោលបំណងចូលរួមទប់ស្កាត់ កាត់បន្ថយអត្រាស្លាប់ របួស និងពិការដោយគ្រោះថ្នាក់ចរាចរណ៍ ព្រមទាំងចូលរួមពង្រីកការផ្សព្វផ្សាយពីផលប៉ះពាល់នៃការប្រើប្រាស់ថង់ប្លាស្ទិកលើបរិស្ថាន និងសុខភាព នាឱកាសព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ខេត្តសៀមរាប រយៈពេល៣ថ្ងៃ ដែលមានការចូលរួមពីទីប្រឹក្សាយុវជន និងយុវជន កាកបាទក្រហមកម្ពុជា មកពី៣គ្រឹះស្ថានសិក្សា ។

ក្នុងយុទ្ធនាការនោះ មានការរៀបចំបញ្ជីសំណួរ-ចម្លើយ ផ្ដល់នូវមួកសុវត្ថិភាព ការចែកខិត្តបណ្ណសារអប់រំស្ដីពីប្រការសំខាន់ៗដែលត្រូវចងចាំចំពោះអ្នកប្រើប្រាស់ផ្លូវ និងរបៀបប្រើប្រាស់និងជ្រើសរើសមួកសុវត្ថិភាពឱ្យបានត្រឹមត្រូវ ព្រមទាំងការអប់រំផ្សព្វផ្សាយពីបរិស្ថានស្អាត និងការការពារបរិស្ថានដល់សាធារណជនដែលដើរកម្សាន្តនៅក្នុងតំបន់រៀបចំកម្មវិធីផ្សារទឹក។

ជាលទ្ធផល ខិតបណ្ណអប់រំពីប្រការសំខាន់ៗដែលត្រូវចងចាំចំពោះអ្នកប្រើប្រាស់ផ្លូវជាង ១៥០០សន្លឹក និងខិត្តបណ្ណពីរបៀបប្រើប្រាស់និងជ្រើសរើសមួកសុវត្ថិភាពឱ្យបានត្រឹមត្រូវជាង១៥០០សន្លឹក ត្រូវបានចែកចាយ ហើយមួកសុវត្ថិភាពចំនួន១០ ត្រូវបានផ្តល់ជូនអ្នកឆ្លើយនឹងសំណួរបានត្រឹមត្រូវ៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)