AKPបន្ទាយមានជ័យថ្ងៃទី២៤ខែតុលាឆ្នាំ២០២៥--នគរបាលខេត្តបន្ទាយមានជ័យ កាលពីថ្ងៃព្រហស្បតិ៍ ទី២៣ ខែតុលា ឆ្នាំ២០២៥ បានប្រើប្រាស់រថយន្តចំនួន០២គ្រឿង ដឹកជញ្ជូនប្រជាពលរដ្ឋខ្មែរចំនួន ២០នាក់ ដែលបានវិលត្រឡប់មកពីប្រទេសថៃ តាមច្រកអន្តរជាតិដូង ខេត្តបាត់ដំបង ទៅកាន់លំនៅឋានរបស់ពួកគាត់នៅតាមបណ្តាខេត្តនានាដោយសុវត្ថិភាព។

សកម្មភាពនេះ បានធ្វើឡើងអនុវត្តតាមការដឹកនាំបញ្ជាដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ។ ក្នុងនោះ លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានចាត់តាំង លោកឧត្តមសេនីយ៍ត្រី យ៉ត សុផល ស្នងការរង ផែនការងារកិច្ចការប៉ុស្តិ៍ ដឹកនាំកម្លាំងនគរបាលចំនួន១៥នាក់ សហការជាមួយរដ្ឋបាលខេត្តបន្ទាយមានជ័យ និងស្ថាប័នពាក់ព័ន្ធ ចុះជួយសម្របសម្រួលដល់ការឆ្លងដែនរបស់ពលរដ្ឋខ្មែរទាំងនោះ។

ជាលទ្ធផល ក្នុងប្រតិបត្តិការចុះជួយសម្របសម្រួលនៅថ្ងៃទី២៣ ខែតុលានេះ ចាប់ពីម៉ោង៨:០០នាទីព្រឹក ដល់ម៉ោង៤:០០នាទីល្ងាច ប្រជាពលរដ្ឋខ្មែរដែលវិលត្រឡប់មកពីប្រទេសថៃ មានចំនួនសរុប ២០នាក់ (ស្រី១០នាក់)។ កម្លាំងនគរបាលបានប្រើប្រាស់រថយន្ត០២គ្រឿង ដឹកជញ្ជូនពួកគាត់ទៅកាន់លំនៅដ្ឋានរៀងៗខ្លួន នៅខេត្តចំនួន០២ គឺ ខេត្តបន្ទាយមានជ័យ ចំនួន ១៥នាក់ (ស្រី០៨នាក់ ខេត្តបាត់ដំបង ចំនួន ០៥នាក់ (ស្រី០២នាក់)។

លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានលើកឡើងថា កិច្ចការចុះជួយសម្រួល និងដឹកជញ្ជូនពលរដ្ឋខ្មែរដែលនៅតែបន្តចាកចេញពីប្រទេសថៃមកកាន់ប្រទេសកម្ពុជាវិញ គឺជាកាតព្វកិច្ចដ៏សំខាន់របស់កងកម្លាំងនគរបាល ដើម្បីធានាថា ពលរដ្ឋខ្មែរគ្រប់រូបបានវិលត្រឡប់ទៅកាន់ស្រុកកំណើត ផ្ទះសម្បែងដោយសុវត្ថិភាព។ លោកបានសង្កត់ធ្ងន់ថា កម្លាំងនគរបាលនឹងបន្តយកចិត្តទុកដាក់ខ្ពស់ ក្នុងការចុះជួយសម្របសម្រួល និងដឹកជញ្ជូនបងប្អូនពលរដ្ឋប្រកបដោយស្មារតីទទួលខុសត្រូវខ្ពស់។

ពលរដ្ឋខ្មែរដែលវិលត្រឡប់មកពីប្រទេសថៃ ក៏បានបង្ហាញនូវអារម្មណ៍រំភើបរីករាយ និងថ្លែងអំណរគុណយ៉ាងជ្រាលជ្រៅចំពោះ រាជរដ្ឋាភិបាលកម្ពុជា អាជ្ញាធរ និងកងកម្លាំងប្រដាប់អាវុធគ្រប់ជាន់ថ្នាក់ ជាពិសេសកម្លាំងនគរបាលខេត្តបន្ទាយមានជ័យ ដែលបានចុះទៅទទួល ជួយសម្រួល និងដឹកជញ្ជូនពួកគាត់ពីព្រំដែនទៅកាន់លំនៅឋានវិញ ប្រកបដោយភាពកក់ក្តៅ និងយកចិត្តទុកដាក់បំផុត៕

ដោយ៖ ឈុន សារ៉ាត