AKP កំពង់ធំ ថ្ងៃទី០១  ខែវិច្ឆិកា ឆ្នាំ២០២៥ --

ឯកឧត្តម  ងួន រាសី សមាជិកអចិន្ត្រៃយ៍យុវជនគណបក្សថ្នាក់កណ្ដាល និងជាប្រធានគណបក្សយុវជនកម្ពុជាខេត្តកំពង់ធំ បានអញ្ជើញជាអធិបតីក្នុងពិធីសំណេះសំណាលជាមួយសមាជិកយុវជនគណបក្សប្រជាជនកម្ពុជានៅស្រុកស្ទោង និងស្រុកសន្ទុក ខេត្តកំពង់ធំ កាលពីថ្ងៃទី៣១ ខែតុលា ឆ្នាំ២០២៥ ដោយមានយុវជនគណបក្សប្រជាជនកម្ពុជាចូលរួមចំនួន ៤៤០នាក់។

ក្នុងឱកាសនោះ ឯកឧត្តម ងួន រាសី បានពាំនាំការផ្តាំផ្ញើសាកសួរសុខទុក្ខ និងសេចក្ដីនឹករលឹកពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អនុប្រធានគណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្ដាល និងឯកឧត្តម នួន ផារ័ត្ន អភិបាលខេត្ត និងជាប្រធានគណៈកម្មាធិការគណបក្សប្រជាជនកម្ពុជាខេត្តកំពង់ធំ។ឯ

កឧត្តម ងួន រាសី បានពិពណ៌នាសង្ខេបអំពីប្រវត្តិតួនាទី និងភារកិច្ចរបស់យុវជនគណបក្សថ្នាក់កណ្ដាល ដោយបានជំរុញឱ្យសមាជិកយុវជនមូលដ្ឋាននៅថ្នាក់ស្រុក និងឃុំរហូតដល់ភូមិត្រូវមានឆន្ទៈមោះម៉ុត និងភាពស្វាហាប់ប្ដេជ្ញាអនុវត្តគោលនយោបាយរបស់គណបក្ស និងសេចក្ដីសម្រេចចិត្តរបស់ថ្នាក់ដឹកនាំឱ្យទទួលបាមលទ្ធផលល្អ។

ឯកឧត្តមបានលើកទឹកចិត្តឱ្យយុវជនត្រូវមានភក្ដីភាពចំពោះគណបក្សសាមគ្គីភាព និងភាពអត់ធ្មត់ដើម្បីការពារ និងគាំទ្រថ្នាក់ដឹកនាំគណបក្សគ្រប់លំដាប់ថ្នាក់តាមរយៈការផ្សព្វផ្សាយព័ត៌មានពិត និងទប់ស្កាត់ព័ត៌មានក្លែងក្លាយនៅលើបណ្តាញសង្គម ព្រមទាំងបន្តអភិវឌ្ឍន៍សមត្ថភាពរបស់ខ្លួនជាប្រចាំ ជាពិសេសចំណេះដឹងផ្នែកឌីជីថលដើម្បីមានលទ្ធភាពឈានចូលទៅប្រកួតប្រជែងក្នុងក្របខ័ណ្ឌអន្តរជាតិ។

ឯកឧត្តមបានសង្កត់ធ្ងន់លើវឌ្ឍនភាពនៃសក្ដានុពលសេដ្ឋកិច្ចរបស់ខេត្ តជាពិសេសតាមរយៈការដាំដុះកសិឧស្សាហកម្មមានដំណាំស្វាយចន្ទី ដំណាំកៅស៊ូ និងដំឡូងមី ដែលបានបង្កើតការងារក្នុងស្រុកកាន់តែច្រើន  និងកាត់បន្ថយការធ្វើចំណាកស្រុកទៅក្រៅប្រទេស និងបានបង្ហាញអំពីការអភិវឌ្ឍហេដ្ឋារចនាសម្ព័ន្ធ សណ្តាប់ធ្នាប់សាធារណៈ អនាម័យ និងបរិស្ថានស្អាត ជាពិសេសការបំពាក់អំពូលសូឡាតាមបណ្តោយផ្លូវសាធារណៈ ដែលបានលើកម្ពស់សុខសុវត្ថិភាពប្រជាពលរដ្ឋនៅតាមទីជនបទ ដែលបានឆ្លុះបញ្ចាំងពីភាពប្រសើរឡើងឥតឈប់ឈររបស់ខេត្តកំពង់ធំ និងការចូលរួមរបស់សហគមន៍ក្នុងការអភិវឌ្ឍសង្គមប្រកបដោយចីរភាព៕

ដោយ: ស៊ុម វណ្ណា