AKP ភ្នំពេញថ្ងៃទី ២៤ ខែតុលា ឆ្នាំ ២០២៥– ព្រឹកថ្ងៃសុក្រថ្ងៃទី២៤ ខែតុលា ឆ្នាំ២០២៥ លោក មីន កុម្ភៈ អភិបាលរង នៃគណៈអភិ បាលខេត្តព្រះសីហនុ និងឯកឧត្តម ឡៅ សិទ្ធិរ៉ូ អគ្គលេខាធិការរងក្រុមប្រឹក្សាស្តារអភិ វឌ្ឍន៍វិស័យកសិកម្ម និងជនបទ អញ្ជើញបើកវគ្គបណ្តុះបណ្តាល ស្តីពីការបញ្ចូលទិន្នន័យថវិកាវិនិយោគ ៣ឆ្នាំរំកិល ឃុំ សង្កាត់ ដែលគាំទ្រអាហារូបត្ថម្ភក្នុងប្រព័ន្ធចលនាបង្កើនអាហារូបត្ថម្ភ (SUN Tools)  នៅខេត្តព្រះសីហនុ ដោយមានការចូលរួមពីប្រធានមន្ទីរ អង្គភាពពាក់ព័ន្ធ ក្រុមប្រឹក្សាឃុំ សង្កាត់ ស្មៀនឃុំ សង្កាត់ ព្រមទាំងសមាជិក សមាជិកា។

លោក មីន កុម្ភៈ អភិបាលរងខេត្តព្រះសីហនុ មានប្រសាសន៍ថ្លែងថា វគ្គបណ្តុះបណ្តាល ស្តីពីការបញ្ចូលទិន្នន័យថវិកាឃុំ សង្កាត់លើវិស័យសន្តិសុខស្បៀង និងអាហារូបត្ថម្ភ មានគោលបំណងធ្វើឱ្យប្រជាពលរដ្ឋកម្ពុជាទទួលបាននូវអាហារគ្រប់គ្រាន់ មានសុវត្ថិភាពប្រកបដោយអាហារូបត្ថម្ភ ដើម្បីឆ្លើយតបនឹងសេចក្តីត្រូវការផ្នែកចំណីអាហារ និងចំណង់ ចំណូលចិត្តក្នុងការទទួលទានអាហាររបស់ពួកគេ ព្រមទាំងប្រើប្រាស់អាហារឱ្យបានប្រសើរ ដើម្បីធ្វើឱ្យការរស់នៅរបស់ពួកគេមានសុខភាពល្អ និងមានផលិតភាពខ្ពស់។ ឆ្លើយតបទៅនឹង «គោលនយោបាយជាអាទិភាពរបស់រាជរដ្ឋាភិបាល» បានដាក់ចេញនាពេលកន្លងមក ប៉ុន្តែការងារសន្តិសុខស្បៀង និងអាហារូបត្ថម្ភបានចូលរួមចំណែកយ៉ាងសំខាន់ក្នុងការកាត់បន្ថយភាពក្រីក្រ ដោះស្រាយបញ្ហាទុក្ខលំបាក លើកស្ទួយកម្រិតជីវ ភាពរស់នៅ និងលើកកម្ពស់សុខុមាលភាពរបស់ប្រជាពលរដ្ឋថែមទៀតផង។ 

លោក អភិបាលរងខេត្តបានបញ្ជាក់ថា សន្តិសុខស្បៀង និងអាហារូបត្ថម្ភ ជាបញ្ហាអន្តរវិស័យតម្រូវឱ្យមានកិច្ចសហការសម្របសម្រួល ការអន្តរាគមន៍ និងការវិនិយោគនៅក្នុងវិស័យកសិកម្ម សុខាភិបាល អប់រំ ទឹកស្អាត អនាម័យគ្រប់គ្រងធនធានទឹក ការគាំពារសង្គម យ៉េនឌ័រ និងវិស័យពាក់ព័ន្ធនានា។ រាជរដ្ឋាភិបាលនីតិកាលទី៧ នៃរដ្ឋសភា  ក្រោមការដឹកនាំប្រកដោយគតិបណ្ឌិតដ៏ខ្ពង់ខ្ពស់របស់សម្តេចមហាបរវបតី ហ៊ុន ម៉ាណែត នាយករដ្ឋមន្ត្រីកម្ពុជា បានដាក់ចេញនូវយុទ្ធសាស្ត្របញ្ចកោណដំណាក់កាលទី១ សម្រាប់ឆ្នាំ២០២៣-២០២៨ ដោយកំណត់គោលដៅយុទ្ធសាស្ត្រ វិធានការ និងផែនការសកម្ម ភាពជាច្រើន ព្រមទាំងផ្តល់អនុសាសន៍ ដល់ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទសម្របសម្រួល និងសហការជាមួយស្ថាប័នពាក់ព័ន្ធឱ្យអនុវត្តនូវផែនទីបង្ហាញផ្លូវស្តីពីប្រព័ន្ធស្បៀងសម្រាប់ការអភិវឌ្ឍប្រកបដោយចីរភាពនៅឆ្នាំ២០៣០ និងរៀបចំយុទ្ធសាស្ត្រជាតិ ស្តីពីសន្តិសុខស្បៀង និងអាហារូបត្ថម្ភលើកទី៣ ឆ្នាំ២០២៤-២០២៨ ចូលរួមចំណែកអនុវត្តយុទ្ធសាស្ត្របញ្ចកោណដំណាក់កាលទី១ ឱ្យទទួលបានជោគជ័យ ពិសេសបញ្ចកោណទី១ មុំទី៤ ការពង្រឹងប្រព័ន្ធគាំពារសង្គម និងប្រព័ន្ធស្បៀងអាហារ ។

ឯកឧត្តម ឡៅ សិទ្ធិរ៉ូ អគ្គលេខាធិការរង ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទបានអញ្ជើញបើកវគ្គបណ្តុះបណ្តាល ស្តីពីការបញ្ចូលទិន្នន័យថវិកា កម្មវិធីវិនិ យោគ៣ឆ្នាំរំកិលឃុំ-សង្កាត់ ដែលបានគាំទ្រអាហារូបត្ថម្ភនៅក្នុងប្រព័ន្ធចលនាបង្កើនអាហារូបត្ថម្ភ (SUN-Tools)» ដើម្បីពង្រឹងសមត្ថភាពដល់ក្រុមប្រឹក្សាឃុំ ស្មៀនឃុំ មន្ត្រីកសិកម្មឃុំ និងជំនួយការហិរញ្ញវត្ថុឃុំឱ្យយល់ច្បាស់ពីសារៈសំខាន់វិស័យសន្តិសុខស្បៀង និងអាហារូបត្ថម្ភ ក្របខ័ណ្ឌវិភាគ វិធីសាស្ត្រប្រមូលទិន្នន័យ និងវិភាគថវិកា កម្មវិធីវិនិយោគ ៣ឆ្នាំរំកិលឃុំ-សង្កាត់ ដែលគិតគូរដល់អាហារូបត្ថម្ភទៅក្នុងប្រព័ន្ធអនឡាញ ជាពិសេសគោលដៅទី២ គឺ” បញ្ចប់ភាពអត់ឃ្លានសម្រេចឱ្យបានសន្តិសុខស្បៀង និងអាហារូបត្ថម្ភមានភាពប្រសើរឡើង និងកំណើនការងារ សមធម៌ ប្រសិទ្ធភាព និងចីរភាព ជាពិសេសបញ្ជារកោណទី១ មុំទី៤ ការពង្រឹងប្រព័ន្ធគាំពារ លើកកម្ពស់កសិ កម្មប្រកបដោយចីរភាព និងស្របតាមយុទ្ធសាស្ត្របញ្ចកោណដំណាក់កាលទី១ ដើម្បីសង្គម និងប្រព័ន្ធស្បៀង និងបញ្ចកោណទី៤ មុំទី៣ ការលើកស្ទួយវិស័យកសិកម្ម និងការអភិវឌ្ឍជនបទ។ ជាក់ស្តែងពិន្ទុសន្ទស្សន៍នៃភាពអត់ឃ្លានសកល (Global Hunger Index) បានធ្លាក់ចុះពី ៤១,៤០ នៅឆ្នាំ២០០០ មកនៅត្រឹម ១៤,៩០ នៅឆ្នាំ២០២៣។ អត្រាក្រិសក្រិនរបស់កុមារអាយុក្រោម ៥ឆ្នាំបានថយចុះពី ៣២% ក្នុងឆ្នាំ ២០១៤ មកនៅត្រឹម ២២% ក្នុងឆ្នាំ២០២២។ ទោះជាយ៉ាងណាក៏ដោយកង្វះអាហារូបត្ថម្ភស្រួចស្រាល់ (ស្គមស្គាំង) នៅតែប៉ះពាល់ដល់កុមារក្នុងអត្រា ៩.

៦% បញ្ហាលើសទម្ងន់ និងបញ្ហាធាត់ក្នុងចំណោមស្ត្រីដែលមានអាយុពី ១៥ដល់ ៤៩ឆ្នាំបានកើនឡើង ។ ឈរលើបរិបទនៃការរីក ចម្រើនផ្នែកសេដ្ឋកិច្ច និងសង្គមនាពេលបច្ចុប្បន្ន បានធ្វើឱ្យប្រជាជនផ្លាស់ប្តូររបៀប រស់ នៅ និងផ្លាស់ប្តូរឥរិយាបថក្នុងការបរិភោគអាហារ។ ការផ្លាស់ប្តូរទាំងនេះមានឥទ្ធិពលជាវិជ្ជមានលើស្ថានភាពអាហារូបត្ថម្ភរបស់ប្រជាជន។ រាជរដ្ឋាភិបាលបាននឹងកំពុងយកចិត្តទុកដាក់ដោះស្រាយបញ្ហាកង្វះអាហារូបត្ថម្ភ បញ្ហាកង្វះមីក្រូសារជាតិ និងបញ្ហាថយចុះអត្រាបំបៅកូនដោយទឹកដោះម្តាយ បញ្ហាធាត់និងលើសទម្ងន់ក៏មាននិន្នាការកើនឡើងគួរឱ្យកត់សម្គាល់។ ទន្ទឹមនេះរបបអាហារមិនល្អ និងការធ្វើលំហាត់ប្រាណមិនបានគ្រប់គ្រាន់ ជាកត្តាហានិភ័យនៃបញ្ហាសុខភាពសាធារណៈ និងធ្វើឱ្យចុះខ្សោយប្រព័ន្ធការពាររាងកាយប្រឆាំងនឹងជំងឺគ្រប់ប្រភេទ។ ការទទួលទានអាហារ ដែលមានថាមពលខ្ពស់ ជាតិខ្លាញ់ ស្ករ ឬអំបិលច្រើន និងការបរិភោគបន្លែ ផ្លែឈើមិនបានគ្រប់គ្រាន់ ជាហេតុ ផលចម្បងបណ្តាលឱ្យមានជំងឺមិនឆ្លងនានា ដូចជាជំងឺទឹកនោមផ្អែម ជំងឺបេះដូង ជំងឺឡើងសម្ពាធឈាម ជំងឺដាច់សរសៃឈាមខួរក្បាល និងជំងឺមហារីក៕

ដោយ៖ ងូ សុមុនី