AKP កំពង់ធំ ថ្ងៃទី២៦ ខែតុលា ឆ្នាំ២០២៥--ដោយអនុវត្តតាមអនុសាសន៍ដឹកនាំនិងយកចិត្តទុកដាក់ដ៏ខ្ពង់ខ្ពស់ពីឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ កាលពីថ្ងៃទី២៥ខែតុលា ឆ្នាំ២០២៥ ឯកឧត្តម ឧត្តមសេនីយ៍ឯក តាន់ សំណាង អគ្គស្នងការរង ទទួលដឹកនាំការងារបុគ្គលិកនិងធនធានមនុស្សតំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បានដឹកនាំប្រតិភូអគ្គស្នងការដ្ឋាននគរបាលជាតិចូលរួមគោរពវិញ្ញាណក្ខន្ធនិងបំពាក់ឋានន្តរសក្តិថ្នាក់វរសេនីយ៍ឯកជាកិច្ចបច្ឆាមរណៈសពមន្ត្រីនគរបាលជាតិ នៃស្នងការដ្ឋាននគរបាលខេត្តកំពង់ធំ។
លោកវរសេនីយ៍ទោ ហួន សាវ័យ នាយរងការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តកំពង់ធំបានពលីជីវិតកាលពីថ្ងៃទី២៣ខែតុលា ឆ្នាំ២០២៥ក្នុងកិច្ចប្រតិបត្តិការបង្ក្រាបករណីជួញដូរគ្រឿងញៀននៅចំណុចភូមិ បែកចាន ឃុំ អណ្ដូងពោធិ៍ ស្រុកតាំងគោក ខេត្តកំពង់ធំ ហើយត្រូវបានក្រុមគ្រួសារសពរៀបចំធ្វើបុណ្យតាមប្រពៃណីទំនៀមទំលាប់ព្រះពុទ្ធសាសនា នៅគេហដ្ឋាននៃសពក្នុងភូមិបឹងសំរឹទ្ធ ឃុំបល្ល័ង្ក ស្រុកបារាយណ៍ខេត្តកំពង់ធំ។

ក្នុងពិធីនោះមានការអញ្ជើញចូលរួមពីសំណាក់ លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ លោក លោកស្រីស្នងការរង នាយការិយាល័យ អធិការនគរបាលស្រុក អធិការរង នាយ នាយរងប៉ុស្តិ៍នគរបាលរដ្ឋបាលនិងមន្ត្រីនគរបាលចំណុះឱ្យស្នងការដ្ឋាននគរបាលខេត្ត ។
ក្នុងឱកាសនោះ ឯកឧត្តម ឧត្តមសេនីយ៍ឯក តាន់ សំណាង បានពាំនាំនូវប្រសាសន៍ផ្ដាំផ្ញើចូលរួមរំលែកពីសំណាក់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិ ជូនចំពោះក្រុមគ្រួសារសព ហើយបានចាត់ទុកថាការពលីនេះគឺជាការលះបង់ដ៏ធំធេងក្នុងបុព្វហេតុ បង្ការ ទប់ស្កាត់ បង្ក្រាបបទគ្រឿងញៀន សំដៅថែរក្សាសន្តិសុខ សណ្តាប់ធ្នាប់សាធារណៈនិងសុវត្ថិភាពសង្គម។

ឯកឧត្តម ឧត្តមសេនីយ៍ឯក តាន់ សំណាង អគ្គស្នងការរង ទទួលដឹកនាំការងារបុគ្គលិក និងធនធានមនុស្សបានគូសបញ្ជាក់ថា មរណភាពរបស់លោកវរសេនីយ៍ឯក ហួន សាវ័យ គឺជាការបាត់បង់នូវស្វាមី ឪពុកនិងបងប្អូន ជាទីស្រឡាញ់ ប្រកបដោយព្រហ្មវិហារធម៌ ក៏ដូចជាការបាត់បង់នូវមន្ត្រីនគរបាលជាតិ ដ៏អង់អាច ក្លាហាន ដែលជានិច្ចកាល លោកបានលះបង់ពេលវេលា កម្លាំងកាយចិត្តនិងសេចក្តីសុខផ្ទាល់ខ្លួន រហូតលះបង់អាយុជីវិត ប្រកបដោយកិត្តិយស ដើម្បីបុព្វហេតុ សន្តិសុខ សុវត្ថិភាព សណ្តាប់ធ្នាប់សាធារណៈ ។  
ស្ថិតក្នុងវេលាដ៏សោកសង្រេងនេះ ឯកឧត្តម ឧត្តមសេនីយ៍ឯក បានគោរពវិញ្ញាណក្ខន្ធនិងបំពាក់ឋានន្តរស័ក្តិថ្នាក់វរសេនីយ៍ឯក សពលោកវរសេនីយ៍ទោ ហួន សាវ័យ ជាកិច្ចបច្ឆាមរណៈព្រមទាំងឧទ្ទិសបួងសួង ដល់គុណបុណ្យព្រះរតនត្រ័យ វត្ថុសាកសិទ្ធក្នុងលោក សូមជួយដឹកនាំដួងវិញ្ញាណក្ខន្ធរបស់លោក ហួន សាវ័យ បានទៅកាន់សុគតិភព កុំបីឃ្លៀងឃ្លាតឡើយ។ ឯកឧត្តម ឧត្តមសេនីយ៍ឯក តាន់ សំណាង បានប្រគល់ថវិកាជូនលោកស្រីអនុសេនីយ៍ទោ យឹម ឆេងលី ត្រូវជាភរិយាសពលោកបរសេនីយ៍ឯក ហួន សាវ័យ រួមមាន÷១.សមាគមមិត្តនគរបាលជាតិកម្ពុជា ចំនួន ៦លានរៀល។២.ថវិកា ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិចំនួន២០លានរៀល។៣.ថវិកា សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រចំនួន៤លានរៀល។

សូមរំលឹកផងដែរថា កាលពីថ្ងៃទី២៤ខែតុលាឆ្នាំ២០២៥ ឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំនិងលោកស្រី លឹម អៀងចេងបានដឹកនាំកងកម្លាំងចូលរួមរំលែកទុក្ខនិងគោរពវិញ្ញាណក្ខន្ធមន្ត្រីនគរបាលជាតិពលីជីវិតក្នុងបេសកកម្មបង្ក្រាបគ្រឿងញៀន លោកវីរសេនីយ៍ទោ ហួន  សាវ័យ និងបានឧបត្ថម្ភថវិកាចំនួន១០លានរៀលជូនលោកស្រីអនុសេនីយ៍ទោ យឹម ចេងលី ត្រូវជាភរិយានៃសពដើម្បីសម្រាលបន្ទុកក្នុងការដោះស្រាយចំណាយក្នុងកម្មវិធីបុណ្យផងដែរ៕

ដោយ៖ ស៊ុម វណ្ណា