AKP បន្ទាយមានជ័យ ថ្ងៃទី៣០ ខែតុលា ឆ្នាំ២០២៥-- មន្ត្រីរដ្ឋបាលខេត្ត ក្រុង ស្រុក និងឃុំ សង្កាត់ ចំនួន៤៨ នាក់ ដែលមកពីខេត្តបន្ទាយមានជ័យ និងខេត្តព្រះវិហារ រួមទាំងក្រុមការងារគម្រោងអាហារូបត្ថម្ភថ្នាក់ជាតិ ជំនួយការឃុំ និងស្មៀនឃុំ បានចូលរួមវគ្គបណ្តុះបណ្តាលរំលឹកឡើងវិញដ៏សំខាន់មួយ ស្តីពី "ការគ្រប់គ្រងហិរញ្ញវត្ថុមូលនិធិគាំទ្រការផ្តល់សេវាថ្នាក់ឃុំ សង្កាត់" ដោយវគ្គបណ្តុះបណ្តាលនេះធ្វើឡើងក្នុងគោលបំណងពង្រឹងសមត្ថភាពរបស់មន្ត្រីទាំងអស់ ដើម្បីបម្រើការងារប្រកបដោយប្រសិទ្ធភាព និងតម្លាភាព។

ថ្លែងក្នុងពិធីបើកវគ្គបណ្តុះបណ្តាលនាព្រឹកថ្ងៃទី៣០ ខែតុលា ឆ្នាំ២០២៥ នៅសាលាខេត្តបន្ទាយមានជ័យ លោកស្រី រស់ សុផានី អភិបាលរងខេត្តបន្ទាយមានជ័យ បានសម្តែងការស្វាគមន៍ និងគូសបញ្ជាក់ពីសារៈសំខាន់នៃវគ្គនេះ។ លោកស្រីបានលើកឡើងថា វគ្គបណ្តុះបណ្តាលនេះមានសារៈសំខាន់ណាស់ក្នុងការ ពង្រឹងសមត្ថភាពរបស់រដ្ឋបាលថ្នាក់ក្រោមជាតិ ជាពិសេសរដ្ឋបាលឃុំ សង្កាត់ ក្នុងការគ្រប់គ្រង និងប្រើប្រាស់មូលនិធិគាំទ្រការផ្តល់សេវាប្រកបដោយ តម្លាភាព គណនេយ្យភាព និងប្រសិទ្ធភាព។ មូលនិធិនេះដើរតួនាទីយ៉ាងសំខាន់ក្នុងការ លើកកម្ពស់គុណភាពនៃការផ្តល់សេវាសាធារណៈនៅមូលដ្ឋាន ដែលឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ ជាពិសេសលើវិស័យអាហារូបត្ថម្ភ និងសុខភាព។

លោកស្រីក៏បានជំរុញឱ្យសិក្ខាកាមទាំងអស់ខិតខំយកចិត្តទុកដាក់សិក្សារៀនសូត្រ និងផ្លាស់ប្តូរបទពិសោធន៍គ្នាទៅវិញទៅមក ដើម្បីអនុវត្តការងារបានត្រឹមត្រូវស្របតាមគោលការណ៍ណែនាំ និងនីតិវិធីហិរញ្ញវត្ថុដែលបានកំណត់។

ជាមួយគ្នានោះដែរ លោក ជៀប សំអាន ទីប្រឹក្សាគ្រប់គ្រងថ្នាក់ជាតិ បានសម្តែងការកោតសរសើរចំពោះកិច្ចខិតខំប្រឹងប្រែងរបស់អាជ្ញាធរខេត្តបន្ទាយមានជ័យ និងខេត្តព្រះវិហារ ក្នុងការអនុវត្តគម្រោង និងបានផ្តល់នូវទស្សនៈបន្ថែមទៅលើវិស័យហិរញ្ញវត្ថុ ផ្តោតលើការពង្រឹងការអនុវត្តនីតិវិធីការប្រើប្រាស់ហិរញ្ញវត្ថុត្រឹមត្រូវ ដោយលោកបានសង្កត់ធ្ងន់លើតម្រូវការនៃការប្រើប្រាស់ហិរញ្ញវត្ថុឱ្យបានត្រឹមត្រូវតាមក្បួនខ្នាត ដោយផ្អែកលើឯកសារយោង និងសេចក្តីណែនាំរបស់គម្រោង ដើម្បីធានាថាថវិកាបានទៅដល់គោលដៅ និងផ្តល់ផលប្រយោជន៍ដល់ប្រជាពលរដ្ឋពិតប្រាកដ ជំរុញឱ្យមានការរៀបចំរបាយការណ៍ហិរញ្ញវត្ថុឱ្យបានច្បាស់លាស់ ទាន់ពេលវេលា និងពេញលេញ ដើម្បីឆ្លុះបញ្ចាំងពីតម្លាភាព និងគណនេយ្យភាពក្នុងការប្រើប្រាស់មូលនិធិ។

លោកបានអំពាវនាវឱ្យមានការសហការល្អ រវាងថ្នាក់ខេត្ត ក្រុង ស្រុក និងឃុំ សង្កាត់ ព្រមទាំងក្រុមការងារគម្រោង ដើម្បីដោះស្រាយបញ្ហាប្រឈមនានាដែលកើតឡើងក្នុងការគ្រប់គ្រងហិរញ្ញវត្ថុ។

សូមបញ្ជាក់ថា ក្នុងនាមជាម្ចាស់ផ្ទះ ខេត្តបន្ទាយមានជ័យសង្ឃឹមយ៉ាងមុតមាំថា សិក្ខាកាមទាំងអស់នឹងទទួលបានចំណេះដឹង និងជំនាញថ្មីៗ ដើម្បីយកទៅអនុវត្តការងារឲ្យមានប្រសិទ្ធភាពខ្ពស់ ក្នុងការចូលរួមចំណែកអភិវឌ្ឍន៍មូលដ្ឋាន និងលើកកម្ពស់ជីវភាពប្រជាពលរដ្ឋឱ្យកាន់តែប្រសើរឡើង៕

ដោយ ឈុន សារ៉ាត