AKP ភ្នំពេញ ថ្ងៃទី២៧ ខែតុលា ឆ្នាំ២០២៥--ឯកឧត្តម Lee Jae Myung ប្រធានាធិបតីនៃសាធារណរដ្ឋកូរ៉េបានចេញសារសម្ដែងនូវការស្វាគមន៍ចំពោះសេចក្តីថ្លែងការណ៍រួមរវាងកម្ពុជា និងថៃ ដែលត្រូវបានប្រកាសនៅប្រទេសម៉ាឡេស៊ី កាលពីថ្ងៃទី២៦ ខែតុលា ឆ្នាំ២០២៥ ដែលមានការសម្របសម្រួល និងចូលរួមធ្វើជាសាក្សីពីឯកឧត្ដមប្រធានាធិបតីអាម៉េរិក ដូណាល់ ត្រាំ និងឯកឧត្ដមនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម។ នេះបើយោងតាមការចេញផ្សាយតាមរយៈបណ្ដាញទំនាក់ទំនងសង្គមហ្វេសប៊ុកផ្លូវការរបស់ស្ថានទូតនៃសាធារណរដ្ឋកូរ៉េប្រចាំនៅកម្ពុជា នារសៀលថ្ងៃទី២៧ ខែតុលា ឆ្នាំ២០២៥។

ក្នុងសារដែលបានចេញផ្សាយនោះ ឯកឧត្តម Lee Jae Myung បានថ្លែងបញ្ជាក់ថា៖ «ខ្ញុំសូមស្វាគមន៍យ៉ាងស្មោះស្ម័គ្រចំពោះសេចក្តីថ្លែងការណ៍រួមរវាងកម្ពុជា និងថៃ ដែលត្រូវបានប្រកាសនៅប្រទេសម៉ាឡេស៊ី ក្រោមការដឹកនាំរបស់នាយករដ្ឋមន្ត្រី ហ៊ុន ម៉ាណែត នៃប្រទេសកម្ពុជា និងនាយករដ្ឋមន្ត្រី អានុទីន នៃប្រទេសថៃ។ ខ្ញុំសង្ឃឹមថា កិច្ចព្រមព្រៀងថ្ងៃនេះនឹងបម្រើជាជំហានដ៏មានអត្ថន័យមួយឆ្ពោះទៅរកការលើកកម្ពស់សន្តិភាព និងស្ថិរភាពនៅក្នុងតំបន់ ក៏ដូចជារវាងប្រទេសទាំងពីរផងដែរ»។

ជាមួយគ្នានេះដែរ ឯកឧត្ដមប្រធានាធិបតីក៏សូមវាយតម្លៃខ្ពស់ដល់កិច្ចខិតខំប្រឹងប្រែងរបស់ប្រធានាធិបតីអាម៉េរិក ដូណាល់ ត្រាំ និងនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម ប្រធានកិច្ចប្រជុំកំពូលអាស៊ានឆ្នាំនេះ ចំពោះការយកចិត្តទុកដាក់រហូតដល់ការសម្រេចបាននូវកិច្ចព្រមព្រៀងជាប្រវត្តិសាស្ត្រនេះ៕

ដោយ៖ រិទ្ធី