AKP តាកែវ ថ្ងៃទី០១  ខែវិច្ឆិកា ឆ្នាំ២០២៥ --

កាលពីព្រឹកថ្ងៃសុក្រ ១០កើត ខែកត្តិក ឆ្នាំម្សាញ់សប្ដស័ក ព.ស២៥៦៩ ត្រូវនឹងថ្ងៃទី៣១ ខែតុលា ឆ្នាំ២០២៥ នៅសាលប្រជុំរដ្ឋបាលខេត្តតាកែវ បានរៀបចំបើកកិច្ចប្រជុំការប្រឡងប្រណាំងជ្រើសរើសការិយាល័យប្រជាពលរដ្ ឋនិងអង្គភាពច្រកចេញចូលតែមួយ រាជធានីខេត្តឆ្នើម ឆ្នាំ២០២៥។ អញ្ជើញជាអធិបតីក្នុងពិធីនោះដោយលោក លី សាវ៉េត អភិបាលរងនៃគណៈអភិបាលខេត្តតាកែវទទួលបន្ទុកការងារច្រកចេញចូលតែមួយនៃរដ្ឋបាលខេត្តតាកែវ ព្រមទាំងមានការអញ្ជើញចូលរួមពីលោក លោកស្រីប្រធាន អនុប្រធានមន្ទីរ អង្គភាពជុំវិញខេត្ត លោក លោកស្រីអភិបាល អភិបាលរងក្រុង-ស្រុក លោក លោកស្រីប្រធាន អនុប្រធានច្រកចេញចូលតែមួយខេត្ត-ក្រុង-ស្រុក មន្ត្រីរាជការ មេឃុំ-ចៅសង្កាត់ និងស្មៀនឃុំ-សង្កាត់ទាំង១០០ នៅទូទាំងខេត្តតាកែវចូលរួមផងដែរ។

មានប្រសាសន៍សំណេះសំណាលក្នុងពិធីនោះ លោក លី សាវ៉េត អភិបាលរងនៃគណៈអភិបាលខេត្តតាកែវ បានមានប្រសាសន៍ថា ការិយាល័យច្រកចេញចូលតែមួយនៅថ្នាក់ឃុំ-សង្កាត់ គឺជាកត្តាគន្លឹះដ៏សំខាន់សម្រាប់អនុវត្តគោលនយោបាយវិមជ្ឈការ និងវិសហមជ្ឈការរបស់រាជរដ្ឋាភិបាល។ ដូច្នេះ អាជ្ញាធរឃុំ-សង្កាត់ទាំងអស់ត្រូវតែយកចិត្តទុកដាក់រៀបចំការិយាល័យនេះឱ្យបានពេញលេញ និងដំណើរការប្រកបដោយប្រសិទ្ធភាព។ ការផ្ដល់សេវាសាធារណៈជូនប្រជាពលរដ្ឋប្រកបដោយតម្លាភាព គណនេយ្យភាព និងឆាប់រហ័សស្របតាមស្មារតីនៃកំណែទម្រង់រដ្ឋបាលសាធារណៈនេះជាការចាំបាច់ ដើម្បីឆ្លើយតបទៅនឹងតម្រូវការរបស់ប្រជាពលរដ្ឋក្នុងមូលដ្ឋាន និងលើកកម្ពស់ទំនុកចិត្តរបស់ពួកគាត់ ចំពោះរដ្ឋបាលថ្នាក់ក្រោមជាតិ។

លោក លី សាវ៉េត បានមានប្រសាសន៍បន្តថា ការរៀបចំឱ្យមានច្រកចេញចូលតែមួយគ្រប់ឃុំ-សង្កាត់ គឺមិនត្រឹមតែជួយសម្រួលដល់ការងាររបស់មន្ត្រីប៉ុណ្ណោះទេ ប៉ុន្តែវានឹងក្លាយជាចំណុចប្រមូលផ្ដុំ សេវារដ្ឋបាលសំខាន់ៗនៅកន្លែងតែមួយ ដែលធ្វើដូចនេះនឹងធ្វើឱ្យប្រជាពលរដ្ឋចំណេញពេលវេលា កាត់បន្ថយការចំណាយ និងទប់ស្កាត់បាននូវអំពើអសកម្មផ្សេងៗក្នុងការស្នើសុំសេវាសាធារណៈ។

លោកអភិបាលរងខេត្តតាកែវ លី សាវ៉េត បានមានប្រសាសន៍បន្ថែមថា គោលបំណងចម្បងនៃការបង្កើតយន្តការនេះ គឺដើម្បីលើកកម្ពស់ប្រសិទ្ធភាពនៃការផ្ដល់សេវារដ្ឋបាលស្របតាមគោលការណ៍ និងនីតិវិធីដែលមានលក្ខណៈសាមញ្ញ ឆាប់រហ័ស តម្លាភាព គណនេយ្យភាព ភាពជឿទុកចិត្ត និងគ្មានអំពើពុករលួយ។ ដូច្នេះ នៅតាមរដ្ឋបាលឃុំ-សង្កាត់ទាំងអស់ ត្រូវតែពិនិត្យឡើងវិញហើយរៀបចំឱ្យមានការិយាល័យច្រកចេញចូលតែមួយដោយមានមន្ត្រីប្រចាំការ និងប្រកាន់ខ្ជាប់នូវក្រមសីលធម៌វិជ្ជាជីវៈត្រឹមត្រូវ រង់ចាំផ្ដល់សេវាជូនបងប្អូនប្រជាពលរដ្ឋប្រកបដោយប្រសិទ្ធភាពនិងតម្លាភាព។ ជាមួយគ្នានេះដែរក៏ត្រូវរៀបចំអនាម័យបរិស្ថាន នៅជុំវិញសាលាឃុំ-សង្កាត់ឱ្យបានស្អាតល្អផងដែរ៕

ដោយ: អ៊ុច សៀង