‎AKP បន្ទាយមានជ័យ ថ្ងៃទី៣១ ខែតុលា ឆ្នាំ២០២៥-- ឯកឧត្ដម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររដ្ឋាភិបាលចុះមូលដ្ឋានខេត្តបន្ទាយមានជ័យ នៅព្រឹកថ្ងៃសុក្រ ទី៣១ ខែតុលា ឆ្នាំ២០២៥ បានអញ្ជើញជួបសំណេះសំណាល និងចែករង្វាន់លើកទឹកចិត្តដ៏មានតម្លៃដល់សិស្សានុសិស្សដែលប្រឡងជាប់និទ្ទេស A ទាំង១២៦នាក់ ក្នុងការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នៅទូទាំងខេត្តបន្ទាយមានជ័យ។

ពិធីដ៏មានសារៈសំខាន់នេះត្រូវបានប្រារព្ធធ្វើឡើងនៅសាលប្រជុំធំសាលាខេត្តបន្ទាយមានជ័យ ដោយមានការអញ្ជើញចូលរួមពីប្រតិភូអមដំណើរ ឯកឧត្ដម ប្លែក វ៉ារី ប្រធានក្រុមប្រឹក្សាខេត្ត ឯកឧត្ដម អ៊ុ រាត្រី អភិបាលនៃគណៈអភិបាលខេត្ត ឯកឧត្ដម លោកជំទាវ សមាជិករដ្ឋសភា-ព្រឹទ្ធសភា មេបញ្ជាការកងកម្លាំងទាំងបី អភិបាលក្រុង-ស្រុក មន្ទីរ អង្គភាព ស្ថាប័នពាក់ព័ន្ធ, ព្រមទាំងអាណាព្យាបាលសិស្សទាំងអស់។

មានប្រសាសន៍ក្នុងឱកាសនោះ ឯកឧត្ដម ឌិត ទីណា បានសម្តែងក្តីសោមនស្សរីករាយ និងបានកោតសរសើរយ៉ាងខ្លាំងចំពោះកិច្ចខិតខំប្រឹងប្រែងរបស់សិស្សានុសិស្សទាំងអស់ រហូតទទួលបានលទ្ធផលដ៏ត្រចះត្រចង់នេះ។ ឯកឧត្តមបានគូសបញ្ជាក់អំពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ក្នុងការជំរុញការលើកកម្ពស់គុណភាពអប់រំ នៅកម្ពុជាឱ្យកាន់តែប្រសើរឡើង ស្របទៅនឹងការអភិវឌ្ឍសង្គមជាតិ។

ឯកឧត្ដមរដ្ឋមន្ត្រីក៏បានក្រើនរំលឹកដល់សិស្សានុសិស្សទាំងអស់ត្រូវបន្តឆន្ទៈសិក្សាឱ្យបានខ្ពង់ខ្ពស់ជាងនេះតទៅទៀត ដោយត្រូវចាប់យកការសិក្សាជំនាញបច្ចេកទេស ដែលមានតម្រូវការទីផ្សារការងារខ្ពស់ និងជាពិសេសលើវិស័យសំខាន់ៗដូចជា កសិកម្ម បច្ចេកវិទ្យា វិស្វកម្ម ជាដើម ដើម្បីក្លាយជាធនធានមនុស្សប្រកបដោយគុណភាព និងជាសសរស្ដម្ភសម្រាប់កសាងប្រទេសជាតិនៅពេលអនាគត។

ឯកឧត្ដម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានស្វាគមន៍ និងការអរគុណយ៉ាងជ្រាលជ្រៅចំពោះវត្តមានដ៏ខ្ពង់ខ្ពស់របស់ឯកឧត្ដម ឌិត ទីណា និងប្រតិភូអមដំណើរទាំងអស់ ព្រមទាំងបានបង្ហាញមោទនភាពយ៉ាងក្រៃលែង ដែលខេត្តបន្ទាយមានជ័យមានកូនចៅជាសិស្សឆ្នើមរហូតដល់១២៦នាក់ ដែលជាសក្ខីភាពបញ្ជាក់ពីការរីកចម្រើននៃវិស័យអប់រំ នៅក្នុងខេត្ត ក៏ដូចជាការយកចិត្តទុកដាក់របស់អាជ្ញាធរខេត្ត រួមជាមួយលោកគ្រូ អ្នកគ្រូ និងអាណាព្យាបាលទាំងអស់។

ឯកឧត្ដម អ៊ុ រាត្រី ក៏បានផ្តាំផ្ញើដល់សិស្សនិទ្ទេសAទាំងអស់ សូមប្រើប្រាស់អំណោយដែលបានផ្តល់ជូននេះ ឱ្យមានប្រយោជន៍ខ្ពស់ក្នុងការស្រាវជ្រាវ និងបន្តការសិក្សា ដើម្បីសម្រេចបាននូវគោលដៅជីវិត និងរួមចំណែកអភិវឌ្ឍន៍មូលដ្ឋានខេត្តឱ្យកាន់តែសម្បូរសប្បាយ។

សូមបញ្ជាក់ថា សិស្សានុសិស្សជ័យលាភីដែលជាប់និទ្ទេស A ទាំង១២៦ នាក់ បានទទួលនូវអំណោយលើកទឹកចិត្តរួមមាន កុំព្យូទ័រយួរដៃ (Laptop) ទំនើប ចំនួន ០១ គ្រឿង សម្រាប់សិស្សម្នាក់ៗនិងថវិកាឧបត្ថម្ភលើកទឹកចិត្តមួយចំនួន៕

ដោយ ឈុន សារ៉ាត