AKP ភ្នំពេញ ថ្ងៃទី២៤ ខែតុលា ឆ្នាំ២០២៥--សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានមានប្រសាសន៍ ជុំវិញវិវាទព្រំដែនរវាងកម្ពុជា និងថៃ ឱ្យដឹងថា គឺបានធូរស្រាល និងល្អប្រសើរច្រើន ខណៈនៅថ្ងៃទី២៦ ខែតុលាខាងមុខ ភាគីទាំងពីរអាចនឹងមានការចុះកិច្ចព្រមព្រៀងសន្ដិភាពរួមគ្នាបន្ថែមទៀតនោះ។
ក្នុងកិច្ចប្រជុំពេញអង្គ សម័យប្រជុំលើកទី៤ ព្រឹទ្ធសភានីតិកាលទី ៥ នៅវិមានព្រឹទ្ធសភា នាព្រឹកថ្ងៃទី២៤ ខែតុលា ឆ្នាំ២០២៥ សម្ដេចតេជោ ហ៊ុន សែន បានថ្លែងថា៖ «ឥឡូវដំណើរការឈានទៅរកការស្រុះស្រួល ដែលកិច្ចប្រជុំប៉ុន្មានថ្ងៃនេះវាមានការស្រុះស្រួលច្រើនហើយៗ អាចនឹងថ្ងៃទី២៦នេះ នឹងមានការចុះហត្ថលេខាលើកិច្ចព្រមព្រៀងសន្តិភាព»។ 

គួរបញ្ជាក់ថា ប៉ុន្មានថ្ងៃមកនេះ រួមមានកិច្ចប្រជុំពិសេសគណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ នៅខេត្តចន្ទបុរី ប្រទេសថៃកាលពីថ្ងៃទី២១-២២ ខែតុលា ឆ្នាំ២០២៥ និងលទ្ធផលកិច្ចប្រជុំពិសេសលើកទី២ នៃគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី២៣ ខែតុលា ឆ្នាំ២០២៥ នៅទីក្រុងគួឡាឡាំពួរ ប្រទេសម៉ាឡេស៊ី ដោយភាគីទាំងពីរមានការស្រុះស្រួលគ្នាច្រើនហើយគឺស្ថានការណ៍កំពុងវិវត្តមករកភាពវិជ្ជមាន និងអាចឈានទៅស្ដារប្រក្រតីភាពឡើងវិញនៃទំនាក់ទំនងប្រទេសទាំងពីរ។

នៅក្នុងសម័ប្រជុំនេះដែរ សម្ដេចតេជោប្រធានព្រឹទ្ធសភា ក៏បានលើកឡើងដែរថា   ស្មារតីនៃកិច្ចព្រមព្រៀង ២៣ តុលា ត្រូវបានបញ្ចូលក្នុងរដ្ឋធម្មនុញ្ញ នៃព្រះរាជាណាចក្រកម្ពុជា ដែលកំពុងប្រើប្រាស់សព្វថ្ងៃនេះដែលបានផ្តល់ឱកាសឱ្យកម្ពុជា វិវឌ្ឍជាវិជ្ជមានជាបន្តបន្ទាប់រហូតមកដល់សព្វថ្ងៃ។ សម្ដេចតេជោក៏បានថ្លែងឱ្យដឹងដែរថា មានអ្នកចង់ស្នើទៅសហប្រធានកិច្ចព្រមព្រៀងទីក្រុងប៉ារីសឱ្យកោះប្រជុំបន្ទាន់ដើម្បីដោះស្រាយបញ្ហាព្រំដែនកម្ពុជា និងថៃ ដោយសម្ដេច ប្រាប់ទៅអ្នកដែលមិនយល់ ឬធ្វើជាមិនយល់ ឬធ្វើក៏ធ្វើភ្លឺឱ្យដឹងថា ធាតុចូលរបស់កិច្ចព្រមព្រៀងសន្តិភាពទីក្រុងប៉ារីស គឺបានយកមកដាក់នៅក្នុងរដ្ឋធម្មនុញ្ញរបស់កម្ពុជារួចហើយ ដែលជាច្បាប់កំពូលរបស់កម្ពុជា៕

ដោយ៖ ជឹម ណារី