AKP.ភ្នំពេញ ថ្ងៃទី២៤ ខែតុលា ឆ្នាំ២០២៥-- កាកបាទក្រហមកម្ពុជា និងគណៈកម្មាធិការអន្តរជាតិនៃកាកបាទក្រហម (ICRC) បានអនុវត្តបេសកកម្មមនុស្សធម៌ ប្រគល់សារកាកបាទក្រហម/លិខិតដំណឹងគ្រួសារ (Red Cross Message) ជូនដល់ដៃ ក្រុមគ្រួសារយុទ្ធជនចំនួន ១៨នាក់ ដែលរស់នៅតាមបណ្តាខេត្តចំនួន៦ រួមមាន៖ ខេត្តសៀមរាប ៦គ្រួសារ ឧត្តរមានជ័យ ១ គ្រួសារ ព្រះវិហារ ៥គ្រួសារ ស្ទឹងត្រែង ៤គ្រួសារ ស្វាយរៀង ១គ្រួសារ និងកំពត ១គ្រួសារ ពីថ្ងៃទី២១ ដល់ទី២៤ ខែតុលា ឆ្នាំ ២០២៥។

ក្រោយពេលទទួលបានសារដំណឹងជាលើកទី២ និងដឹងពីស្ថានភាពសុខសប្បាយរបស់ វិរៈកងព័ទ្ធទាំង ១៨ នាក់, ក្រុមគ្រួសារបានបង្ហាញអារម្មណ៍រីករាយ និងសេចក្តីសប្បាយចិត្តយ៉ាងខ្លាំង ព្រមទាំងថ្លែងអំណរគុណជូនដល់ថ្នាក់ដឹកនាំកាកបាទក្រហមកម្ពុជា ដែលតែងតែយកចិត្តទុកដាក់ខ្វល់ខ្វាយអំពីសុខទុក្ខ និងជួយសម្រួលការទំនាក់ទំនងរវាងសមាជិកគ្រួសារតាមរយៈសារដំណឹងគ្រួសារកាកបាទក្រហមជាប្រចាំ៕
ដោយ៖ ពេជ្រ សំអឿន(ប្រភព៖កាកបាទក្រហមកម្ពុជា)