AKP កាតាថ្ងៃទី០២ ខែវិច្ឆិកា ឆ្នាំ ២០២៥–

ក្រសួងអប់រំ បើកកិច្ចប្រជុំលើកទី២ ដើម្បីពិនិត្យវឌ្ឍនភាពនៃការត្រៀមចូលរួមកិច្ចប្រជុំកំពូលពិភពលោកលើកទី២ សម្រាប់ការអភិវឌ្ឍសង្គម នៅទីក្រុងដូហា ប្រទេសកាតា។

ដើម្បីពិនិត្យវឌ្ឍនភាពនៃការត្រៀមចូលរួមកិច្ចប្រជុំកំពូលពិភពលោកលើកទី២ សម្រាប់ការអភិវឌ្ឍសង្គម នៅទីក្រុងដូហា ប្រទេសកាតា នៅថ្ងៃទី៤-៦ ខែវិច្ឆិកា ឆ្នាំ២០២៥ខាងមុខ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី០២ ខែវិច្ឆិកា ឆ្នាំ២០២៥ បានដឹកនាំកិច្ចប្រជុំមន្ត្រីក្រោមឱវាទជាលើកទី២ ដោយបានពិនិត្យពិភាក្សាបញ្ជាក់លម្អិតពីរបៀបវារៈ និងលំហូរនៃកិច្ចប្រជុំកំពូល ឯកសារត្រៀមសម្រាប់កិច្ចប្រជុំ សមាសភាពត្រូវចូលរួម និងបានពិភាក្សាផ្តល់ធាតុចូលសម្រាប់រៀបចំឯកសារត្រៀមបន្ថែមទៀត ដើម្បីឆ្លើយតបនឹងប្រធានបទសំខាន់ៗក្នុងកិច្ចប្រជុំកំពូលនេះ ដែលពាក់ព័ន្ធនឹងបរិបទកម្ពុជា ក្នុងនោះរួមមាន ការលុបបំបាត់ភាពក្រីក្រ បញ្ហាសន្តិសុខស្បៀង បម្រែបម្រួលអាកាសធាតុ សមភាពយេនឌ័រ និងការពង្រឹងអំណាចស្ត្រី ការធ្វើចំណាក ស្រុក ការរលើកកម្ពស់សមាហរណកម្មសង្គម ការទទួលបានសេវាសុខភាព និងអប់រំ ការដាក់បញ្ចូលគោលដៅអភិវឌ្ឍន៍សង្គមនៅក្នុងកម្មវិធីកែសម្រួលរចនាសម្ព័ន្ធ ការបែងចែកធនធានសម្រាប់ការអភិវឌ្ឍសង្គម និងប្រធានបទសំខាន់ៗជាច្រើនទៀត។

នាឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានក្រើនរំលឹកដល់ក្រុមការងារ សូមស្វែងយល់ឱ្យច្បាស់ពីរបៀបវារៈនៃកិច្ចប្រជុំនីមួយៗក្នុងឱកាសកិច្ចប្រជុំកំពូលពិភពលោកលើកទី២ សម្រាប់ការអភិវឌ្ឍសង្គមនេះ ដោយត្រូវកត់ត្រា និងប្រមូលខ្លឹមសារសំខាន់ៗឱ្យអស់ពីលទ្ធភាព ដើម្បីរៀបចំជារបាយការណ៍ឱ្យបានគ្រប់ជ្រុងជ្រោយ ដោយគូសបញ្ជាក់ពីសារៈសំខាន់នៃការយកចិត្តទុកដាក់ចូលរួមនូវរាល់កិច្ចប្រជុំនានាដែលពាក់ព័ន្ធនឹងកម្ពុជា ដើម្បីផ្សព្វផ្សាយឱ្យបានទូលំទូលាយពីវឌ្ឍនភាពនៃគោលនយោបាយរបស់រាជរដ្ឋាភិបាល និងការអភិវឌ្ឍរបស់កម្ពុជាលើឆាកអន្តរជាតិ។

គួរបញ្ជាក់ដែរថា ឯកឧត្តមបណ្ឌិតសភាចារ្យ ហង់ជួន ណារ៉ុន តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នឹងដឹកនាំគណៈប្រតិភូកម្ពុជាចូលរួមក្នុងកិច្ចប្រជុំកំពូលពិភពលោកលើកទី២ សម្រាប់ការអភិវឌ្ឍសង្គម ដែលប្រព្រឹត្តិទៅនៅទីក្រុងដូហា ប្រទេសកាតា នាថ្ងៃទី៤-៦ ខែវិច្ឆិកា ឆ្នាំ២០២៥ ខាងមុខនេះ ដែលអង្គប្រជុំនឹង៖ ១. ពិនិត្យឡើងវិញនូវវឌ្ឍនភាពនៅក្នុងការអនុវត្តចក្ខុវិស័យសេចក្តីប្រកាស Copenhagen ឆ្នាំ១៩៩៥ ស្តីពីការអភិវឌ្ឍសង្គម ដើម្បីជំរុញការអភិវឌ្ឍសង្គមប្រកបដោយបរិយាបន្ន។ ២. វាយតម្លៃគម្លាតអនុវត្តគោលដៅអភិវឌ្ឍន៍ប្រកបដោយចីរភាព ព្រមទាំងកំណត់ទិសដៅឆ្ពោះទៅមុខសំដៅពន្លឿនការអនុវត្តរបៀបវារៈឆ្នាំ២០៣០ សម្រាប់ការអភិវឌ្ឍប្រកបដោយចីរភាព និង ៣. ការប្រារព្ធខួបលើកទី៣០ នៃការដាក់ចេញនូវសេចក្តីប្រកាស Copenhagen កាលពីឆ្នាំ១៩៩៥៕

ដោយ៖ ចាន់ សុភឿន (ប្រភព៖ ក្រសួងអប់រំ)