AKP បន្ទាយមានជ័យ ថ្ងៃទី០៥ ខែវិច្ឆិកា ឆ្នាំ២០២៥-- ឯកឧត្ដម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ និងលោកជំទាវ រួមជាមួយឯកឧត្តម លោកជំទាវ សមាជិកក្រុមប្រឹក្សាខេត្ត បណ្តាមន្ទីរ អង្គភាព និងរដ្ឋបាលក្រុង-ស្រុកទាំង៩ បានអញ្ជើញចូលរួមជាអធិបតីក្នុងពិធីបើកបំភ្លឺភ្លើងប្រទីប អមដោយការបាញ់កាំជ្រួចយ៉ាងអធិកអធម ដើម្បីអបអរសាទរព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នាដងស្ទឹងសិរីសោភ័ណ ត្រង់ចំណុចសួនតេជោសន្តិភាព ស្ថិតនៅសង្កាត់ព្រះពន្លា ក្រុងសិរីសោភ័ណ នារាត្រីថ្ងៃទី០៤ ខែវិច្ឆិកា ឆ្នាំ២០២៥។

ព្រះរាជពិធីបុណ្យប្រពៃណីជាតិដ៏ធំនេះត្រូវបានប្រារព្ធឡើងនៅក្នុងខេត្តបន្ទាយមានជ័យចាប់ពីថ្ងៃទី០៤ ដល់ថ្ងៃទី០៦ ខែវិច្ឆិកា ឆ្នាំ២០២៥ ទោះបីជាឆ្នាំនេះ រាជរដ្ឋាភិបាលបានសម្រេចផ្អាកការរៀបចំនៅរាជធានីភ្នំពេញក៏ដោយ ក៏រដ្ឋបាលខេត្តបន្ទាយមានជ័យនៅតែសម្រេចប្រារព្ធពិធីនេះឡើងក្នុងកម្រិតថ្នាក់ខេត្តយ៉ាងអធិកអធម ដើម្បីផ្តល់ឱកាសឱ្យប្រជាពលរដ្ឋបានសប្បាយរីករាយ ចូលរួមថែរក្សា បាននូវកេរ្តិ៍ដំណែលវប្បធម៌ដូនតា។

ក្នុងឱកាសដ៏នក្ខត្តឫក្សនោះ ឯកឧត្ដម អ៊ុ រាត្រី បានសម្តែងនូវការអរគុណយ៉ាងជ្រាលជ្រៅចំពោះគ្រប់មន្ទីរ អង្គភាព កងកម្លាំង និងរដ្ឋបាលក្រុងស្រុកទាំងអស់ ដែលបានខិតខំយកចិត្តទុកដាក់រៀបចំបណ្តែតប្រទីបយ៉ាងល្អស្អាត និងបានគូសបញ្ជាក់ថា "ទោះបីជាយើងមានការមមាញឹកនឹងកិច្ចការព្រំដែនក្តី ក៏គ្រប់ភាគីពាក់ព័ន្ធនៅតែបានរួមគ្នារៀបចំប្រទីបយ៉ាងល្អិតល្អន់ ដាក់លម្អ អបអរសាទរព្រះរាជពិធីបុណ្យប្រពៃណីជាតិដ៏ធំមួយនេះ"។ សកម្មភាពដ៏មមាញឹកនេះ បានបង្ហាញយ៉ាងច្បាស់ពីស្មារតីសាមគ្គីភាព និងការប្ដេជ្ញាចិត្តរបស់អាជ្ញាធរខេត្តក្នុងការថែរក្សា និងលើកស្ទួយបុណ្យប្រពៃណីជាតិខ្មែរ ក្រោមម្លប់នៃសុខសន្តិភាព។

ទន្ទឹមនឹងនេះ ឯកឧត្តមបានបន្ថែមថា ការខិតខំរៀបចំនេះគឺដើម្បីចូលរួមចំណែកលើកតម្កើងសោភ័ណភាពដងស្ទឹងសិរីសោភ័ណ និងរំពឹងថា ប្រទីបដែលបានដាក់លើផ្ទៃទឹកនេះនឹងទទួលបានការចាប់អារម្មណ៍យ៉ាងខ្លាំងពីភ្ញៀវទេសចរ និងប្រជាពលរដ្ឋដែលមកកម្សាន្តនៅសួនតេជោសន្តិភាពនាពេលរាត្រី។

វត្តមានប្រទីបដ៏ស្រស់ស្អាតដែលបានបំភ្លឺភ្លើងពណ៌យ៉ាងត្រចះត្រចង់ អមដោយការបាញ់កាំជ្រួចលើផ្ទៃមេឃ បានទាក់ទាញចំណាប់អារម្មណ៍យ៉ាងខ្លាំងពីសំណាក់សាធារណជន និងភ្ញៀវទេសចរដែលមកទស្សនាកម្សាន្ត។

អ្នកស្រី សុខា ដែលជាប្រជាពលរដ្ឋរស់នៅក្នុងក្រុងសិរីសោភ័ណ បានសម្តែងនូវក្តីរីករាយថា "ខ្ញុំពិតជាសប្បាយចិត្តណាស់ដែលឆ្នាំនេះខេត្តយើងបានរៀបចំពិធីនេះឡើង ទោះបីភ្នំពេញអត់រៀបចំក៏ដោយ។ ប្រទីបស្អាតៗ និងកាំជ្រួចអស្ចារ្យមែន ធ្វើឱ្យអារម្មណ៍ស្រស់ថ្លា ហើយមានឱកាសនាំគ្រួសារមកដើរកម្សាន្ត"។ ចំណែក កញ្ញា ដាលីស និស្សិតមកពីស្រុកមង្គលបូរី បានលើកឡើងថា"ការរៀបចំនេះបង្ហាញពីការយកចិត្តទុកដាក់របស់រដ្ឋបាលខេត្តក្នុងការថែរក្សាវប្បធម៌ និងការកម្សាន្តជូនប្រជាពលរដ្ឋ។ ខ្ញុំសូមថ្លែងអំណរគុណដល់ឯកឧត្តមអភិបាលខេត្ត និងក្រុមការងារទាំងអស់"។

ពិធីបើកបំភ្លឺភ្លើងប្រទីប និងបាញ់កាំជ្រួចនាពេលនេះ គឺជាសក្ខីភាពបញ្ជាក់ពីការប្ដេជ្ញាចិត្តរបស់អាជ្ញាធរខេត្តបន្ទាយមានជ័យ ក្នុងការលើកកម្ពស់សោភ័ណភាពទីក្រុង និងការអភិរក្សតម្លៃវប្បធម៌ប្រពៃណីជាតិឱ្យ បានគង់វង្សស្ថិតស្ថេរយូរអង្វែងតទៅមុខ៕

ដោយ ឈុន សារ៉ាត