AKPកំពង់ធំថ្ងៃទី២៩ ខែតុលាឆ្នាំ២០២៥--ឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំកាលពីថ្ងៃទី២៨ខែតុលាឆ្នាំ២០២៥បានដឹកនាំកិច្ចប្រជុំបូកសរុបលទ្ធផលការងារប្រចាំខែ តុលា ឆ្នាំ២០២៥និងលើកទិសដៅអនុវត្តបន្តសម្រាប់ខែ វិច្ឆិកានៅសាលប្រជុំស្នងការដ្ឋាននគរបាលខេត្ត ។

ជាកិច្ចចាប់ផ្ដើមលោកឧត្តមសេនីយ៍ទោ ហេង សុផលស្នងការនគរបាលខេត្តបានថ្លែងសោកស្តាយចំពោះការបាត់បង់យុទ្ធមិត្តម្នាក់ក្នុងជួរកងកម្លាំងនគរបាលជាតិ នៃស្នងការដ្ឋាននគរបាលខេត្តកំពង់ធំក្នុងកិច្ចប្រតិបត្តិការបង្ក្រាបករណីជួញដូរគ្រឿងញៀន នៅភូមិសាស្ត្រ ស្រុកតាំងគោកកាលពីពេលថ្មីៗកន្លងទៅនេះគឺលោកវរសេនីយ៍ទោ ហួន សាវ័យ នាយរងការិយាល័យប្រឆាំងគ្រឿងញៀននិងមន្ត្រីនគរបាលម្នាក់ទៀតរបួសធ្ងន់ កំពុងសម្រាកព្យាបាលជំងឺនៅមន្ទីរពេទ្យនិងបានថ្លែងអំណរគុណដល់កងកម្លាំងនគរបាល គ្រប់លំដាប់ថ្នាក់ទូទាំងខេត្ត ដែលបានលះបង់កម្លាំងកាយចិត្ត ធនធាន សម្ភារៈ ថវិកា ចូលរួមចំណែកបំពេញភារកិច្ច ដែលថ្នាក់ដឹកនាំប្រគល់ជូន អនុវត្តរហូតទទួលបានលទ្ធផលល្អប្រសើរជាបន្តបន្ទាប់។

ឧត្តមសេនីយ៍ ស្នងការបានក្រើនរំលឹកដល់ថ្នាក់ដឹកនាំ ផែនការងារជំនាញនិងអធិការនគរបាលក្រុង-ស្រុកត្រូវរៀបចំផែនការសកម្មភាពជាត្រីវិស័យសម្រាប់អនុវត្ត បែងចែកប្រគល់ភារកិច្ច ដល់មន្ត្រីគ្រប់ៗរូប តាមឋានានុក្រម។ត្រូវពង្រឹងរបៀបរបបការងារ របស់ផែនជំនាញអធិការដ្ឋាននគរបាលក្រុង-ស្រុក និងប៉ុស្តិ៍នគរបាលរដ្ឋបាល អនុវត្តតួនាទី ភារកិច្ច តាមសេចក្តីប្រកាស របស់ក្រសួងមហាផ្ទៃ និងសេចក្តីណែនាំ របស់អគ្គស្នងការដ្ឋាននគរបាលជាតិ។ប្រជុំត្រួតពិនិត្យលើការអនុវត្ត តួនាទី ភារកិច្ច នាពេលកន្លងមក ដកបទពិសោធន៍ ផ្លាស់ប្ដូរយោបល់លើកទិសដៅការងារសម្រាប់អនុវត្តបន្ត ដើម្បីឈានទៅសម្រេចបានស្នាដៃ ជោគជ័យថ្មីៗ បន្ថែមទៀត ស្របតាមតម្រូវការ របស់ថ្នាក់ដឹកនាំក្រសួងមហាផ្ទៃ និងអគ្គស្នងការដ្ឋាននគរបាលជាតិ ជាពិសេសក្នុងការអនុវត្តគោលនយោបាយ"ភូមិ-ឃុំ-សង្កាត់មានសុវត្ថិភាព"។

ដោយឡែកប៉ុស្តិ៍នគរបាលរដ្ឋបាល ដែលខ្វះកម្លាំង ត្រូវបញ្ចុះកម្លាំង ពីអធិការដ្ឋាននគរបាលក្រុង-ស្រុក តាមការកំណត់រយៈពេលវែង ឬខ្លី ដើម្បីជួយទ្រោលសភាពការណ៍ រក្សាសន្តិសុខ សុវត្ថិភាពសណ្តាប់ធ្នាប់សាធារណៈនិងត្រៀមកិច្ចអន្តរាគមន៍ដល់ប្រជាពលរដ្ឋ នាគ្រាជួយការលំបាក៕

ដោយ៖ ស៊ុម វណ្ណា