AKP ភ្នំពេញ ថ្ងៃទី២៧ ខែតុលា ឆ្នាំ២០២៥ -- តាមក្រសួងការបរទេសកូរ៉េខាងត្បូងបានឱ្យដឹងថា រដ្ឋមន្ត្រីការបរទេសកូរ៉េខាងត្បូង លោក ចូ យុន(Cho Hyun) បានជួបជាមួយសមភាគីឥណ្ឌា លោក ស៊ូប្រាម៉ាន់យ៉ាំ ជៃសានការ (Subrahmanyam Jaishankar) នៅទីក្រុងគូឡាឡាំពួ កាលពីថ្ងៃអាទិត្យ ដើម្បីពិភាក្សាអំពីវិធីជំរុញទំនាក់ទំនងទ្វេភាគីរបស់ប្រទេសទាំងពីររួមទាំងការផ្លាស់ប្តូរកម្រិតកំពូលផងដែរ។

យោងតាមក្រសួងបានឱ្យដឹងថា នៅក្នុងកិច្ចប្រជុំដែលបានធ្វើឡើងក្នុងឱកាសនៃកិច្ចប្រជុំកំពូលសមាគមប្រជាជាតិអាស៊ីអាគ្នេយ៍ លោក ចូ បាននិយាយថា ការផ្លាស់ប្តូរកម្រិតកំពូលរវាងប្រទេសទាំងពីរនៅតែបន្ត ដោយលោកបានកត់សម្គាល់ពីដំណើរទស្សនកិច្ចរបស់លោកទៅកាន់ប្រទេសឥណ្ឌាកាលពីពីរខែមុន។

ជាការឆ្លើយតប លោក ជៃសានការ ត្រូវបានដកស្រង់សម្តីថា ប្រទេសឥណ្ឌាក៏ផ្តល់សារៈសំខាន់ខ្ពស់លើទំនាក់ទំនងរបស់ខ្លួនជាមួយប្រទេសកូរ៉េខាងត្បូង និងស្វែងរកការជំរុញទំនាក់ទំនងទ្វេភាគីរបស់ពួកគេតាមរយៈការទំនាក់ទំនងជាយុទ្ធសាស្ត្រ និងកិច្ចសហប្រតិបត្តិការគ្រប់ជ្រុងជ្រោយ។

ភាគីទាំងពីរបានព្រមព្រៀងគ្នាបន្តពង្រីកការផ្លាស់ប្តូរកម្រិតកំពូលដោយអ្នកការទូតកំពូលឥណ្ឌាបានស្នើសុំឱ្យប្រធានាធិបតីកូរ៉េខាងត្បូងលោក​ លី ជេម្យុង ធ្វើដំណើរទៅទស្សនកិច្ចប្រទេសឥណ្ឌានៅថ្ងៃមួយដែលងាយស្រួលទៅវិញទៅមក។ នេះបើយោងតាមក្រសួង៕

ដោយ៖ មូល មិនា (ប្រភព៖ យ៉ុនហាប់)