AKPកំពង់ធំថ្ងៃទី០២ ខែវិច្ឆិកា ឆ្នាំ ២០២៥–

ឯកឧត្តម ថោ ជេដ្ឋា លើកទឹកចិត្តសិស្សានុសិស្សត្រូវខិតខំសិក្សារៀនសូត្រឱ្យបានចប់ជំនាញវិជ្ជាជីវៈឬមហាវិទ្យាល័យដើម្បីត្រឡប់មកជួយអភិវឌ្ឍមូលដ្ឋានខ្លួនវិញ។ 

ឯកឧត្តមថោ ជេដ្ឋារដ្ឋមន្ត្រីក្រសួងធនធានទឹកនិងឧតុនិយមប្រធានក្រុមការងារចុះមូលដ្ឋានស្រុកស្ទោងលើទឹកចិត្តដូច្នេះក្នុងឱកាសអញ្ជើញជាអធិបតីភាពក្នុងពិធីសំណេះសំណាលផ្ដល់រង្វាន់លើកទឹកចិត្តដល់សិស្សនិទ្ទេសAទាំង១៥នាក់របស់ស្រុកស្ទោងនិងបើកបវេសនកាលសិក្សាឆ្នាំថ្មីឆ្នាំ២០២៥-២០២៦ នៅវិទ្យាល័យរស្មីសោភ័ណស្រុកស្ទោងខេត្តកំពង់ធំកាលពីថ្ងៃទី០១ខែវិច្ឆិកាឆ្នាំ ២០២៥។

ឯកឧត្តមថោ ជេដ្ឋាក៍បានលើកទឹកចិត្តនិងជំរុញដល់មាតាបិតាអាណាព្យាបាលផ្ដល់ឱកាសសិក្សារៀនសូត្រឱ្យបុត្រធីតារបស់ខ្លួនបានពេញលេញ ហើយរៀនចប់មធ្យមសិក្សាទុតិយភូមិ បំណិនវិជ្ជាជីវៈឬមហាវិទ្យាល័យនានាដែលទៅថ្ងៃអនាគតនិងជួយលើកកម្ពស់សុខមាលភាពជីវភាពខ្លួនឯងនិងក្រុមគ្រួសារផងដែរ។ឯកឧត្តមបានណែនាំដល់លោកនាយក លោកគ្រូអ្នកគ្រូត្រូវមានផែនការច្បាស់លាស់ក្នុងការតម្រង់ទិសសិស្សានុសិស្សទៅតាមចំណង់ជំនាញនិងចំណូលចិត្តនៃការសិក្សារបស់ខ្លួនចាប់តាំងពីថ្នាក់មធ្យមសិក្សាបឋមភូមិ រហូតដល់ប្រឡងសញ្ញាប័ត្រមធ្យមសិក្សាទុតិយភូមិដើម្បីជាគ្រឹះដ៏រឹងមាំនិងជាការសម្រេចហើយឈានជើងចូលសាលាវិជ្ជាជីវៈឬមហាវិទ្យាល័យទៅតាមឧបនិស្ស័យនិងចំណង់ចំណូលចិត្ត ប្រកបដោយគុណភាព។

ឯកឧត្តមបានលើកទឹកចិត្តថែមទៀតដល់សិស្សានុសិស្ស ត្រូវខិតខំសិក្សារៀនសូត្រទាំងនៅសាលារៀននិងនៅតាមគេហដ្ឋានឱ្យអស់ពីលទ្ធភាព ជាពិសេសតាមប្រព័ន្ធឌីជីថលដើម្បីក្លាយខ្លួនជាសិស្សល្អ មិត្តល្អ ជាពលរដ្ឋថ្លៃថ្នូរនិងជាមូលធនមនុស្សជួយអភិវឌ្ឍប្រទេសជាតិទៅថ្ងៃអនាគតស្របតាមយុទ្ធសាស្ត្របច្ចកោណរបស់រាជរដ្ឋាភិបាលអាណត្តិទី៧ក្រោមការដឹកនាំដ៏ប៉ិនប្រសប់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ក្នុងនាមប្រធានក្រុមការងារចុះមូលដ្ឋានស្រុកស្ទោង ឯកឧត្តមថោ ជេដ្ឋាបានប្រកាសជួយកសាងនូវអគារសិក្សាថ្មី០១ខ្នងចំនួន៥បន្ទប់បន្ថែមទៀតជូនវិទ្យាល័យរស្មីសោភ័ណដើម្បីបំពេញតំរូវការដែលកំពុងខ្វះខាតបន្ទប់សម្រាប់សិស្សានុសិស្សសិក្សារៀនសូត្រប្រចាំថ្ងៃនិងជាការឆ្លើយតបទៅនឹងកំណើនសិស្សានុសិស្សផងដែរ។

ក្នុងឱកាសឯកឧត្តមថោ ជេដ្ឋារដ្ឋមន្ត្រីក្រសួងធនធានទឹកនិងឧតុនិយមនិងជាប្រធានក្រុមការងារចុះមូលដ្ឋានស្រុកស្ទោងបានផ្ដល់រង្វាន់ដល់សិស្សនិទ្ទេសAចំនួន១៥នាក់ ក្នុង១នាក់ទទួលបានកុំព្យូទ័រ Laptop១គ្រឿង និងថវិកា៤០ម៉ឺនរៀល។ជូនសិក្សាអនុសិស្សចំនួន២០១២នាក់ក្នុង១នាក់ទទួលបាន១ម៉ឺនរៀលជូនវិទ្យាល័យទាំងបួនក្នុងស្រុកស្ទោងក្នុង១វិទ្យាល័យទទួលបាននូវថវិកា២លានរៀលនិងបានឧបត្ថមវិទ្យាល័យរស្មីសោភ័ណ នូវតុកៅអីសិស្ស១០ឈុត កង្ហារភ្ជួរជញ្ជាំង១០គ្រឿង បាល់ទាត់និងបាល់បោះ២០គ្រាប់សៀវភៅសរសេរ១០០០ក្បាលប៊ិច២០០០ដើមនិងក្រដាសរ៉ាម១០កេសនិងជូនលោកគ្រូអ្នកគ្រូ វិទ្យាល័យរស្មីសោភ័ណ្ឌចំនួន៦២នាក់ម្នាក់ៗថវិកា៥ម៉ឺនរៀលផងដែរ៕

ដោយ៖ ស៊ុម វណ្ណា