AKP ភ្នំពេញ ថ្ងៃទី២៤ ខែតុលា ឆ្នាំ២០២៥–ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ និងជាប្រធានកិត្តិយសក្រុមការងារសកម្មភាពជនពិការក្រសួងទេសចរណ៍បានគូសបញ្ជាក់ថា ការយកចិត្តទុកដាក់លើការធ្វើឱ្យប្រសើរឡើងនូវគុណភាពជីវិត របស់ប្រជាជន ជាពិសេសជនមានពិការភាព គឺជាការងារមួយដ៏មានសារៈសំខាន់ និងតែងតែទទួលបានការយកចិត្តទុកដាក់ខ្ពស់ពីប្រមុខរាជរដ្ឋាភិបាលកម្ពុជាស្របតាមទិសស្លោកសកល «មិនទុកអ្នកណាម្នាក់ឱ្យនៅឯកោ No one left behind»។ ការលើកឡើងរបស់ឯកឧត្តម ហួត ហាក់ យ៉ាងដូច្នេះ ក្នុងសិក្ខាសាលាផ្សព្វផ្សាយផែនការយុទ្ធសាស្រ្តជាតិស្តីពីពិការភាពឆ្នាំ២០២៤-២០២៨ នៅទីការក្រសួង នាថ្ងៃទី២៣ ខែតុលា ឆ្នាំ២០២៥។

ឯកឧត្តមរដ្ឋមន្រ្តីបានបន្ថែមថា ការយកចិត្តទុកដាក់លើការធ្វើឱ្យប្រសើរឡើងនូវគុណភាពជីវិតរបស់ប្រជាជន ជាពិសេសជនមានពិការភាព គឺជាការងារមួយដ៏មានសារៈសំខាន់ និងតែងតែទទួលបានការយកចិត្តទុកដាក់ខ្ពស់ពីប្រមុខរាជរដ្ឋាភិបាលចាប់តាំងពីការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា តាមរយៈការដាក់ចេញផែនការយុទ្ធសាស្ត្រជាតិស្តីពីពិការភាពចំនួន២ដំណាក់កាល ពោលគឺដំណាក់កាលទី១ ឆ្នាំ២០១៤-២០១៨ និងដំណាក់កាលទី២ ឆ្នាំ២០១៩-២០២៣។ ចំណែកនៅដំណាក់កាលទី៣ ការរៀបចំដាក់ឱ្យអនុវត្តផែនការយុទ្ធសាស្ត្រជាតិស្តីពីពិការភាពឆ្នាំ២០២៤-២០២៨ គឺជាការបន្តកម្មវិធីកែទម្រង់ ស្របតាមកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ នៅក្នុងនីតិកាលទី៧ នៃរដ្ឋសភា ក្រោមការដឹកនាំពោរពេញដោយសមត្ថភាព ថាមពល និងបញ្ញាញាណដ៏ឆ្នើមរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានកិត្តិយសក្រុមប្រឹក្សាសកម្មភាពជនពិការ ដើម្បីធានាថាជនមានពិការភាពគ្រប់វ័យ និងគ្រប់ប្រភេទទាំងអស់រស់នៅប្រកប ដោយគុណភាពក្នុងគ្រប់ទិដ្ឋភាពទាំងអស់នៃជីវិត ព្រមទាំងអាចចូលរួមដោយស្មើភាពក្នុងសង្គមមួយប្រកបដោយបរិយាបន្ន ដែលគោរពសិទ្ធិ សេចក្តីថ្លៃថ្នូរ និងភាពចម្រុះ។

ឯកឧត្តមបានគូសបញ្ជាក់បន្ថែមថា ក្រសួងទេសចរណ៍បានចូលរួមគាំទ្រ និងអនុវត្តការងារលើកកម្ពស់សិទ្ធិជនមានពិការភាពដោយបង្កើតបរិស្ថានអំណោយផល និងឱកាសឱ្យពួកគេបានចូលរួមយ៉ាងពេញលេញក្នុងការអនុវត្តសិទ្ធិ និងករណីយកិច្ច ព្រមទាំងទទួលបានផលពីកិច្ចអភិវឌ្ឍវិស័យទេសចរណ៍ប្រកបដោយសមភាព និងសមធម៌ តាមរយៈការលើកកម្ពស់កិច្ចគាំពារ ការគាំទ្រ ការផ្តល់សេវាកម្ម និងឱកាសសមស្របដល់ជនមានពិការភាពនៅក្នុងវិស័យទេសចរណ៍រាប់ទាំងការគិតគូរពីផាសុកវត្ថុសម្រាប់បងប្អូនជនពិការនៅតាមមណ្ឌលកម្សាន្ត អាជីវកម្មទេសចរណ៍ និងសេវាកម្មទេសចរណ៍ថែមទៀតផងដែរ៕

ដោយ៖ ចាន់ សុភឿន (ប្រភព៖ ក្រសួងទេសចរណ៍)