‎AKP ព្រះសីហនុ ថ្ងៃទី៣១ ខែតុលា ឆ្នាំ២០២៥-- ‎លោក តឹក ជីវ៉ាយ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះសីហនុ និងលោកស្រី ហែម ផល្លា ប្រធានការិយាល័យផលិតកម្ម និងបសុព្យាបាល  ‎ថ្ងៃសុក្រ ទី៣១ ខែតុលា ឆ្នាំ២០២៥ បានដឹកនាំមន្ត្រីជំនាញដោយមានការសហការជាមួយអាជ្ញាធរឃុំ ភូមិ មន្ត្រីកសិកម្មឃុំ និងភ្នាក់ងារសុខភាពសត្វភូមិ ចុះចាក់ថ្នាំការពារជំងឺសារទឹក គោ ក្របី ជូនប្រជាពលរដ្ឋនៅឃុំទឹកល្អក់ ស្រុកព្រៃនប់ ខេត្តព្រះសីហនុ។

លោក តឹក នជីវ៉ាយ បានបញ្ជាក់ថា ជារៀងរាល់ឆ្នាំមន្ទីរកសិកម្មតែងតែជូនដំណឹងដល់ប្រជាពលរដ្ឋនៅតាមភូមិ ឃុំ នៅក្នុងស្រុកព្រៃនប់ និងស្រុកកំពង់សិលា ដើម្បីឱ្យពួកគាត់យកគោ ក្របីរបស់ខ្លួនមកចាក់ថ្នាំបង្ការជំងឺសាទឹក អុចក្តាមជារៀងរាល់ឆ្នាំ ហើយចំពោះលទ្ធផលការចុះចាក់ថ្នាំជំងឺសារទឹកនៅថ្ងៃទី៣១ ខែតុលា មន្ត្រីនៃមន្ទីរកសិកម្មសម្រេចចាក់ថ្នាំការពារជំងឺសាទឹក គោ ក្របី សរុបចំនួន២៨២ក្បាល ក្នុងនោះ គោមានចំនួន២២៧ក្បាល ក្របីសរុបចំនួន៥៥ក្បាល។

ក្រៅពីការចាប់ថ្នាំការពារជំងឺសារទឹក គោ ក្របី មន្ត្រីមន្ទីរកសិកម្ម ក៏បានផ្តល់ថ្នាំព្យាបាល វ៉ាក់សាំង និងសម្ភារបរិក្ខាបសុពេទ្យមួយចំនួនទៅដល់ភ្នាក់ងារសុខភាពសត្វភូមិ ដើម្បីឱ្យពួកកាត់ចាក់បន្ត និងណែនាំដល់ម្ចាស់សត្វឱ្យថែទាំសត្វរបស់ខ្លួនឱ្យបានល្អ ត្រូវសម្អាតទ្រុង ឬក្រោលឪ្យបានស្អាត ផ្តល់ទឹកស្អាត និងចំណីគ្រប់គ្រាន់ ប្រសិនបើគោ ក្របីអស់ លោក លោកស្រីមានជំងឺ សូមមកប្រឹក្សាជាមួយភ្នាក់ងារពេទ្យសត្វភូមិ ឃុំ ឬអាចរាយការណ៍មកមន្ទីរកសិកម្ម ដើម្បីមន្ត្រីបច្ចេកទេសរបស់យើងនឹងចុះអន្តរាគមន៍បានទាន់ពេលវេលា៕

ដោយ ងូ សុមុនី