AKP ភ្នំពេញ ថ្ងៃទី២៨ ខែតុលា ឆ្នាំ២០២៥ -- យោងតាមការចុះផ្សាយរបស់ទីភ្នាក់ងារសារព័ត៌មានជាតិដែលគ្រប់គ្រងដោយរដ្ឋរបស់ប្រទេស បានឱ្យដឹងថា មនុស្ស ៤នាក់ត្រូវបានសម្លាប់ និង ២នាក់ទៀតរងរបួសនៅក្នុងការវាយប្រហារតាមអាកាសដាច់ដោយឡែកពីគ្នារបស់អ៊ីស្រាអែលនៅភាគខាងត្បូងប្រទេសលីបង់កាលពីថ្ងៃអាទិត្យ។

ទីភ្នាក់ងារនេះបាននិយាយថា យន្តហោះគ្មានមនុស្សបើក និងយន្តហោះចម្បាំងរបស់អ៊ីស្រាអែលបានកំណត់គោលដៅលើយានយន្តជាច្រើននៅក្នុងតំបន់ភាគខាងត្បូង និងភាគខាងកើតរបស់ប្រទេសលីបង់។

ទន្ទឹមនឹងនេះ ប្រភពសន្តិសុខបានប្រាប់សារព័ត៌មាន Xinhua ថា អ្នកស្លាប់ ៣នាក់ជាសមាជិកក្រុមហេសបូឡាហ៍ និងអ្នកស្លាប់ទី៤ ជាជនជាតិស៊ីរី។

នៅក្នុងសេចក្តីថ្លែងការណ៍មួយ យោធាអ៊ីស្រាអែលបាននិយាយថាខ្លួនបានធ្វើការវាយប្រហារចំនួន ២លើកកាលពីថ្ងៃអាទិត្យ ដោយបានសម្លាប់មន្ត្រីហេសបូឡាហ៍ម្នាក់ និងជនសង្ស័យជាអ្នករត់ពន្ធអាវុធសម្រាប់ក្រុមនេះ។

ទោះបីជាបទឈប់បាញ់រវាងអ៊ីស្រាអែល និងក្រុមហេសបូឡាហ៍ត្រូវបានអនុវត្តន៍ចាប់តាំងពីខែវិច្ឆិកា ឆ្នាំ២០២៤ ក៏ដោយ ក៏អ៊ីស្រាអែលនៅតែបន្តការវាយប្រហារស្ទើរតែរាល់ថ្ងៃទៅលើប្រទេសលីបង់ ដោយអ៊ីស្រាអែលនិយាយថា ពួកគេបានកំណត់គោលដៅលើការគំរាមកំហែងរបស់ក្រុមហេសបូឡាហ៍ដែលកំពុងបន្តតាមបណ្តោយព្រំដែន។ ប្រទេសលីបង់ និងអង្គការអន្តរជាតិជាច្រើនបានថ្កោលទោសការវាយប្រហារទាំងនេះថាជាការរំលោភលើបទឈប់បាញ់៕

ដោយ៖ មូល មិនា (ប្រភព៖ ស៊ីនហួ)