AKP ភ្នំពេញ ថ្ងៃទី៣០ ខែតុលា ឆ្នាំ២០២៥ -- សេវាសន្តិសុខជាតិអ៊ីរ៉ាក់(INSS) បានប្រកាសកាលពីថ្ងៃអង្គារ អំពីការចាប់ខ្លួនភ្នាក់ងាររដ្ឋអ៊ីស្លាម (IS) ម្នាក់នៅក្នុងរដ្ឋធានីបាកដាដរបស់ប្រទេសអ៊ីរ៉ាក់ ដែលជាប់ពាក់ព័ន្ធនឹងការវាយប្រហារប្រដាប់អាវុធដ៏សាហាវជាច្រើនលើកច្រើនសារដែលផ្តោតលើកងកម្លាំងសន្តិសុខ។

យោងតាមសេវាសន្តិសុខ ​​INSS បានឱ្យដឹងថា ការស៊ើបអង្កេតដំបូងបានកំណត់អត្តសញ្ញាណជនសង្ស័យដោយមានឈ្មោះក្លែងក្លាយ អាប៊ូ ម៉ូហាមមេដ (Abu Mohammed)។ លោកបានចូលរួមជាមួយក្រុម IS ក្នុងឆ្នាំ២០១៤ ហើយបានចូលរួមក្នុងការវាយប្រហារប្រដាប់អាវុធជាច្រើនលើកច្រើនសារដែលផ្តោតលើកងកម្លាំងសន្តិសុខនៅក្នុងតំបន់ Latifiya ដែលស្ថិតនៅភាគខាងត្បូងនៃទីក្រុងបាកដាដ នាំឱ្យមានការសម្លាប់កងកម្លាំងសន្តិសុខចំនួន ១៩នាក់ រួមទាំងមន្ត្រីយោធាម្នាក់ផងដែរ។

របាយការណ៍ស៊ើបការណ៍សម្ងាត់បានបង្ហាញថា ជនសង្ស័យរូបនេះមានតួនាទីផ្នែកភស្តុភារ និងរដ្ឋបាលនៅក្នុងតំបន់មួយដែលក្រុម IS ស្គាល់ថាជា «តំបន់ Zobaa និងតំបន់ Fallujah» ភាគខាងលិចនៃទីក្រុងបាកដាដ។

បន្ទាប់ពីក្រុម IS ត្រូវបានរុះរើភាគច្រើននៅក្នុងប្រទេសអ៊ីរ៉ាក់ លោកបានភៀសខ្លួនទៅកាន់ប្រទេសស៊ីរីមុនពេលវិលត្រឡប់ទៅទីក្រុងបាកដាដដោយសម្ងាត់ ជាកន្លែងដែលលោកត្រូវបានតាមដាន និងចាប់ខ្លួនដោយសេវាសន្តិសុខ INSS នៅពេលក្រោយ។

សេចក្តីថ្លែងការណ៍បានបន្ថែមថា ជនសង្ស័យរូបនេះត្រូវបានប្រគល់ឱ្យអាជ្ញាធរយុត្តិធម៌សម្រាប់ដំណើរការផ្លូវច្បាប់។ ខណៈពេលដែលប្រទេសអ៊ីរ៉ាក់បានប្រកាសជ័យជម្នះលើក្រុម IS ក្នុងឆ្នាំ២០១៧ សំណល់នៃក្រុមនេះនៅតែបន្តធ្វើការវាយប្រហារប្រឆាំងនឹងកងកម្លាំងសន្តិសុខ និងជនស៊ីវិលនៅក្នុងទីក្រុង តំបន់វាលខ្សាច់ និងតំបន់ដាច់ស្រយាល៕

ដោយ៖ មូល មិនា (ប្រភព៖ ស៊ីនហួ)