AKP ភ្នំពេញ ថ្ងៃទី៣១ ខែតុលា ឆ្នាំ២០២៥--

ឯកឧត្តម វ៉េង រិទ្ធីស័ក្កិ អនុរដ្ឋលេខាធិការ ក្រសួងសង្គមកិច្ច អតីតយុទ្ធជន យុវជន និងយវនិតិសប្បទា នៅថ្ងៃទី៣០ ខែតុលា ឆ្នាំ២០២៥ បានដឹកនាំ បើកសិក្ខាសាលាស្ដីពីនិតិវិធីក្នុងការជំរុញ និងពង្រឹងសមាគមមនុស្សចាស់ឃុំ សង្កាត់ ទាំង១៣ក្រុង ស្រុក ក្នុងខេត្តសៀមរាបនៅសាលប្រជុំសាលាខេត្តសៀមរាប។

ឯកឧត្តម វ៉េង រិទ្ធីស័ក្កិ បានលើកឡើងថា សិក្ខាសាលាសម្រេចលទ្ធផលចំនួន៥៖ ទី១. សមាគមមនុស្សចាស់ឃុំសង្កាត់បានយល់ដឹងពីចំណុចខ្លាំង និងខ្សោយរបស់ខ្លួនបន្ទាប់ពីទទួលបានការចែករំលែកនូវនិតិវិធីក្នុងការរៀបចំសមាគមមនុស្សចាស់ពីមន្ត្រីជំនាញ និងសមាគមដែលមានដំណើរការល្អ ទី២. សមាគមមនុស្សចាស់ ឃុំ សង្កាត់ បានយល់ជ្រួតជ្រាបពីនីតិវិធីក្នុងការរៀបចំរចនាសម័្ពន្ធគណៈកម្មការសមាគមមនុស្សចាស់បានច្បាស់លាស់ ទី៣. ការប្តេជ្ញាចិត្តខ្ពស់ពីអភិបាលរងខេត្ត អភិបាលរងក្រុង ស្រុក ក្នុងការជំរុញលើកទឹកចិត្តបន្ថែមដើម្បីឱ្យសមាគមមនុស្សចាស់ឃុំ សង្កាត់ មានដំណើរការរលូន និងនិរន្តរភាព ទី៤. ការតាំងចិត្តខ្ពស់ពីមេឃុំ ចៅសង្កាត់ និងប្រធានសមាគមដើម្បីបន្តស្វះស្វែងខ្ពស់ក្នុងការពង្រឹងសមាគមរបស់ខ្លួនឡើងវិញ និងទី៥. បានបញ្រ្ជាបការយល់ដឹងដល់សមាជិក សមាជិកា ដែលជាគណៈកម្មាធិការជាតិកម្ពុជាដើម្បីមនុស្សចាស់។

ក្នុងសិក្ខាសាលាក៏មានការចូលរួមពីឯកឧត្តម នាក់ ណារ៉ែន អភិបាលរងនៃគណៈអភិបាលខេត្តសៀមរាប លោក គង់ សំអឿន ប្រធានមន្ទីរស.អ.យ. ខេត្តសៀមរាប អភិបាល អភិបាលរងក្រុង ស្រុក លោក លោកស្រីក្រុមប្រឹក្សាឃុំ សង្កាត់  ប្រធានសមាគមមនុស្សចាស់ឃុំ សង្កាត់ នៃក្រុង ស្រុកទាំង១៣ និងក្រុមការងារនៃនាយកដ្ឋានមនុស្សចាស់ និងអតីតយុទ្ធជន មានចំនួនសរុប ១៧០នាក់៕

ដោយ ណយ នឿន (ប្រភព៖ ក្រសួងសង្គមកិច្ច)