AKP សៀមរាប ថ្ងៃទី២៥ ខែតុលា ឆ្នាំ២០២៥---

លោកស្រី ម៉ននី រង្សី អភិបាលរងខេត្តសៀមរាបបានថ្លែងនៅក្នុងពិធីចែកបណ្ណសសើរដល់សិស្សានុសិស្សទទួលបានជ័យលាភីនិន្ទេស A និងសិស្សានុសិស្សដែលបានបញ្ចប់ការសិក្សាក្នុងឆ្នាំសិក្សា ២០២៤ - ២០២៥ របស់សាលាវេសហ្គេតអន្តរជាតិ នៅខេត្តសៀមរាប នាថ្ងៃទី២៥ ខែតុលា ឆ្នាំ២០២៥នេះថា វិស័យអប់រំ មានតួនាទីយ៉ាងសំខាន់ក្នុងការរួមចំណែកដល់ការអភិវឌ្ឍជាតិ ដោយកុមារ    យុវជន និងមនុស្សពេញវ័យ ត្រូវទទួលបានការសិក្សា និងការអប់រំពេញមួយជីវិត ដែលមានភាពពាក់ព័ន្ធ និង ឆ្លើយតបទៅនឹងតម្រូវការទីផ្សារការងារ ប្រកបដោយគុណភាពខ្ពស់ហើយការអប់រំ ត្រូវផ្តោតលើការ កសាងជំនាញ និងការផ្តល់ឱកាសដល់សិស្សគ្រប់រូប ក្នុងការទទួលបាននូវចំណេះដឹងមូលដ្ឋាន ដើម្បី ឈានទៅសិក្សាលើចំណេះជំនាញបច្ចេកទេស និងជំនាញឯកទេសផ្សេងៗ ដើម្បីសម្រេចបានការអភិវឌ្ឍដែលផ្តល់អត្ថប្រយោជន៍ពេញលេញដល់គ្រប់ស្រទាប់យុវជន ក្នុងការកសាងអនាគតរបស់ខ្លួនប្រកប ដោយគុណភាព។

 លោកស្រីបន្តថា នៅទូទាំងខេត្តសៀមរាបមានកន្លែងផ្តល់សេវាអប់រំ ១៤១៣ សាលា/កន្លែង សិស្សសរុប ៣០១៥៦៤ នាក់។ ក្នុងឆ្នាំសិក្សា២០២៤-២០២៥កន្លងទៅ ខេត្តសៀមរាបមានអត្រាប្រឡងជាប់សញ្ញាបត្រមធ្យមសិក្សាបឋមភូមិ95,59% និងអត្រាប្រឡងជាប់សញ្ញាបត្រមធ្យមសិក្សាទុតិយភូមិ88,57% ស្រី90,95% (និទ្ទេសA មានចំនួន 247នាក់ ស្រី 135នាក់)។ ជាមួយគ្នានេះដែរ ការចូលរួមចំណែកពីវិស័យឯកជនក៏មានសារៈសំខាន់ផងដែរ ក្នុងការជួយផ្តល់សេវាអប់រំដល់សិស្ស និស្សិតស្របតាមចក្ខុវិស័យរបស់សាលារៀន និងមានបេសកកម្មក្នុងការកសាងធនធានមនុស្សប្រកប ដោយស្មារតី ទទួលខុសត្រូវខ្ពស់ ព្រមទាំងចូលរួមចំណែកក្នុងការធ្វើឱ្យសម្រេចនូវគោលដៅអប់រំជាតិ ដែលត្រូវធានាការ បណ្តុះបណ្តាលមូលធនមនុស្ស ពេញលេញប្រកបដោយវិជ្ជាសម្បទា បំណិតសម្បទា និងចរិយាសម្បទា។ លោកស្រីអភិបាលរងខេត្ត ក៏បានជំរុញឱ្យអ្នកផ្តល់សេវាអប់រំនៅមូលដ្ឋានទាំងអស់ទាំងរដ្ឋ និងវិស័យឯកជនត្រូវពង្រឹង នៃការបណ្តុះបណ្តាលឱ្យកាន់តែមានប្រសិទ្ធភាពខ្ពស់បន្ថែមទៀត។

លោក រ័ត្ន រស្មី នាយកសាលាវេសហ្គេតអន្តរជាតិ បានលើកឡើងថា សម្រាប់សិស្សានុសិស្សរបស់ សាលាវេសហ្គេតអន្តរជាតិ ដែលចូលរួមប្រឡងសញ្ញាបត្រមធ្យមសិក្សាបឋមភូមិ(ថ្នាក់ទី៩)ឆ្នាំនេះ ទទួលជោគជ័យ ៩៨% ក្នុងនោះ សិស្សនិទ្ទេសល្អ ចំនួន ១១នាក់ សិស្សនិទ្ទេសល្អបង្គួរចំនួន ១២នាក់។ចំណែកលទ្ធផលការប្រឡងសញ្ញាបត្រមធ្យមសិក្សាទុតិយភូមិ(ថ្នាក់ទី១២)ទទួលបានជោគជ័យ៩៦% ក្នុងនោះទទួលបានសិស្សជ័យ លាភីនិទ្ទេស A ចំនួន ៦នាក់ និងនិទ្ទេស B ចំនួន ១៣ នាក់។ ក្នុងចក្ខុវិស័យវែងឆ្ងាយ និងមានទិសដៅបេសកម្មជាក់លាក់ នៃគោលការអប់រំ របស់សាលាវេសហ្គេតអន្តរជាតិ ប្តេជ្ញាចិត្តដ៏ខ្លាំងក្លា ក្នុងការចូលរួមចំណែកបណ្តុះបណ្តាលបង្ហាត់បង្រៀនអប់រំដល់សិស្សានុសិស្សដោយក្តីអត់ធ្មត់ ព្យាយាមដើម្បីឱ្យកូនៗមានធនធានដែលមានសក្តានិពល សម្រាប់ចូលរួមប្រកួតប្រជែងចំណេះដឹង និងស្នាដៃផ្សេងៗ ទាំងក្នុង និងក្រៅប្រទេសឱ្យកាន់តែមានគុណភាព៕ 

ដោយ ៖ ឃុត សៅ