AKP ភ្នំពេញ ថ្ងៃទី២៩ ខែតុលា ឆ្នាំ២០២៥-- នាយកដ្ឋានតម្រង់ទិសវិជ្ជាជីវៈ នៅថ្ងៃទី២៨ ខែតុលា ឆ្នាំ២០២៥ បានរៀបចំកិច្ចប្រជុំពិភាក្សាស្ដីពី «ការត្រៀមអនុវត្តគន្លងអប់រំថ្មី នៅកម្រិតមធ្យមសិក្សាទុតិយភូមិ ឆ្នាំសិក្សា២០២៥-២០២៦» នៅវិទ្យាល័យចំណេះទូទៅនិងបច្ចេកទេសហ៊ុនសែនជម្ពូវ័ន ក្រោមអធិបតីភាព ឯកឧត្តមបណ្ឌិត ហុង គឹមជាង អនុរដ្ឋលេខាធិការ ក្រសួងអប់រំ យុវជន និងកីឡា ដោយមានការចូលរួមពីសំណាក់តំណាងមន្ទីរអប់រំ យុវជន និងកីឡារាជធានី-ខេត្តពាក់ព័ន្ធ ថ្នាក់ដឹកនាំនិងបុគ្គលិកអប់រំនៃនាយកដ្ឋានតម្រង់ទិសវិជ្ជាជីវៈ និងគណៈគ្រប់គ្រងនៃគ្រឹះស្ថានមធ្យមសិក្សាអនុវត្តគន្លងវិជ្ជាជីវៈ សរុប២៥នាក់។

ក្នុងឱកាសនោះ ឯកឧត្តមបណ្ឌិតអនុរដ្ឋលេខាធិការបានមានមតិសំណេះសំណាល ជម្រាបជូនសមាជិកសមាជិកាអំពីគោលបំណងនៃកិច្ចប្រជុំ និងលើកឡើងអំពីសារបាននៃការពិនិត្យរៀបចំឡើងវិញនូវគន្លងអប់រំថ្មី នៅកម្រិតមធ្យមសិក្សាទុតិយភូមិ និងការត្រៀមលក្ខណៈអនុវត្តសាកល្បងនៅតាមគ្រឹះស្ថានសិក្សាគោលដៅចំនួន៤៩។ 

បន្ទាប់មក លោក រ័ត្ន សារ៉ា ប្រធាននាយកដ្ឋានតម្រង់ទិសវិជ្ជាជីវៈ បានធ្វើបទបង្ហាញអំពីយន្ដការអនុវត្តគន្លងអប់រំថ្មី នៅកម្រិតមធ្យមសិក្សាទុតិយភូមិ ជូនតំណាងមន្ទីរអប់រំ យុវជន និងកីឡារាជធានី-ខេត្តពាក់ព័ន្ធ និងគណៈគ្រប់គ្រងនៃគ្រឹះស្ថានមធ្យមសិក្សាអនុវត្តគន្លងវិជ្ជាជីវៈ ឱ្យបានយល់ដឹងនិងត្រៀមលក្ខណៈសម្បត្តិអនុវត្តគន្លងអប់រំថ្មី នាពេលខាងមុខ។ 

អង្គប្រជុំបានបើកកិច្ចពិភាក្សាអំពីយន្ដការ ក្នុងការអនុវត្តគន្លងអប់រំថ្មី ជាពិសេសការអនុវត្តគន្លងវិជ្ជាជីវៈ ដោយផ្ដោតសំខាន់លើការរៀបចំសេវាបង្រៀននិងរៀនប្រចាំសប្ដាហ៍។ បន្ទាប់មក កិច្ចប្រជុំបានចាប់ផ្ដើមពិភាក្សារៀបចំផែនការកម្រិតសាលារៀន ឆ្ពោះទៅការអនុវត្តគន្លងអប់រំថ្មី នៅកម្រិតមធ្យមសិក្សាទុតិយភូមិ នាពេលខាងមុខ។

គួរបញ្ជាក់ផងដែរថា ក្នុងឆ្នាំសិក្សា២០២៥-២០២៦ ខាងមុខនេះ ក្រសួងអប់រំ យុវជន និងកីឡា នឹងដាក់ឱ្យអនុវត្តគន្លងអប់រំថ្មី នៅកម្រិតមធ្យមសិក្សាទុតិយភូមិ (ថ្នាក់ទី១០-១២) ដើម្បីបើកច្រកដល់អ្នកសិក្សាឱ្យមានជម្រើសកាន់តែច្រើន ក្នុងការសម្រេចចិត្តរៀបចំផែនការសិក្សា ជ្រើសរើសផ្លូវសិក្សា និងផែនការអាជីព សមស្របតាមលក្ខណៈសម្បត្តិផ្ទាល់ខ្លួន ឧបនិស្ស័យ សមត្ថភាពពីកំណើត និងចំណូលចិត្តរបស់បុគ្គលម្នាក់ៗ ក្នុងន័យសម្រួចការកសាងមូលធនមនុស្សកម្ពុជាឱ្យក្លាយជាកម្លាំងពលកម្មស្នូលរបស់ប្រទេសជាតិ៕

ដោយ ណយ នឿន (ប្រភព៖ នាយកដ្ឋានតម្រង់ទិសវិជ្ជាជីវៈ)