AKPកំពង់ធំ ថ្ងៃទី២៥ ខែតុលា ឆ្នាំ២០២៥---

លោកហំ សឺងហ៊ាកប្រធានកម្រងស្ពឺបានលើកឡើងថាយុទ្ធនាការប្រមូលកុមារចូលរៀនគឺដើម្បីបញ្ជូនសារដល់អាណាព្យាបាលឱ្យបញ្ជូនកូនមកចុះឈ្មោះចូលរៀននិងចាកផុតពីភាពអវិជ្ជា។លោក ហំ សឺងហ៊ាកបានលើកឡើងដូច្នេះនៅក្នុងយុទ្ធនាការប្រមូលកុមារចូលរៀនដោយមានការចូលរួមពីគណៈកម្មការទ្រទ្រង់សាលារៀន លោកនាយក នាយិកា លោកគ្រូអ្នកគ្រូ សិស្សានុសិស្សតំណាងអង្គការកូហ្វាព អាជ្ញាធរឃុំ ប៉ុស្តិ៍នគរបាលរដ្ឋបាល ព្រមទាំងព្រះសង្ឃធ្វើយុទ្ធនាការប្រមូលកុមារចូលរៀននៅក្នុងកម្រងស្ពឺស្ថិតនៅភូមិម្សាក្រង ឃុំម្សាក្រងស្រុកស្ទោង ខេត្តកំពង់ធំនាព្រឹកថ្ងៃទី២៥ខែតុលាឆ្នាំ ២០២៥។

លោកហំ សឺងហ៊ាកបានឱ្យដឹងថាយុទ្ធនាការប្រមូលកុមារចូលរៀននៅព្រឹកនេះគឺមានការចូលរួមពីគ្រប់សាលាទាំងអស់នៅក្នុងកម្រងស្ពឺ ព្រមទាំងមានការចូលរួមពីអង្គការដៃគូអាជ្ញាធរដែនដីសំដៅធ្វើយ៉ាងណាប្រមូលកុមារដែលគ្រប់អាយុចាប់ពី៧០ខែឬ៦ឆ្នាំឱ្យមកចុះឈ្មោះចូលរៀននៅតាមសាលាបឋមសិក្សាក្នុងផែនទីសិក្សារបស់ខ្លួនឱ្យបានអស់ មិនមានការបង់ថ្លៃប្រកបដោយសមធម៌និងបរិយាបន្ន។
លោកប្រធានកម្រងបានបន្ថែមថាយុទ្ធនាការនៅពេលនេះជាសារមួយសម្រាប់បញ្ជូនដល់ឪពុកម្ដាយ អាណាព្យាបាលគ្រប់រូប ជាពិសេសកុមារាកុមារីខ្លួនឯងត្រូវមកចុះឈ្មោះចូលរៀនឬនាំកូនចៅមកចុះឈ្មោះឱ្យបានគ្រប់ៗគ្នា ដែលក្នុងនោះត្រូវនាំមកជាមួយនូវសៀវភៅគ្រួសារសំបុត្រកំណើត ឬឯកសារពាក់ព័ន្ធនានាសំដៅឆ្លើយតបតាមគោលនយោបាយយុទ្ធសាស្ត្ររបស់រាជរដ្ឋាភិបាលអណត្តិទី ៧ ក្នុងការកសាងអភិវឌ្ឍមូលធនមនុស្សដែលជាកម្លាំងស្នូលដែលមិនអាចខ្វះបានក្នុងការកសាងអភិវឌ្ឍប្រទេសជាតិស្របតាមបរិបទឌីជីថល។

ទន្ទឹមនឹងនេះលោកប្រធានកម្រងបានអំពាវនាវដល់សិស្សានុសិស្ស អាណាព្យាបាលព្រមទាំងឪពុកម្ដាយគ្រប់រូបត្រូវត្រៀមលក្ខណៈឱ្យបានគ្រប់គ្រាន់ សម្រាប់កូនចៅឬបុត្រធីតារបស់ខ្លួន ចូលសិក្សារៀនសូត្រប្រកបដោយភាពរលូនក្នុងបវេសនកាលឆ្នាំថ្មីក៏ដូចជាត្រៀមសំភារៈសិក្សា មានផែនការអប់រំណែនាំនិងបង្រៀនក៏ដូចជារៀននៅតាមផ្ទះបានហ្មត់ចត់បំផុតហើយត្រូវចៀសឱ្យឆ្ងាយនៅក្មេងទំនើង អំពើអបាយមុខទាំងឡាយព្រមទាំងគោរពច្បាប់ចរាចរណ៍ឱ្យបានខ្ជាប់ខ្ជួនជាពិសេសត្រូវពាក់មួកសុវត្ថិភាពនិងដាក់ខ្សែក្រវ៉ាត់ការពារឱ្យបានត្រឹមត្រូវទាំងនៅផ្ទះក៏ដូចជាធ្វើដំណើរទៅមកសាលារៀននិងធ្វើខ្លួនឱ្យក្លាយជាកុមារបីល្អគឺ"កូនល្អ សិស្សល្អ មិត្តល្អ"សំដៅទទួលបានលទ្ធផលល្អនៅក្នុងចុងឆ្នាំសិក្សាឆ្នាំនេះនិងជាទំពាំងស្នងឬស្សីហើយជាមូលធនមនុស្សសម្រាប់អភិវឌ្ឍប្រទេសជាតិទៅថ្ងៃក្រោយ។

សូមបញ្ជាក់ថា កម្រងស្ពឺមានអគារសិក្សាសរុបចំនួន៩ខ្នង មាន៣០បន្ទប់ លោកគ្រូអ្នកគ្រូសរុបចំនួន៤៩នាក់ (ស្រី២៧នាក់)និងសិស្សានុសិស្សចំនួន១.២៦៤នាក់(ស្រី៦៦៥នាក់)។អង្គការកូហ្វាពក៏ធ្លាប់បានឧបត្ថម្ភនូវកង់សម្ភារៈសិក្សាមួយចំនួនធំដល់សិស្សមករៀនយឺតនិងងាយរងហានិភ័យនៅក្នុងស្រុកស្ទោងនិងកម្រងស្ពឺផងដែរ៕

ដោយ៖ ស៊ុម វណ្ណា