AKP ភ្នំពេញ ថ្ងៃទី០៤ ខែវិច្ឆិកា ឆ្នាំ២០២៥--

នៅឆ្នាំនេះ ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក មិនត្រូវបានប្រារព្ធធ្វើនៅរាជធានីភ្នំពេញដូចរាល់ឆ្នាំនោះទេ លើកលែងតែពិធីសាសនា ប៉ុន្តែបណ្តាខេត្តនានា បានត្រៀមខ្លួនជាស្រេចសម្រាប់ដំណើរកម្សាន្តនានា​ នៅក្នុងអំឡុងពេលឈប់សម្រាករយៈពេលបីថ្ងៃ ចាប់ពីថ្ងៃទី០៤ ដល់ថ្ងៃទី០៦ ខែវិច្ឆិកា ឆ្នាំ២០២៥នេះ។ សូមរីករាយទាំងអស់គ្នា ហើយក៏សូមជូនពរឱ្យបងប្អូនប្រជាពលរដ្ឋទាំងអស់អាចជួបជុំគ្រួសារដោយសុខក្សេមក្សាន្ត។

​ដើម្បីឱ្យដំណើរបងប្អូនកាន់តែរីករាយ ហើយគេចផុតពីភាពសៅហ្មងទាំងឡាយនៅក្នុងអំឡុងពេលនេះ សូមប្រុងប្រយ័ត្នបញ្ហានានា ជាពិសេសគឺសុវត្ថិភាពនៃការធ្វើដំណើរ។ សូមលើកកម្ពស់ការប្រុងប្រយ័ត្នលើការបើកបរ ដោយគោរពច្បាប់ចរាចរណ៍ ហើយក៏គួរតាមដានអាកាសធាតុផងដែរ ពីព្រោះអំឡុងពេលនេះ កម្ពុជាកំពុងតែទទួលឥទ្ធិពលពីព្យុះទី២៥ ដែលមានឈ្មោះថា កាលម៉េហ្គី។

 ទាក់ទងនឹងបញ្ហាសុវត្ថិភាពនៃការធ្វើដំណើរ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា កាលពីថ្ងៃទី០៣ ខែវិច្ឆិកា ឆ្នាំ២០២៥ មុនព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក បានចេញសារនៅលើបណ្តាញសង្គម ឱ្យបងប្អូនបងប្អូនប្រជាពលរដ្ឋ ជាអ្នកបើកបរគ្រប់រូប ត្រូវពិនិត្យមើលយានយន្តរបស់ខ្លួនឱ្យបានត្រឹមត្រូវមុនពេលចេញដំណើរ និងគោរពតាមផ្លាកសញ្ញា និងគំនូសសញ្ញានៅតាមដងផ្លូវ។ ដោយនៅលើផ្លូវល្បឿនលឿន ឧស្សាហ៍មានគ្រោះថ្នាក់ចរាចរណ៍ សម្តេចក៏បានពញាក់អារម្មណ៍អ្នកបើកបរពិនិត្យលក្ខខណ្ឌ នៃការបើកបរលើផ្លូវល្បឿនលឿន ឱ្យបានខ្ជាប់ខ្ជួន ដើម្បីសុវត្ថិភាពក្នុងការធ្វើដំណើរទាំងអស់គ្នា។

ដោយឡែកខាងក្រសួងធនធានទឹក និងឧតុនិយមវិញ បានជូនដំណឹងកាលពីថ្ងៃទី០២ ខែវិច្ឆិកា ឆ្នាំ២០២៥ថា ក្រោមឥទ្ធិពលនៃព្យុះកាលម៉េហ្គីនេះ កម្ពុជាអាចទទួលរងឥទ្ធិពលកម្រិត ៣០% នៅចន្លោះរវាងចាប់ពីថ្ងៃទី០៦ ដល់ទី០៨ ខែវិច្ឆិកា ពោលគឺចុងព្រឹត្តិការណ៍នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក និងដើមព្រឹត្តិការណ៍ជាប្រវត្តិសាស្រ្តគឺពិធីបុណ្យខួបលើកទី៧២ នៃទិវាឯករាជ្យជាតិ ០៩ វិច្ឆិកា។​

ក្រោមឥទ្ធិពលនៃព្យុះនេះ សម្រាប់តំបន់មាត់សមុទ្រដែលមានដូចជាខេត្តកោះកុង ព្រះសីហនុ កំពត កែប និងជួរភ្នំបូកគោ បរិមាណទឹកភ្លៀងអាចនឹងកើនឡើងក្នុងកម្រិតមធ្យម និងមានខ្យល់បោកបក់ខ្លាំងជាមួយ នឹងបាតុភូតខ្យល់កន្រ្តាក់គ្រប់ដណ្តប់លើផ្ទៃដី៥០ភាគរយ រីឯរលកសមុទ្របោកបក់ខ្លាំងដែលមានកម្ពស់ពី ០,៥០ ម៉ែត្រដល់ ២,៥ ម៉ែត្រ។ ដោយឡែកតំបន់ខ្ពង់រាបដែលមានដូចជាកំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគីរី មណ្ឌលគិរី ជួរភ្នំដងរែក និងតំបន់ភ្នំក្រវាញ អាចមានភ្លៀងធ្លាក់ និងខ្យល់បោកបក់ខ្លាំងជាមួយនឹងបាតុភូតខ្យល់កន្រ្តាក់គ្របដណ្តប់លើផ្ទៃដី ៦៥ភាគរយឯណោះ ។ រីឯតំបន់វាលទំនាប ដែលមានខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង សៀមរាប កំពង់ធំ កំពង់ចាម ត្បូងឃ្មុំ ព្រៃវែង កណ្តាល តាកែវ ស្វាយរៀង ​និងរាជធានីភ្នំពេញ អាចមានមានភ្លៀងធ្លាក់ និងខ្យល់បោកបក់ខ្លាំងជាមួយនឹងបាតុភូតខ្យល់កន្រ្តាក់គ្របដណ្តប់លើផ្ទៃដី ២៥ភាគរយ។

ផ្អែកតាមស្ថានភាពនេះ ​សម្រាប់បងប្អូនប្រជាពលរដ្ឋដែលគ្រោងធ្វើដំណើរទៅតាមគោលដៅនានា គួរតែប្រុងប្រយ័ត្ន ហើយបន្តតាមដានដំណឹងបច្ចុប្បន្នភាពនៃការព្យាករអាកាសធាតុពីក្រសួង ពីព្រោះក្រសួងតែងបន្តតាមដានជាប្រចាំ ដើម្បីសុក្រឹតភាព។

តាមការរំពឹងទុក នៅក្នុងអំឡុងពេលឈប់សម្រាកបីថ្ងៃនេះ ខេត្តសៀមរាបអាចនឹងមានពលរដ្ឋទៅលេងកម្សាន្តច្រើន ដោយសារតែខេត្តបាននិងកំពុងតែរៀបចំព្រឹត្តិការណ៍ដ៏ធំមួយ ដូច្នេះក្រៅពីបញ្ហាអាកាសធាតុ និងការប្រុងប្រយ័ត្ននៅក្នុងការធ្វើដំណើរ ក៏គួរប្រុងប្រយ័ត្នរឿងការកកស្ទះចរាចរណ៍នៅទីនោះផងដែរ។តាមសេចក្តីជូនដំណឹងរបស់រដ្ឋបាលខេត្តសៀមរាបកាលពីថ្ងៃទី​៣១ ខែតុលា ថ្មីៗនេះ ខេត្តនឹងរៀបចំកម្មវិធីមួយចំនួន ដូចជាការជិះទូកកម្សាន្ត ការប្រណាំងទូកមិត្តភាព ការប្រគំតន្រ្តីស្គរដៃ ស្តង់ពិព័រណ៍ ប្រដាល់គុនខ្មែរ ល្ខោនបាសាក់ និង​កម្មវិធីកម្សាន្តផ្សេងៗជាច្រើនទៀត។

ប្រភពដដែលបានបន្ថែមថា ដើម្បីឱ្យកម្មវិធីដែលគ្រោងទុកដំណើរការដោយរលូន និងមានសុវត្ថិភាព អាជ្ញាធរនឹងបិទផ្លូវ ហើយរៀបចំកន្លែងចំណតមួយចំនួន ដូច្នេះអ្នកទៅលេងនៅខេត្តសៀមរាបគួរតែជ្រាប និង ស្វែងរកព័ត៌មានលម្អិតផងដែរ។

ក្រៅពីការសប្បាយរីករាយនៅក្នុងព្រឹត្តិការណ៍នេះ ក៏សូមកុំភ្លេចនឹកដល់សុខទុក្ខបណ្តាវីរកងទ័ពនៅតាមព្រំដែន​ ជាពិសេសគឺព្រំដែនថៃ​ ដែលនៅបន្តប្រចាំការ ដើម្បីការពារអធិបតេយ្យជាតិ និង​បូរណភាពទឹកដី​ បើទោះបីជាស្ថានភាពហាក់ប្រសើរហើយ ខណៈភាគីទំាងពីរបាននិងកំពុងតែអនុវត្តការកែសម្រួលអាវុធ និងយុទ្ធោបករណ៍បំផ្លិចបំផ្លាញធុនធ្ងន់ ចេញពីតំបន់ជម្លោះ សម្រាប់ដំណាក់កាលទី១។ ក្រោយការចុះហត្ថលេខាលើសេចក្តីថ្លែងការណ៍រួមកម្ពុជា និងថៃនៅទីក្រុងគូឡាឡាំពួ ស្ថានការណ៍ព្រំដែនហាក់កំពុងតែវិវឌ្ឍមករកភាពប្រសើរ ប៉ុន្តែបងប្អូនវីរកងទ័ពយើងនៅតែបន្តរក្សាភាពអង់អាច អនុវត្តភារកិច្ចតាមបទបញ្ជារបស់រាជរដ្ឋាភិបាលយ៉ាងម៉ឺងម៉ាត់។

សរុបទៅ ក្នុងឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកនេះ យើងខ្ញុំសូមជូនពរដល់បងប្អូនប្រជាពលរដ្ឋគ្រប់រូប ជាពិសេសបងប្អូនវីរកងទ័ពរបស់យើងទាំងអស់ សូមមានសុខភាពល្អបរិបូរណ៍ ទទួលបានសេចក្តីសុខ សុវត្ថិភាពក្នុងការធ្វើដំណើរទាំងទីជិតទីឆ្ងាយ និងសមប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

AKP