AKPកំពង់ធំ ថ្ងៃទី២៩ ខែតុលា ឆ្នាំ២០២៥---ឯកឧត្តម ចាន់ យុត្ថា រដ្ឋលេខាធិការក្រសួងធនធានទឹកនិងឧតុនិយមបានលើកទឹកចិត្តដល់ម្ចាស់គ្រឿងឥស្សរយសថ្ងៃនេះត្រូវបង្កើនគុណភាពសិទ្ធភាពការងារថែមទៀតដើម្បីទទួលបានមេដៃមាសទៅថ្ងៃក្រោយ។

ឯកឧត្តមលើកឡើងដូច្នេះនៅក្នុងឱកាសអញ្ជើញជាតំណាងឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹកនិងឧតុនិយម និងជាប្រធានក្រុមការងារចុះមូលដ្ឋានស្រុកស្ទោងជួបសំណេះសំណាលនិងបំពាក់គ្រឿងឥស្សរៈយសជូនមន្ត្រីរាជការចំណុះឱ្យរដ្ឋបាលស្រុកស្ទោងកាលពីថ្ងៃទី២៨ខែតុលាឆ្នាំ២០២៥។

ឯកឧត្តមចាន់ យុត្ថាបានបញ្ជាក់ថាការបំពាក់មេដាយការងារ(សំរិទ្ធ)នៅក្នុងថ្ងៃនេះគឺជាការឆ្លុះបញ្ចាំងអំពីការអនុវត្តកិច្ចការកន្លងមករបស់មន្ត្រីប្រកបដោយ គុណភាពប្រសិទ្ធភាពទំនួលខុសត្រូវ។ឯកឧត្តមបានកោតសរសើរនិងអបអរសាទរដល់ម្ចាស់គ្រឿងឥស្សរៈយសទាំងអស់ដែលទទួលបាននូវការលើកទឹកចិត្តនិងឧបត្ថម្ភគាំទ្រពីថ្នាក់ដឹកនាំអង្គភាពជាពិសេសពីលោកសាយ គឹមឡម អភិបាលស្រុកស្ទោងដែលបានស្នើ និងបំពាក់គ្រឿងឥស្សរយសជូននៅក្នុងឱកាសដ៏វិសេសវិសាលនេះ។

ឯកឧត្តមចាន់ យុត្ថាបានជំរុញដល់មន្ត្រីរាជការគ្រប់រូបត្រូវខិតខំប្រឹងប្រែងអនុវត្តកិច្ចការរបស់ខ្លួនតាមតួនាទីភារកិច្ចប្រកបដោយគុណភាពប្រសិទ្ធភាពដើម្បីឆ្លើយតបទៅនឹងតម្រូវការឬការផ្ដល់សេវាជូនប្រជាពលរដ្ឋប្រកបដោយទំនួលខុសត្រូវនិងដល់ជណ្ដើមផ្ទះដែលស្របតាមយុទ្ធសាស្ត្របញ្ចោកោណរបស់រាជរដ្ឋាភិបាលអាណត្តិទី៧ក្រោមការដឹកនាំដ៏ឈ្លាសវៃបំផុតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ឯកឧត្តម ចាន់ យុត្ថាបានបញ្ជាក់ថាកំណែទម្រង់រដ្ឋបាលសាធារណៈ:និងការវិភាគមុខងារពិតជាមានសារ: សំខាន់ក្នុងការប្រើប្រាស់នូវមូលធនមនុស្សនិងការចំណាយថវិកាចំគោលដៅសន្សំសំចៃ មានប្រសិទ្ធិភាព។ឯកឧត្តមបានណែនាំដល់មន្ត្រីរាជការក្នុងរដ្ឋបាលស្រុកស្ទោងលោកគ្រូអ្នកគ្រូ ត្រូវបង្កើនសមត្ថភាពប្រកបដោយនាវានុវត្តន៍ស្របតាមយុគ្គសម័យឌីជីថលត្រូវខិតខំអភិវឌ្ឍសមត្ថភាពក៏ដូចជាគុណវុឌ្ឍិឱ្យបានជាប់ជាប្រចាំស្របតាមយុកសម័យឌីជីថល និងសម័យបច្ចេកវិទ្យាទំនើបថ្មីៗដែលកំពុងតែអនុវត្តនិងប្រើប្រាស់នៅក្នុងប្រព័ន្ធការងារប្រចាំថ្ងៃនិងបានជំរុញដល់រដ្ឋបាលស្រុកស្ទោងត្រូវរួបរួមសហការគ្នា រក្សាសាមគ្គីភាពផ្ទៃក្នុងឱ្យបានល្អប្រសើរបំផុត និងត្រូវដាក់មន្ត្រីឱ្យអនុវត្តការងារប្រកបដោយគុណភាពសិទ្ធិតាមបំណិនវិជ្ជាជីវៈ ឯកទេស តួនាទីភារកិច្ចដើម្បីតាមដានត្រួតពិនិត្យ វាយតម្លៃ និងការណែនាំឱ្យជាប់ជាប្រចាំដើម្បីធានានូវគុណភាពការងារល្អប្រសើរឡើងថែមទៀត។ 

ទន្ទឹមនឹងនេះឯកឧត្តមចាន់ យុត្ថាបានសម្ដែងការគាំទ្រយ៉ាងពេញទំហឹងបំផុតដល់កិច្ចព្រមព្រៀងសន្តិភាពជាមួយថៃ ដែលបានកើតឡើងដោយភាពអត់ធ្មត់របស់សម្ដេចមហាបបវរអធិបតី ហ៊ុន ម៉ាណែត ក្នុងការរក្សានូវសុខសន្តិភាពជូនប្រទេសជាតិនិងបានសម្ដែងនូវការដឹងគុណក្រៃលែងបំផុតដល់វីរកងទ័ពជួរមុខដែលបានពលីសាច់ស្រស់ឈាមស្រស់ និងបូជាកម្លាំងកាយចិត្តដើម្បីសន្តិភាពជាតិមាតុភូមិនិងព្រះមហាក្សត្រ៕

ដោយ៖ ស៊ុម វណ្ណា