AKP ភ្នំពេញ ថ្ងៃទី០១ ខែវិច្ឆិកា ឆ្នាំ២០២៥

អ្នកសារព័ត៌មានដែលតែងបង្កើនចំណេះដឹងតាមរយៈការចូលរៀនវគ្គបណ្តុះបណ្តាល យើងអាចនិយាយបានថា ជាធនធានមនុស្សថ្មីមួយនៅក្នុងបរិបទបច្ចេកវិទ្យាទំនើប នៅក្នុងវិស័យព័ត៌មាន។ ទាំងនេះបានសេចក្តីថាអ្នក សារព័ត៌មានបានបំពាក់នូវចំណេះដឹងថ្មី ជាអាវុធបំពាក់ខ្លួនឯងផង និងបំពាក់នូវចំណេះដឹងថ្មីនៃការងារ គ្រប់គ្រង និងប្រឆាំងព័ត៌មានក្លែងក្លាយ ។ នេះគឺជាការលើកឡើងរបស់ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មាន ក្នុងពិធីបិទសិក្ខាសាលាស្តីពីការផ្ទៀងផ្ទាត់ព័ត៌មានជាវីដេអូ និងការប្រើប្រាស់សញ្ញាសប្បនិម្មិត(AI)ក្នុងប្រព័ន្ធផ្សព្វផ្សាយនារសៀលថ្ងៃទី៣១ ខែតុលា ឆ្នាំ ២០២៥ នៅក្រសួងព័ត៌មាន។

ឯកឧត្តម នេត្រ ភក្រ្តា បានបញ្ជាក់ថា៖ «ការអភិវឌ្ឍន៍មូលធនមនុស្សដែលយើងនិយាយអំពីការអភិវឌ្ឍន៍មូលធនមនុស្ស ចឹងនៅក្នុងបរិបទប្រទេសកម្ពុជាយើងមុំទី១យុទ្ធសាស្រ្តបច្ចកោណគឺបាននិយាយអំពីមូលធនមនុស្ស។កាលណាគេនិយាយពីប្រទេសអភិវឌ្ឍន៍គឺត្រូវតែរឹងមាំគ្រប់វិស័យទាំងអស់។យើងមិនអាចចោលវិស័យណាមួយបានទេ ហើយវិស័យទាំងអស់នេះគឺជាមូលដ្ឋានគ្រឹះ ដើម្បីគាំទ្រទៅលើការអភិវឌ្ឍន៍ជាតិ»។ ឯកឧត្តមរដ្ឋមន្រ្តីបានលើកទឹកចិត្តឱ្យអ្នកសារព័ត៌មានបង្កើនចំណេះដឹងរបស់ខ្លួន បង្កើននូវស្នាដៃរបស់យើង ដើម្បីឱ្យអ្វីដែលយើងបានធ្វើហើយនោះវាសមមូល ឬវាស៊ីជាមួយការអភិវឌ្ឍន៍សង្គម ។ ឯកឧត្តលើកឡើងថា៖ «បើសិនអ្នកសារព័ត៌មានមិនពង្រឹងនូវសមត្ថភាពទេ នោះនឹងដើរមិនទាន់យុគសម័យថ្មីបានឡើយ។ ចំណេះដឹងទាំងនេះអ្នកសារព័ត៌មាននឹងជួយដល់អ្នកផ្សេងៗទៀតជាពិសេសអ្នកដែលទទួលព័ត៌មានពីអ្នកសារព័ត៌មានយើងទាំងអស់គ្នា»។

ជាមួយគ្នានេះ ឯកឧត្តមរដ្ឋមន្រ្តីបានថ្លែងបញ្ជាក់ដោយប្រៀបធៀបជាមួយព័ត៌មានក្លែងក្លាយ និងព័ត៌មានពិត ហើយជាមួយគ្នានេះក៏បានលើកទឹកចិត្តឱ្យអ្នកសារព័ត៌មាន ចូលរួមទប់ស្កាត់ និងឆ្លើយតបចំពោះព័ត៌មានក្លែងក្លាយណាមួយដែលខ្លួនបានដឹង ទាំងក្នុងរូបភាពជាព័ត៌មាន ទាំងជាលក្ខណៈរូបភាព ដើម្បីចូលរួមប្រយុទ្ធប្រឆាំងព័ត៌មានក្លែងក្លាយ ជាមួយក្រសួងព័ត៌មាន។

ឯកឧត្តម នេត្រ ភក្រ្តា បានមានប្រសាសន៍ថាបន្ថែមថា៖ «យើងត្រូវរៀនរស់ជាមួយព័ត៌មានក្លែងក្លាយ។យើងមិនអាចទប់ស្កាត់ព័ត៌មានក្លែងក្លាយទាំងស្រុងបានទេ ហើយបើចង់ទប់ស្កាត់ព័ត៌មានទាំងនេះបានចាំបាច់ណាស់យើងត្រូវបណ្តុះបណ្តាល គឺជាមួយចាំបាច់បំផុត។ វិធានការមួយក្នុងការបណ្តុះបណ្តាលដល់អ្នកសារព័ត៌មានជារឿងចាំបាច់បំផុត មួយទៀតគឺការផ្តល់នូវអក្ខរកម្ម ប្រព័ន្ធផ្សព្វផ្សាយព័ត៌មានដល់ប្រជាពលរដ្ឋ។ព្រមជាមួយគ្នាអ្វីដែលសំខាន់គឺចូលរួមទាំងអស់គ្នាមិនចាំបាច់តែស្ថាប័នពាក់ព័ន្ធចេញមកបំភ្លឺតែម្នាក់នោះទេ។ បងប្អូនយើងដឹងថាព័ត៌មាននោះក្លែងក្លាយ ហើយអាចចេញមកបញ្ជាក់អ្វីដែលជាការពិតជាក់ស្តែងបានដោយយើងអាចចូលរួមជាមួយរដ្ឋាភិបាល ជាមួយក្រសួងព័ត៌មានបាន»។

បើតាមឯកឧត្តម ឆាយ សុផល រដ្ឋលេខាធិការ ក្រសួងព័ត៌មានបានថ្លែងបញ្ជាក់ថា ក្នុងនាមជាអ្នកសារព័ត៌មានអាជីពការចុះផ្សាយអ្វីមួយត្រូវផ្ទៀងផ្ទាត់ឱ្យបានហ្មត់ចត់ ចៀសវាងកំហុសឆ្គង ដែលខុសប្លែកពីអ្នកសារព័ត៌មានមិនមែនជាអាជីព។ ឯកឧត្តមរដ្ឋលេខាធិការបន្តថា សិក្ខាកាមដែលបានចូលរៀនវគ្គបណ្តុះបណ្តាលគ្រប់រូបត្រូវចេះផ្ទៀងផ្ទាត់ព័ត៌មានជាវីដេអូ និងការប្រើប្រាស់សញ្ញាសប្បនិម្មិតក្នុងប្រព័ន្ធផ្សព្វផ្សាយឱ្យបានត្រឹមត្រូវដើម្បីឱ្យការផ្សព្វផ្សាយប្រកបដោយគុណភាព ចៀសវាងកំហុសឆ្គងណាមួយ។

ឯកឧត្តមបានឱ្យដឹងទៀតថា ក្នុងនេះអ្នកសារព័ត៌មានក៏មានការប្រយ័ត្នប្រយែងក្នុងការប្រើប្រាស់សញ្ញាសម្បនិម្មិត និងត្រូវគិតពីតម្លាភាពរបស់សញ្ញាសម្បនិម្មិតផងដែរ។

សម្រាប់សិក្ខាសាលាស្ដីពីការផ្ទៀងផ្ទាត់ព័ត៌មានជាវីដេអូ និងការប្រើប្រាស់បញ្ញាសប្បនិម្មិត( AI )ក្នុងប្រព័ន្ធផ្សព្វផ្សាយ រៀបចំឡើងដោយក្រសួងព័ត៌មាន ក្រោមកិច្ចសហការគាំទ្រពីក្រុមហ៊ុន Viory ។សិក្ខាសាលានេះធ្វើឡើងរយៈពេល ២ថ្ងៃ ចាប់ពីថ្ងៃទី៣០ ដល់ថ្ងៃទី៣១ ខែតុលា ឆ្នាំ២០២៥ ក្នុងគោលបំណង ចែករំលែកបទពិសោធន៍និងចំណេះដឹងអំពីការកែសម្រួលព័ត៌មានប្រកបដោយគុណភាព ការវិភាគវីដេអូនិងការកំណត់ទីតាំងភូមិសាស្ត្រ ការផ្ទៀងផ្ទាត់ ព័ត៌មានជាមួយនឹងបច្ចេកវិទ្យាបញ្ញាសប្បនិម្មិត (AI) ការត្រួតពិនិត្យទិន្នន័យ Metadata និងពាក្យគន្លឹះ ការស្វែងរកព័ត៌មានតាមបណ្តាទំនាក់ទំនងសង្គម និងការប្រើប្រាស់ AI language models ប្រកបដោយ ប្រសិទ្ធភាព។

សូមជម្រាបជូនថា សិក្ខាកាមដែលអញ្ជើញចូលរួមក្នុងសិក្ខាសាលាសរុបចំនួន ៥០នាក់ មកពី អគ្គនាយកដ្ឋានទូរទស្សន៍ជាតិកម្ពុជា ៦នាក់ អគ្គនាយកដ្ឋានវិទ្យុជាតិកម្ពុជា ៦នាក់ អគ្គនាយកដ្ឋានទីភ្នាក់ងារសារព័ត៌មានកម្ពុជា ៦នាក់ អគ្គនាយយដ្ឋានព័ត៌មាន និងសោតទស្សន៍ ៦នាក់ អគ្គនាយយដ្ឋានរដ្ឋបាល និងហិរញ្ញវត្ថុ នៃក្រសួងព័ត៌មាន ចំនួន៦នាក់ និងអង្គភាពសារព័ត៌មានឯកជន ២០អង្គភាពចំនួន ២០នាក់ ៕

ដោយ៖មករា រួបថត៖ សិរី ឧត្តម