AKP ភ្នំពេញ ថ្ងៃទី៣០ ខែតុលា ឆ្នាំ២០២៥ -- យោងតាមការចុះផ្សាយរបស់ទីភ្នាក់ងារសារព័ត៌មានផ្លូវការ SUNA បានឱ្យដឹងថា ប្រទេសស៊ូដង់កាលពីថ្ងៃអង្គារបានប្រកាសថា មន្ត្រីជាន់ខ្ពស់ចំនួន ២រូបនៃកម្មវិធីស្បៀងអាហារពិភពលោករបស់អង្គការសហប្រជាជាតិ (WFP) ជាបុគ្គលមិនគួរឱ្យស្វាគមន៍ ហើយបានបញ្ជាឱ្យពួកគេចាកចេញពីប្រទេសនេះក្នុងរយៈពេល ៧២ម៉ោង។

យោងតាមការចុះផ្សាយរបស់ទីភ្នាក់ងារ SUNA បានឱ្យដឹងថា ក្រសួងការបរទេសបានកោះហៅ លោក ឡរេន ប៊ូកេរ៉ា (Laurent Bukera) នាយកប្រចាំប្រទេសរបស់កម្មវិធី WFP ដើម្បីជម្រាបលោកថា ទាំងលោក និងប្រធានប្រតិបត្តិការរបស់អង្គការ WFP គឺលោកស្រី សាម៉ាន់ថា ចាត់តារ៉ាច់ (Samantha Chattaraj) ត្រូវបានប្រកាសថាមិនស្វាគមន៍។

ក្រសួងបាននិយាយថា រដ្ឋាភិបាលនៅតែប្តេជ្ញាចិត្តយ៉ាងពេញទំហឹងក្នុងការសហការជាមួយអង្គការសកល «ស្របតាមច្បាប់ និងច្បាប់ដែលទទួលស្គាល់ជាអន្តរជាតិ រួមទាំងការគោរពអធិបតេយ្យភាពរបស់រដ្ឋ»។

អង្គការ WFP បានដំណើរការនៅក្នុងប្រទេសស៊ូដង់អស់រយៈពេលជាច្រើនទសវត្សរ៍មកហើយ ហើយជាអង្គការមនុស្សធម៌ឈានមុខគេដែលផ្តល់ជំនួយស្បៀងអាហារដល់មនុស្សរាប់លាននាក់ដែលរងផលប៉ះពាល់ដោយជម្លោះ និងគ្រោះមហន្តរាយនៅទូទាំងប្រទេស។

នៅក្នុងព្រឹត្តិការណ៍ដាច់ដោយឡែកមួយ ក្រុមប្រទេសមនុស្សធម៌ប្រតិបត្តិការនៅក្នុងប្រទេសស៊ូដង់ និងសម្ព័ន្ធអារ៉ាប់ (AL) បានថ្កោលទោសអំពីអំពើហិង្សាដែលកំពុងកើនឡើងនៅទីក្រុងអេលហ្វាស័រ ក្នុងតំបន់ដារហ្វ័រភាគខាងលិចប្រទេសស៊ូដង់ ខណៈដែលជនស៊ីវិលរាប់សិបនាក់នៅទីក្រុងអេលហ្វាស័រត្រូវបានគេរាយការណ៍ថាត្រូវបានសម្លាប់ដោយកងកម្លាំងគាំទ្ររហ័ស (RSF) បន្ទាប់ពីខ្លួនអះអាងថាបានដណ្តើមយកទីក្រុងនេះកាលពីថ្ងៃអាទិត្យ។

ក្រុមប្រទេសមនុស្សធម៌ប្រតិបត្តិការបាននិយាយនៅក្នុងសេចក្តីថ្លែងការណ៍មួយថា «ការចូលទៅកាន់ទីក្រុងអេលហ្វាស័រ នៅតែមានការរឹតត្បិតយ៉ាងខ្លាំង ហើយសមត្ថភាពក្នុងការឆ្លើយតបកំពុងថយចុះយ៉ាងឆាប់រហ័ស ខណៈពេលដែលតម្រូវការកំពុងកើនឡើង»។

សង្គ្រាមរវាងកងកម្លាំងប្រដាប់អាវុធស៊ូដង់ (SAF) និងកងកម្លាំង RSF ដែលឥឡូវនេះស្ថិតនៅក្នុងឆ្នាំទី៣ បានសម្លាប់មនុស្សរាប់ម៉ឺននាក់ ធ្វើឱ្យមនុស្សរាប់លាននាក់ផ្លាស់ទីលំនៅ និងបានធ្វើឱ្យប្រទេសភាគច្រើនស្ថិតនៅលើគែមនៃគ្រោះទុរ្ភិក្ស៕

ដោយ៖ មូល មិនា (ប្រភព៖ ស៊ីនហួ)