AKP បន្ទាយមានជ័យ ថ្ងៃទី០៣ ខែវិច្ឆិកា ឆ្នាំ២០២៥-- កម្លាំងនគរបាលខេត្តបន្ទាយមានជ័យ បានបន្តអនុវត្តយ៉ាងខ្ជាប់ខ្ជួនតាមគោលនយោបាយមនុស្សធម៌ និងយកចិត្តទុកដាក់របស់រាជរដ្ឋាភិបាលកម្ពុជា ដោយបានដឹកជញ្ជូនពលរដ្ឋខ្មែរចំនួន ៣៣ នាក់ ដែលវិលត្រឡប់ពីប្រទេសថៃ តាមច្រកអន្តរជាតិដូង ខេត្តបាត់ដំបង ទៅកាន់លំនៅឋានរបស់ពួកគាត់តាមបណ្តាខេត្តដោយសុវត្ថិភាព និងឥតគិតថ្លៃកាលពីថ្ងៃអាទិត្យ ទី០២ ខែវិច្ឆិកា ឆ្នាំ២០២៥នេះ។ សកម្មភាពនេះបានធ្វើឡើងក្រោមការដឹកនាំបញ្ជាដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងតាមការចាត់តាំងផ្ទាល់ពី លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ។

លោកឧត្តមសេនីយ៍ត្រី យ៉ត សុផល ស្នងការរងផែនការងារកិច្ចការប៉ុស្តិ៍បានដឹកនាំនគរបាលចំនួន១៥ នាក់ សហការជាមួយរដ្ឋបាលខេត្តបន្ទាយមានជ័យ និងស្ថាប័នពាក់ព័ន្ធចុះជួយសម្របសម្រួលដល់ការឆ្លងដែននៅ ច្រកអន្តរជាតិដូង ខេត្តបាត់ដំបងចាប់ពីម៉ោង៨៖០០ នាទីព្រឹក ដល់ម៉ោង ៤៖០០ នាទីល្ងាច ថ្ងៃទី០២ ខែវិច្ឆិកា ឆ្នាំ២០២៥ ពលរដ្ឋខ្មែរសរុបចំនួន ៣៣ នាក់ (ស្រី ១៨ នាក់) ដែលសម្រេចចិត្តវិលត្រឡប់មកកាន់ស្រុកកំណើត ដោយសារតែបញ្ហាលំបាកក្នុងការរស់នៅ និងធ្វើការងារនៅប្រទេសថៃ ត្រូវបានទទួល និងជួយសម្រួល។ 

កម្លាំងនគរបាលបានប្រើប្រាស់រថយន្តចំនួន០២គ្រឿង ដើម្បីដឹកជញ្ជូនបងប្អូនពលរដ្ឋទាំងនោះទៅកាន់ខេត្តគោលដៅរៀងៗខ្លួនមាន៖ ខេត្តបន្ទាយមានជ័យ ២៥ នាក់ ស្រី១៣នាក់ ខេត្តបាត់ដំបង ០៥ នាក់ស្រី ០៣ នាក់ ខេត្តឧត្តរមានជ័យ ០២ នាក់ស្រី ០១ នាក់ ខេត្តសៀមរាប  ០១ នាក់ស្រី ០១ នាក់ សរុប ចំនួន៣៣ នាក់ស្រី ១៨ នាក់។

លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានលើកឡើងថា កម្លាំងនគរបាលនឹងបន្តដឹកនាំកិច្ចសហការជាមួយអាជ្ញាធរខេត្តពាក់ព័ន្ធ ដើម្បីអនុវត្តតាមគោលនយោបាយយកចិត្តទុកដាក់របស់រាជរដ្ឋាភិបាល ក្នុងការចុះជួយសម្រួល និងដឹកជញ្ជូនពលរដ្ឋខ្មែរដែលនៅតែបន្តចាកចេញពីប្រទេសថៃ មកស្រុកកំណើតដោយលំបាក។

ពលរដ្ឋខ្មែរដែលបានវិលត្រឡប់មកពីប្រទេសថៃវិញបានសម្តែងចំណាប់អារម្មណ៍រំភើប និងក្ដីអំណរគុណយ៉ាងជ្រាលជ្រៅចំពោះរាជរដ្ឋាភិបាល អាជ្ញាធរ ក៏ដូចជាកងកម្លាំងនគរបាលទាំងអស់ ដែលបានជួយសម្រួល និងដឹកជញ្ជូនពួកគាត់ទៅដល់ផ្ទះសម្បែងដោយសុវត្ថិភាព ដោយមិនយកប្រាក់កម្រៃអ្វីឡើយ និងពុំខ្លាចនឿយហត់។ សកម្មភាពនេះបានឆ្លុះបញ្ចាំងយ៉ាងច្បាស់អំពីការយកចិត្តទុកដាក់ និងការគិតគូរខ្ពស់របស់រាជរដ្ឋាភិបាលកម្ពុជា ទៅលើសុខទុក្ខរបស់ប្រជាពលរដ្ឋគ្រប់រូប៕

ដោយ ឈុន សារ៉ាត