AKPបន្ទាយមានជ័យថ្ងៃទី២៤ខែតុលាឆ្នាំ២០២៥ — រដ្ឋបាលស្រុកភ្នំស្រុក បានរៀបចំសិក្ខាសាលាសមាហរណកម្មកម្មវិធីវិនិយោគបីឆ្នាំរំកិល ២០២៦-២០២៨ សម្រាប់ឃុំ និងស្រុក នៅថ្នាក់ស្រុកឆ្នាំ២០២៥ ក្រោមអធិបតីភាពរបស់លោក ឈឿង ក្រៃយ៉ុង អភិបាលរងនៃគណៈអភិបាលខេត្តបន្ទាយមានជ័យព្រឹកថ្ងៃសុក្រ ទី២៤ ខែតុលា ឆ្នាំ២០២៥ នេះ ។

សិក្ខាសាលាដ៏សំខាន់នេះ មានគោលបំណងចម្បង គឺដើម្បី ពិនិត្យ សម្របសម្រួល និងធានាថា គម្រោងសកម្មភាពអាទិភាពដែលបានស្នើសុំដោយរដ្ឋបាលឃុំ និងស្រុក មានភាពស៊ីសង្វាក់គ្នា និងឆ្លើយតបទៅនឹងគោលនយោបាយអភិវឌ្ឍន៍ជាតិ និងខេត្ត ព្រមទាំងតម្រូវការជាក់ស្ដែងរបស់ប្រជាពលរដ្ឋនៅមូលដ្ឋាន។

អង្គសិក្ខាសាលាមានការអញ្ជើញចូលរួមពីតំណាងមន្ទីរ-អង្គភាពជំនាញជុំវិញខេត្ត អាជ្ញាធរឃុំ ក្រុមប្រឹក្សាឃុំ អង្គការមិនមែនរដ្ឋាភិបាល និងក្រុមការងារកសាងផែនការស្រុកភ្នំស្រុក ដើម្បីរួមគ្នាពិភាក្សា និងផ្ដល់ធាតុចូលបន្ថែម ក្នុងការប្រមូលផ្ដុំធនធានពីគ្រប់ភាគីពាក់ព័ន្ធសម្រាប់គាំទ្រដល់កិច្ចអភិវឌ្ឍន៍មូលដ្ឋានប្រកបដោយប្រសិទ្ធភាព និងតម្លាភាព។

ថ្លែងក្នុងឱកាសបើកសិក្ខាសាលានេះ លោក ឈឿង ក្រៃយ៉ុង អភិបាលរងខេត្តបន្ទាយមានជ័យ បានលើកឡើងពីសារៈសំខាន់នៃការកសាងផែនការយុទ្ធសាស្ត្រមួយដែលផ្អែកលើតម្រូវការពិតប្រាកដរបស់ប្រជាពលរដ្ឋ និងគោលការណ៍អភិបាលកិច្ចល្អ។

លោកអភិបាលរងខេត្ត បានក្រើនរម្លឹកយ៉ាងម៉ឺងម៉ាត់ ដល់មន្ត្រីពាក់ព័ន្ធ និងអាជ្ញាធរមូលដ្ឋានទាំងអស់ ត្រូវយកចិត្តទុកដាក់ខ្ពស់ និងទទួលខុសត្រូវក្នុងការកសាងផែនការអភិវឌ្ឍន៍មូលដ្ឋានប្រកបដោយប្រសិទ្ធភាព។
ក្នុងប្រសាសន៍ដ៏មានអត្ថន័យនោះ លោក ឈឿង ក្រៃយ៉ុង បានសង្កត់ធ្ងន់ទៅលើចំណុចគន្លឹះមួយចំនួន ភាពជាក់ស្ដែង និងអាទិភាព ផែនការដែលត្រូវសមាហរណកម្ម ត្រូវតែឆ្លុះបញ្ចាំងពីបញ្ហាប្រឈម និងតម្រូវការបន្ទាន់បំផុតរបស់ប្រជាពលរដ្ឋ ដូចជាបញ្ហាផ្លូវថ្នល់ ទឹកស្អាត អនាម័យ និងសេវាសាធារណៈផ្សេងៗទៀត មុននឹងស្នើសុំគម្រោងដែលមិនសូវចាំបាច់។
គណនេយ្យភាព និងតម្លាភាព ការប្រើប្រាស់ថវិកា និងធនធានទាំងអស់ ត្រូវតែធ្វើឡើងដោយមានគណនេយ្យភាពច្បាស់លាស់ និងតម្លាភាពខ្ពស់ ដើម្បីធានាថា គ្រប់គម្រោងទាំងអស់ត្រូវបានអនុវត្តទៅតាមស្ដង់ដារដែលបានកំណត់ និងផ្ដល់ផលប្រយោជន៍ដល់ប្រជាពលរដ្ឋពិតប្រាកដ។

ការចូលរួមរបស់ប្រជាពលរដ្ឋ លោកបានជំរុញឱ្យអាជ្ញាធរមូលដ្ឋានបន្តលើកកម្ពស់ការពិគ្រោះយោបល់ និងការចូលរួមពីសំណាក់ប្រជាពលរដ្ឋ ព្រមទាំងភាគីពាក់ព័ន្ធ ដើម្បីធានានូវភាពជាម្ចាស់លើផែនការ និងគម្រោងអភិវឌ្ឍន៍។
 ភាពស៊ីសង្វាក់ គម្រោងក្នុងកម្មវិធីវិនិយោគបីឆ្នាំរំកិលនេះ ត្រូវតែមានភាពស៊ីសង្វាក់គ្នាទាំងនៅថ្នាក់ឃុំ ថ្នាក់ស្រុក រហូតដល់ថ្នាក់ខេត្ត និងជាតិ ដើម្បីឱ្យការអភិវឌ្ឍមានទិសដៅតែមួយ និងកាត់បន្ថយភាពត្រួតស៊ីគ្នា។

លោកអភិបាលរង ក៏បានផ្ដាំផ្ញើដល់ក្រុមការងារបច្ចេកទេស ត្រូវបន្តកិច្ចសហការឱ្យបានជិតស្និទ្ធជាមួយអាជ្ញាធរមូលដ្ឋាន ក្នុងការត្រួតពិនិត្យ និងសម្របសម្រួលធាតុចូលនានា ដើម្បីឱ្យកម្មវិធីវិនិយោគបីឆ្នាំរំកិល ២០២៦-២០២៨ នេះ ក្លាយជាផែនទីបង្ហាញផ្លូវសម្រាប់ការអភិវឌ្ឍស្រុកភ្នំស្រុក ប្រកបដោយនិរន្តរភាព និងប្រសិទ្ធភាពខ្ពស់៕ ដោយ៖ ឈុន សារ៉ាត