AKP បន្ទាយមានជ័យ ថ្ងៃទី០១  ខែវិច្ឆិកា ឆ្នាំ២០២៥ --

ក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានបើកកិច្ចប្រជុំដ៏សំខាន់មួយកាលពីរសៀលថ្ងៃសុក្រ ទី៣១ ខែតុលា ឆ្នាំ២០២៥ ដើម្បីពិភាក្សា និងដាក់ចេញនូវវិធានការជាក់ស្ដែងលើកិច្ចអន្តរាគមន៍ដល់ប្រជាពលរដ្ឋដែលត្រឡប់មកពីចំណាកស្រុកឱ្យមានភាពរលូន និងទាន់ពេលវេលា ក្រោមអធិបតីភាព ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ។

កិច្ចប្រជុំនេះត្រូវបានប្រារព្ធធ្វើឡើងនៅសាលប្រជុំ-ក នៃសាលាខេត្តបន្ទាយមានជ័យ ដោយមានការអញ្ជើញចូលរួមយ៉ាងផុសផុលពីប្រតិភូអមដំណើរឯកឧត្ដមប្រធានក្រុមការងារ ឯកឧត្ដម ប្លែក វ៉ារី ប្រធានក្រុមប្រឹក្សាខេត្ត ឯកឧត្ដម អ៊ុ រាត្រី អភិបាលនៃគណៈអភិបាលខេត្ត ប្រធានក្រុមការងារចុះមូលដ្ឋានក្រុង-ស្រុកទាំង៩ ប្រធានក្រុមប្រឹក្សាក្រុង-ស្រុក និងអភិបាលក្រុង-ស្រុក មន្ទីរ អង្គភាពជុំវិញខេត្ត និងមេបញ្ជាការកងកម្លាំងប្រដាប់អាវុធទាំង ៣ប្រភេទ។

ក្នុងឱកាសនោះ ឯកឧត្ដម ឌិត ទីណា បានគូសបញ្ជាក់អំពីសារៈសំខាន់នៃការយកចិត្តទុកដាក់របស់រាជរដ្ឋាភិបាលនីតិកាលទី៧ ដែលមាន សម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ចំពោះសុខទុក្ខរបស់ប្រជាពលរដ្ឋដែលបានវិលត្រឡប់មកមាតុភូមិវិញ។

ឯកឧត្ដមបានសង្កត់ធ្ងន់ថា «ក្រុមការងារទាំងអស់ ត្រូវតែសហការគ្នាឱ្យបានម៉ត់ចត់បំផុត ទាំងថ្នាក់ខេត្ត ក្រុង ស្រុក និងមន្ទីរអង្គភាពពាក់ព័ន្ធ ត្រូវធ្វើកិច្ចអន្តរាគមន៍ឱ្យបានទូលំទូលាយតាមរយៈការរៀបចំទិន្នន័យពលរដ្ឋវិលត្រឡប់ឱ្យបានច្បាស់លាស់ ការផ្ដល់សេវារដ្ឋបាល ការណែនាំអំពីលទ្ធភាពការងារក្នុងស្រុក និងការពិនិត្យលទ្ធភាពផ្ដល់ការគាំទ្រផ្នែកកសិកម្ម ឬជំនាញវិជ្ជាជីវៈផ្សេងៗ ដើម្បីឱ្យពួកគាត់អាចតាំងលំនៅប្រកបមុខរបរនៅលើទឹកដីកំណើតវិញបានសមរម្យ»។

ឯកឧត្ដមក៏បានជំរុញឲ្យអាជ្ញាធរមូលដ្ឋានទាំងអស់បង្កើនការត្រួតពិនិត្យ និងដោះស្រាយរាល់បញ្ហាប្រឈមដែលពលរដ្ឋទើបត្រឡប់មកជួបប្រទះឱ្យបានឆាប់រហ័សបំផុត ដោយឈរលើស្មារតីបម្រើប្រជាពលរដ្ឋ។

ក្នុងកិច្ចប្រជុំនោះ ឯកឧត្ដម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានលើកឡើងអំពីកិច្ចការដែលរដ្ឋបាលខេត្តបាន និងកំពុងអនុវត្តដើម្បីឆ្លើយតបទៅនឹងស្ថានភាពពលរដ្ឋវិលត្រឡប់នេះ។

ឯកឧត្ដមអភិបាលខេត្តបានមានប្រសាសន៍គូសបញ្ជាក់ថា «ក្នុងនាមរដ្ឋបាលខេត្តបន្ទាយមានជ័យ យើងខ្ញុំសូមប្តេជ្ញាអនុវត្តតាមអនុសាសន៍ណែនាំដ៏ខ្ពង់ខ្ពស់របស់ឯកឧត្តមប្រធានក្រុមការងារចុះមូលដ្ឋានខេត្ត និងគោលការណ៍របស់រាជរដ្ឋាភិបាលឱ្យបានពេញលេញ។ អាជ្ញាធរពាក់ព័ន្ធទាំងអស់ក្នុងខេត្តបាន និងកំពុងត្រៀមខ្លួនរួចជាស្រេចក្នុងការជួយសម្របសម្រួលដល់បងប្អូនប្រជាពលរដ្ឋដែលវិលត្រឡប់មកពីចំណាកស្រុក ទាំងការផ្ដល់ជំនួយស្បៀង ការពិនិត្យលទ្ធភាពផ្ដល់ដីសម្បទានសង្គមកិច្ច (បើមានលក្ខខណ្ឌគ្រប់គ្រាន់) និងការភ្ជាប់ទំនាក់ទំនងជាមួយរោងចក្រសហគ្រាសនានាដើម្បីស្វែងរកការងារថ្មីជូនពួកគាត់ ក្នុងគោលបំណងធានាឱ្យពួកគាត់មានជីវភាពរស់នៅល្អប្រសើរឡើងវិញ»៕

ដោយ: ឈុន សារ៉ាត