AKP ភ្នំពេញ ថ្ងៃទី០៣ ខែវិច្ឆិកា ឆ្នាំ២០២៥ -- រដ្ឋមន្ត្រីក្រសួងការពារជាតិឥណ្ឌូណេស៊ី លោក អេសចាហ្រ្វី អេសជែមសូអេដឌីន (Sjafrie Sjamsoeddin) បានបញ្ជាក់ថា ប្រទេសឥណ្ឌូណេស៊ីនឹងផលិតនាវាមុជទឹកស្វ័យប្រវត្តិ ឬគ្មានមនុស្សបើក (KSOT) ចំនួន ៣០គ្រឿង ដើម្បីការពារ«ចំណុចស្ទះ» នៅទូទាំងដែនទឹកឥណ្ឌូណេស៊ី។

ថ្លែងនៅកំពង់ផែបញ្ជាការកងនាវាចរឥណ្ឌូណេស៊ី II ក្នុងទីក្រុងស៊ូរ៉ាបាយ៉ា កាលពីពេលថ្មីៗនេះ លោក អេសចាហ្រ្វី បាននិយាយថា ផែនការនេះត្រូវបានធ្វើឡើងបន្ទាប់ពីការវាយតម្លៃបច្ចេកទេសជាមួយមេបញ្ជាការកងកម្លាំងប្រដាប់អាវុធជាតិ (TNI) នាយសេនាធិការកងទ័ពជើងទឹក និងនាយកក្រុមហ៊ុន PT PAL ដែលជាក្រុមហ៊ុនសាងសង់នាវា និងវិស្វកម្មរបស់រដ្ឋ។

ក្រសួងការពារជាតិបានរាយការណ៍ទៅប្រធានាធិបតីឥណ្ឌូណេស៊ីលោក ប្រាបូវ៉ូ ស៊ូប៊ីអាន់តូ (Prabowo Subianto) ដែលបានជំរុញឱ្យគម្រោងនេះទទួលបានជោគជ័យ។

នាវាមុជទឹកស្វ័យប្រវត្តិនេះមានទំហំតូច និងគ្មានមនុស្សបើកដំណើរការដោយម៉ូទ័រអគ្គីសនី ជាមួយនឹងប្រព័ន្ធរុករកដែលបច្ចុប្បន្នពឹងផ្អែកលើសញ្ញាអ៊ីនធឺណិត។

លោក អេសចាហ្រ្វី បាននិយាយថា តាមរយៈប្រតិបត្តិការនាវាមុជទឹកស្វ័យប្រវត្តិនេះ អត្ថប្រយោជន៍ជាច្រើនអាចសម្រេចបាន។ លោក​បាន​និយាយថា ប្រទេស​ឥណ្ឌូណេស៊ី​អាច​សម្រេចបាន​ប្រសិទ្ធភាព​ទាំង​បុគ្គលិកសម្ភារៈ និង​ពេលវេលា ដោយ​លោក​បាន​សង្កត់ធ្ងន់ថា វត្តមាន​នៃ​កង​នាវាមុជទឹក​គ្មាន​មនុស្ស​បើក​នៅក្នុង​កងទ័ពជើងទឹក​នឹង​បង្កើត​អត្ថប្រយោជន៍​ជា​យុទ្ធសាស្ត្រ​ថ្មី​សម្រាប់​ប្រទេស​ឥណ្ឌូណេស៊ី​ក្នុង​ការការពារ​ដែនទឹក​របស់ខ្លួន៕

ដោយ៖ យា ចិន្តាខន្តី (ប្រភព៖ VNA)