AKP តូរ៉ុនតូថ្ងៃទី៣១ ខែតុលា ឆ្នាំ ២០២៥ – មន្ត្រីជាន់ខ្ពស់ក្រុមប្រឹក្សាអភិវឌ្ឍន៍កម្ពុជា ជំរុញអ្នកវិនិយោគកាណាដាមកស្វែងយល់បន្ថែមអំពីសក្តានុពលវិនិយោគនៅកម្ពុជា ពិសេស ក្នុងវិស័យកសិ-ឧស្សហកម្ម, ឧស្សហកម្មកែច្នៃចំណីអាហារ ,ឧស្សាហកម្មបច្ចេកវិទ្យា, ឧស្សាហកម្មយានយន្ត, និងការអភិវឌ្ឍន៍ហេដ្ឋារចនាសម្ព័ន្ធ។

ក្នុងឱកាសដឹកនាំគណៈប្រតិភូកម្ពុជាបំពេញបេសកកម្មទាក់ទាញ និងជំរុញវិនិយោគនៅក្នុងប្រទេសកាណាដា ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអញ្ជើញជួបសម្តែងការគួរសម និងពិភាក្សាការងារជាមួយ លោក Khawar Nasim នាយកប្រតិបត្តិនៃស្ថាប័ន Invest Ontario ទទួលបន្ទុកទាក់ទាញការវិនិយោគមកកាន់ខេត្តអុនតារីយ៉ូ និង លោក Bernie Derible   ជំនួយការអនុរដ្ឋមន្ត្រីផ្នែកកសិកម្ម អ្នកប្រឹក្សាយោបល់ពិសេស និងជាភ្នាក់ងារទូទៅរបស់ខេត្តអុនតារីយ៉ូ សម្រាប់អាស៊ាន ដោយមានការចូលរួមពី ថ្នាក់ដឹកនាំក្រសួងពាណិជ្ជកម្ម, ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍, សមាគមឧកញ៉ាកម្ពុជា, និងស្ថានកុងស៊ុលកិត្តិយសនៃព្រះរាជាណាចក្រកម្ពុជា ប្រចាំទីក្រុងអុនតារីយ៉ូ ។

ជំនួបនារសៀលនេះ បានរៀបចំឡើងក្នុងគោលបំណងដើម្បីពង្រឹងកិច្ចសហប្រតិបត្តិការសេដ្ឋកិច្ច ការវិនិយោគ និងកសិកម្មរវាងកម្ពុជា និងខេត្តអុនតារីយ៉ូ ដែលជាខេត្តមានសក្តានុពលសេដ្ឋកិច្ចធំជាងគេនៅកាណាដា។

ចំពោះផ្នែកវិនិយោគ និងពាណិជ្ជកម្ម ឯកឧត្តមឧបនាយករដ្ឋមន្ត្រីបានជម្រាបជូនអំពី ច្បាប់វិនិយោគថ្មីរបស់កម្ពុជា ក៏ដូចជាកិច្ចខិតខំប្រឹងប្រែងរបស់រាជរដ្ឋាភិបាលក្នុងការកែទម្រង់បរិយាកាសធុរកិច្ច និងហេដ្ឋារចនាសម្ព័ន្ធដឹកជញ្ជូន។ ឯកឧត្តម បានលើកទឹកចិត្តស្ថាប័ន Invest Ontario ឱ្យជំរុញអ្នកវិនិយោគកាណាដាមកស្វែងយល់បន្ថែមអំពីសក្តានុពលវិនិយោគនៅកម្ពុជា ពិសេស ក្នុងវិស័យកសិ-ឧស្សហកម្ម, ឧស្សហកម្មកែច្នៃចំណីអាហារ ,ឧស្សាហកម្មបច្ចេកវិទ្យា, ឧស្សាហកម្មយានយន្ត, និងការអភិវឌ្ឍន៍ហេដ្ឋារចនាសម្ព័ន្ធ ជាដើម។

ជាមួយគ្នានោះ លោក Khawar Nasim បានបង្ហាញការចាប់អារម្មណ៍យ៉ាងខ្លាំងចំពោះសក្តានុពលរីកចម្រើនរបស់កម្ពុជា និងបានចែករំលែកបទពិសោធន៍របស់ស្ថាប័ន Invest Ontario ក្នុងការផ្តល់ការគាំទ្រដល់ក្រុមហ៊ុនវិនិយោគអន្តរជាតិ។

ដោយឡែក ចំពោះផ្នែកកសិកម្ម និងទំនាក់ទំនងនៅក្នុងសហគមន៍ អាស៊ាន (ASEAN) លោក Bernie Derible  បានគូសបញ្ជាក់ពីតួនាទីរបស់ខេត្តអុនតារីយ៉ូក្នុងការលើកកម្ពស់ស្តង់ដារកសិកម្ម និងសុវត្ថិភាពចំណីអាហារ និងបានពិភាក្សាអំពីលទ្ធភាពនៃកិច្ចសហប្រតិបត្តិការបច្ចេកទេសលើវិស័យកសិកម្ម ការចិញ្ចឹមសត្វ និងការកែច្នៃលទ្ធផលកសិកម្ម ព្រមទាំងការសម្របសម្រួលពាណិជ្ជកម្មរវាងកម្ពុជា និងទីផ្សារកាណាដា/អាស៊ាន ផងដែរ។

ជំនួបពិភាក្សាការងារនេះបានប្រព្រឹត្តទៅដោយជោគជ័យ និងបានបង្កើតជាមូលដ្ឋានគ្រឹះដ៏ល្អសម្រាប់ការពង្រីកទំនាក់ទំនងសេដ្ឋកិច្ច និងវិនិយោគរវាងកម្ពុជា និងខេត្តអុនតារីយ៉ូ។ ភាគីទាំងពីរបានប្តេជ្ញាបន្តការទំនាក់ទំនង និងសម្របសម្រួល ដើម្បីប្រែក្លាយឱកាសសក្តានុពលទៅជាគម្រោងវិនិយោគជាក់ស្តែងនាពេលអនាគត៕

ដោយ៖ ចរិយា ប្រភព៖ CDC